曼聯專區小評:信心重建,由馬仔開始

曼聯專區 於 26/10/2018 發表 收藏文章
再傾信心問題,上一篇《曼聯專區小評:失魂紅魔難以走出低谷》講到,無信心係曼聯難以走出低谷嘅原因,而呢個問題其實對軍中小將們影響更大。而馬迪爾就係其中一個,大家有見過on form嘅佢可以有幾得人驚,而對車仔一役亦睇得出佢可以係扭轉戰局的關鍵人物。但事實係,佢嘅信心都係好脆弱。瀟灑哥貝碧托夫曾經喺摩納哥同馬迪爾同隊,當時佢就睇得出呢位法國小將好受信心影響:「佢有幾快有幾強壯大家有眼睇,唯一不足就只係信心。當時我訓練喜歡做防守方,令我對守將有更多認識。而我防馬迪爾時,佢對住我久唔久就有猶豫,想避開唔挑戰我,因為佢認為我會搶到佢波。佢唔夠自信,所以我有同佢講:『你速度咁快,推過我咪得囉?唔好怕,因為你真係好快!』」

事實證明,有信心嘅時候馬迪爾真係好難抵擋,佢盤扭出色亦有速度,加上射術亦好了得,根本係守將嘅惡夢。但係佢真係雪得太耐,亦好少連續上陣保持狀態,對佢嘅發展有一定程度嘅影響。車路士名宿卡斯卡連奴就話,佢同福仔面對同樣情況:「馬迪爾對車仔時做得好好。但我認為佢同福仔有同樣嘅問題:你要佢哋表現穩定,亦想要佢哋成為每場波嘅關鍵,但先要有穩定嘅出場時間。根本已經唔需要再去證明佢哋嘅潛質,亦唔需要證明佢哋可以交到幾多貨。」就連史高斯都話,有呢兩位新星加上盧卡古,已經係英超數一數二嘅尖刀:「你睇佢哋3個,感受下佢哋嘅速度同力量。可能盧卡古有信心危機,可能福仔都有,但正常發揮之下佢哋一季都應該要製造60至65球入球。新星都好,都打過成百場比賽,我哋唔可以再話『未來發揮成點』,佢哋依家就要交功課。」

建立信心,首先都要由摩連奴做起。季初馬迪爾同佢打大交,我哋都好驚真係會賣走佢。但到佢唔走,甚至係依家有更多上陣時間,同摩連奴有攬攬,都證明領隊已經回復對佢嘅信心,呢個絕對係重要嘅第一步!領隊嘅信任感染到球員,就係一個好嘅起步點。更好嘅消息係,《ESPN》收到風馬迪爾已經拒絕祖記同PSG嘅邀請,即將簽下一紙16萬鎊周薪嘅合約,如果佢可以穩佔曼聯一隊席位,絕對有望再上一層樓,甚至如卡斯卡連奴預言成為曼聯版嘅夏薩特!

如果喜歡我們的文章,請即分享到︰

標籤: 曼聯專區小評  馬迪爾  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→