曼聯專區小評：傑斯坐正？未係時候！ 精選

夢劇場點解叫夢劇場，因為好多看似無可能的夢都在這裡出現了，好似一班英國土生土長的小孩子可以揚威歐洲、成為衝出世界的萬人迷；而或者一個平凡的葡國小伙子，可以在這裡開始征服全世界的旅程。如果咁講，一位從未試過做領隊的傳奇球員，又可唔可以坐正兼發光發亮？夢劇場當然可以成就呢件事，不過呢一刻睇嚟未係時候。

呢一刻要格拉沙家族委派傑斯坐正看來絕不可能，因為莫帥的領軍之後，佢哋已經成驚弓之鳥，短期內只會投資有商業價值的人身上，所以雲帥的上任看似已經不可逆轉。然而，如果真係有大牌上任，傑斯的身位就會變得好尷尬。一來佢要為自己成為下任魔頭而累積經驗，但另一方面又要保持自己在球迷心目中的光環效應。佢可以點做呢？
對於一位新領隊而言，英超是個太危險的地方，領隊一日廿四小時都被注目，壓力非同一般。要應付壓力同時增加自己經驗，這是絕對困難的。就連蘇斯克查，佢回到挪威攞經驗、再返到英超教波，都係面對困難收場；就連哥迪奧拿，都曾經教過巴塞B隊先擔大旗，一切故事都叫大家冷靜啲，傑斯未係時候坐正！
所以接下來，就係要睇點樣平衡時間同經驗。傑斯可以去外國教兩年波，看看世界、了解一下領隊的生活、爭取一下經驗；但係同時又唔可以離開太耐，佢喺曼聯最強大的武器，就係與一眾球星及工作人員的過去、佢哋嘅合作模式，同大家對佢嘅信任。呢啲其實亦係爵爺最強大的武器。然而，如果佢離開曼聯太耐，呢啲「羈絆」就可能有斷層，佢將一眾球員的能力發揮到120%的故仔亦會越難再現。

不過點都好，佢依家只係接手四場絕對係一件好事，起碼對建立威信有一定效果。就如當年陳方安生出戰立法會補選一樣，短短九個月的任期，既確立了自己的威信，但又好聰明地避開了全個任期，正所謂「做少錯少」。傑斯帶領短短的四場球賽，比起打足全季才可以爭取到威望的領隊而言，他的工作輕鬆太多了。只要一眾球員乖乖地，生生性性贏哂呢幾場波，傑斯就會儲夠威望、有足夠時間去為成為魔頭做準備！