曼聯專區小評:傑斯一喝的意義

曼聯專區 於 21/12/2015 發表 收藏文章
在對諾域治的比賽當中,出現了少有的一幕:曼聯終於有人在戰術指導區大喝、指揮了,而這位就是流著紅魔鬼之血的副教練傑斯。他向球員拍掌鼓勵,又隱約的看到他的口型,微調朗尼的企位,一切就好似當年爵爺的日子一般。球迷對他的舉動非常感動,不少都乘機諷刺一下雲帥:「傑斯做埋雲高爾嗰份了。」、「傑斯鼓勵球員?落雲帥面咁話?」、「有吉士,留主帥在後備席。」、「又來了,雲高爾又靜坐。傑斯有火。」關於這一喝,筆者與球迷們一樣,認為意義非同一般。

人人都有自己風格,你說雲帥做得唔好?絕對唔可以咁講。佢同一般英國領隊好唔同,開咗波好少行去戰術區,亦希望團隊的工作人員表現冷靜,由球員在球場上自己搵對策。招數套路無話邊個啱,只係球隊已經欠缺靈魂之時,球迷一定心急希望領隊可以叫下提下,為球隊帶來方向。正如爵爺一樣,球隊知道自己做緊咩嘅時候,就算未攻得入、形勢50/50,爵爺有時都會選擇坐定定,睇定先出去督師一樣,畀球員自由度從來都唔係壞事。只係當球隊已經5連不勝仲要落後緊,見到雲帥仲坐定定又唔怪得大家心急、傑斯心急。由此看到第一點:雲帥在動員球員、臨場督師呢一環,實在唔太合格。

第二點,就係雲帥的威望在陣中已經磨損得七七八八。作為領隊第二把交椅,其實永遠都唔易做。強如基羅斯、費倫等人都要承受不少壓力,因為佢哋都係兩面不是人嘅角色。一方面作為副手,你做咩都得除咗反對主帥決定。有時佢真係做錯決定,咁你可以做咩?諫官從來唔易做,講一句唔聽、講兩句唔聽,仲點敢再講。現時點,曼聯的情況就係雲帥唔想自己的團隊在比賽中太激動,寧願自己人靜靜商討點變陣都唔想到場邊大叫大喊。不過傑斯喺呢個時候忍唔住,行咗出場大叫督師,佢有無雲帥首肯都好,其實對雲帥的威望都係一種破壞。無得到佢答應行出去絕對係忤逆啦,「依家你做得唔好,我嚟!」就算佢得到雲帥的支持,亦表示了雲高爾終於明白自己嗰套唔夠、唔work,要試新方法,不過唔由自己出面,球員們或多或少會感到一種疏離感。如此對於雲帥領軍又係一種損害。

而呢件事其中一個最大的影響,或者唔可以講得上係影響啦,就係球迷心目中傑斯成為曼聯領隊的呼聲將會更高。聽到網絡上的聲音,不少曼迷都認為如果雲帥盡啲力、熱血啲,有前無後打死擺就咁狂攻、為勝利不惜氣力,即使輸波和波,大家一樣會支持落去,會撐。不過家下打計算足球,有機會攻唔攻、有得向前唔去,有得振奮軍心唔做,就等對方一個錯誤、就等自己搓出一個空位,一擊必殺然後退守留力。咁樣即使有成績球迷都會嫌悶(就好似大巴車路士一樣),更何況呢幾場連勝利呢個目標都做唔到。落差之下,對於熱血領隊的索求更大,而出去督師的傑斯正正就係滿足到大家要求。
標籤: 傑斯  曼聯  

留言


請按此登錄後留言。未成為會員? 立即註冊
  • 基奧特 於 21/12/2015 評論 NO. 1

    曼聯搞到好似車仔禁,(摩帥)有heart,助教就...... V92 無heart 助教好掂,所以搞到成績好差lol

快捷鍵:←
快捷鍵:→