曼聯專區小評：做生不如做熟？ 精選

可能唔少球迷都有一種感覺，就係山齊士來投之後好似格格不入，水平遠低於期望值。以「山神」之名來投，至今佢只貢獻一入球(仲要係12碼，仲要係唔入補中)，連助攻都欠奉，甚至有報導指曼聯高層已經開始後悔購入山齊士咁話。但另一邊廂，因為山神來投而上陣機會少咗嘅連加特，明明過去7場比賽得返3次正選，偏偏成為車曼大戰奠勝功臣。唔通真係做生不如做熟，一代神將不如用舊人？但係連加特勁過山齊士，呢句說話又真係點聽都唔似係事實…

呢一切，應該由陣式開始分析。對摩連奴而言，山齊士的加盟可以講得上係攻擊線的最後一塊砌圖，喺佢心目中最理想的陣式就係433，由盧卡古任正前鋒，輔以左路馬迪爾、右路山齊士；中場則以馬迪打防中，普巴與另一位中場打box to box助攻助守，當中又以普巴作為進攻的連繫橋樑。如此一來，各人各司其職，理論上中前線攻守稱得上係平衡嘅。只係車曼大戰上半場呢套戲唱得唔好，係因為山齊士「太努力」，往往無留守喺右路進攻線，反而力求入楔成為盧卡古的影子輔鋒。未同隊友夾熟嘅佢，最終幫唔到「紅渣古」之餘，其走位亦令普巴有啲進退失據。而麥湯米尼就掛住同夏神玩人貼人，亦因為經驗問題令佢有少少失位(間接造成第一個失球)。但呢個問題，下半場就唔同咗。
漸入佳境，係因為麥湯米尼同馬迪下半場似乎終於搵到方法鉗制夏神同韋利安，打亂對方中場呢招起到作用，形勢就開始逆轉。加上馬迪爾又消耗咗對方防守球員唔少體力，造就連加特落場時面對殘殘哋嘅對手中後場，而佢又有體力完爆對手，加上隊友嘅默契作出極速反應，團隊配合之下擊潰對手。所以你話山齊士無連加特咁好？其實說穿了只係時勢做英雄，比賽發展到嗰個位置，摩帥行了一著合適的棋子令連加特發揮極致而已。

所以筆者認為，話山神唔啱曼聯仲係言之尚早，隊友唔知佢嘅招數，佢又唔知隊友套路，無化學作用係常理之中。夾多幾個月都仲係無改善，到時先係時候再批評「神」「魔」能否並存啦！但係講級數、講心態，「山神」真係唔話得，有報導指山齊士每節訓練課之後都自動加操半小時，曼聯職工都對佢讚譽有嘉。體能有得練，但默契真係要時間去磨合，依家曼聯的攻擊線係龍定係蟲，睇嚟仲要多一季半季去證明。