曼聯專區小評:你哋做咩啫?我想入波呀!

曼聯專區 於 29/11/2016 發表 收藏文章
又一個無眠的晚上。又再一場贏盡優勢,不過無法全取3分的賽事。諗返起,最近已經好多場波係咁:對韋斯咸,17腳攻門8中,對手得6射2中,攻門係對手3倍;對阿仙奴12射5中,對手5射1中。對般尼一場比賽最令人心痛,成場波38腳攻門11中,對手只有7射1中,但係我哋連一腳入波都搵唔到。對史篤城呢?都有成24腳攻門9中,對手7射6中。難怪靴里拉都感慨唔知發生緊咩事:「我都唔知點講好喇。依家幸運女神完全同我哋作對,比賽得好好都無用,我哋最少值得拎多8分。我哋真係認為自己可以連勝,因為我哋比每一個對手都打出更優勝的足球。我唔知幾時先轉運,而且轉運之外我哋仲想要多一樣嘢,就係公平。公平咩?只要將我哋製造嘅機會,一半化成入波,我哋場場都羸咗4:1了。」

睇數字,可能大家會更為唔開心。直到現時為止,曼聯製造嘅機會絕對唔少,13場波有164次機會,平均一場有成12次。不過最終我哋只係入到18球,即係平均9個機會先入到一球,係英超排尾3。睇睇其他球隊,車仔一樣係13場波製造164次機會,不過佢哋入多我哋11球,每5.7個機會就入一球,係英超第2;阿仙奴仲勁,5個機會就入一球,冠絕英超。

仲有另一個數字,就係「錯失黃金機會」,好似單刀、空門呢啲必入波,即係上場拉舒福特單刀被擋出嗰種呢。睇埋呢個數字,就顯得曼聯今季唔夠運,又或者係唔夠狠:咁多場總係有20次絕好機會,最終只有30%轉化做入波,係英超包尾。曼城呢?25次絕好機會,人哋轉化咗60%做入波。單係呢個數字,我哋入球上已經比曼城少成7球。

無錯,係時候搵原因。呢20個入波入面,有接近一半,無錯,係一半,都關伊巴謙事,數埋有9球。普巴呢?都有3球,而福仔、朗尼就各有2球。其實依家伊巴已經有7個入波,如果佢浪費嘅入波機會入面佢可以入多一半,已經有11球!呢個數直情可以做埋英超射手添,因為依家阿古路同哥斯達都只入10球!

只係,我哋又可唔可以怪伊巴呢?第一,其實佢已經35歲,呢個歲數仲打緊頂級聯賽真係要好恐怖嘅身體質素先做得到,再加上咁侵略性嘅英超打法,對於伊巴嚟講絕唔係易適應。如果要怪,就要怪摩帥點解無時無刻都要依賴佢打單箭頭,而唔試下畀年輕一輩的殺手型人物好似拉舒福特、馬迪爾任前鋒。誠如史高斯所言:「佢好fit,身體質素好好,有佢喺場上係唔同啲。佢會係拉舒福特佢哋嘅好榜樣,不過去到36歲我唔認為佢可以作為曼聯的主力射手。我嗰個時代、曼聯成功嘅年代、奧雲仲當fit嘅年代,我哋年年都有3、4個世界級射手。不過一個36歲嘅球員,唔可能係球隊的主力射手。」

而另一個問題,可能連個天都解答唔到,呢個問題有請靴里拉幫我哋問埋出口:「般尼一戰,龍門係最佳球員;史篤城一戰,龍門係最佳球員;阿仙奴一戰施治係最佳,韋斯咸一戰戴倫蘭杜夫(門將)係最佳球員。我哋打得真係好盡力,有好嘅表現,打出好密集的攻勢、逼搶亦做得好,製造到機會、運球亦做得好,控制咗比賽,贏咗控球權,亦有中龍的攻門。上年人人都大叫『射門!射門!射門!』依家我哋場場都狂射門,只係入唔到波。」

灰,真係要灰一陣嘅。不過做人要向前睇,最少曼聯嘅風格比起前幾年已經大大改變,攻勢甚至比起阿仙奴仲要多,同車仔、曼城睇齊,而筆者睇波時坐唔定、大叫「哎呀」嘅次數亦大大增加。球隊可以抽秤嘅地方已經少咗好多,依家大家可以做嘅,可能就只有每場向幸運女神禱告,希望佢可以向我哋笑多幾下啦……

如果喜歡我們的文章,請即分享到︰

標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • Billy Lam
    Billy Lam 於 29/11/2016 評論 NO. 1

    依家淪為對家龍門訓練所

  • KaNok Lei
    KaNok Lei 於 29/11/2016 評論 NO. 2

    個人感覺運氣佔4成,決心唔夠佔6成

  • Chun Hung Chung
    Chun Hung Chung 於 29/11/2016 評論 NO. 3

    加油!紅魔鬼!

  • Gene Woo
    Gene Woo 於 29/11/2016 評論 NO. 4

    之前真係睇到想訓
    今年睇得比較肉緊
    當然仲有改善空間
    加油!!

  • Kenny Ho
    Kenny Ho 於 29/11/2016 評論 NO. 5

    整體表現一定好過上屆,但超欠運

  • 華少
    華少 於 29/11/2016 評論 NO. 6

    重點係連續幾場對方個龍都上晒身..有幾多隊會預咁情況..?

  • Edmond Lui
    Edmond Lui 於 29/11/2016 評論 NO. 7

    唔該progba 唔好上腳咁多。組織可以簡單啲、爽啲。

  • James Chan
    James Chan 於 29/11/2016 評論 NO. 8

    仍然是嗰幾句。第一, 用錯策略買錯人。 第二, 反擊沒有速度。 第三,成隊波冇士氣。

  • Leo Lks
    Leo Lks 於 29/11/2016 評論 NO. 9

    心理質素再好d 就ok

  • Leo Lks
    Leo Lks 於 29/11/2016 評論 NO. 10

    馬達係少有係壓力下可打出水準嘅曼聯球員

  • LI Cheuk Him
    LI Cheuk Him 於 30/11/2016 評論 NO. 11

    我都覺得係唔夠決心,心理問題大d!

  • Jeff Kwong
    Jeff Kwong 於 30/11/2016 評論 NO. 12

    能力問題

  • John Tsang
    John Tsang 於 30/11/2016 評論 NO. 13

    同咪傳球組織不夠,接到波3秒先起腳,比哂時間龍門捕哂位接實

  • Pun Chan
    Pun Chan 於 30/11/2016 評論 NO. 14

    大哥,第一時間呀,第一時間傳球,第一時間起腳射門呀,曼聯而家係冇呢啲,而家隊隊都泊大巴,你仲上腳扭來扭去,個個都美斯呀?

  • Sol Lee
    Sol Lee 於 30/11/2016 評論 NO. 15

    如果一、兩場多機會都入唔到波可以話係欠運,但場場都係咁其實係咪球員既組織同把握力真係有問題呢?

    如快攻唔係第一時間傳要控完先傳,單刀射波俾龍門封哂位先起腳等

  • Ching Tau
    Ching Tau 於 30/11/2016 評論 NO. 16

    講咁多理由但係都無講到3個字…把握力,幾多射幾中又點姐?下下9射中間,慢溜埋去又算吖?12射9中8中柱我就真係話你無運啦~

  • Fishy Leung
    Fishy Leung 於 30/11/2016 評論 NO. 17

    欠運係其中一個因素, 但已經四場都係圍攻都入唔到波, 應該要諗下係咪有D 嘢忽略咗。
    冇錯攻門係有好多, 中龍既都唔少, 埋門質素的確係有進步。話反擊慢果D, 如果有睇呢幾場其實都見到反擊係快咗。但有個問題係, 進攻點實在太少。而家進攻係冇之前咁單調, 變化係多咗, 但講到最後, 其實都係靠伊巴果點。進攻點少, 對手只要集中應付你兩三個球員已經OK, 對面龍專注於你果一兩個攻擊球員, 神救自然就多, 根本就唔駛分心驚你遠射或者後面 kum 上嚟。

  • ErikoB Sanada
    ErikoB Sanada 於 30/11/2016 評論 NO. 18

    把握力係其一..其二係比人睇左個套路路..左邊𥄫大位斬.中間彈小組.右邊又係𥄫大位斬.華西落低...重有冇其他攻勢?

  • Uncleleung Leung
    Uncleleung Leung 於 30/11/2016 評論 NO. 19

    呢D論点真白痴,你就睇下阿仙奴人地入後2球個机会你地有冇制造過出來先

  • Hehe Chung
    Hehe Chung 於 30/11/2016 評論 NO. 20

    客觀講句,前鋒唔掂都唔關摩佬事GA
    D人話俾機會後生仔MA,未單刀都唔入,無人想KA

  • Davy To
    Davy To 於 30/11/2016 評論 NO. 21

    起初又話戰神加普巴橫掃全英超………………快啲諗定下年駛多兩億先去學人爭前4啦

  • Chris Chan
    Chris Chan 於 01/12/2016 評論 NO. 22

    其實會唔會係因為多了普巴上腳太多,拖慢左個節奏呢?一旦佢唔係度,用MK反而成個攻勢流暢好多...

快捷鍵:←
快捷鍵:→