曼聯專區小評：你們好嗎？ 精選

無咗歐洲賽，曼聯已經無需要咁多球員在隊，更何況有天使、法卡奧等人加盟，少不免大開刀，而一眾離隊的球員究竟新足球生涯好唔好呢？我哋嚟望望。

韋碧克
去咗阿仙奴嘅韋碧克，主要的工作當然係要接替基奧特的攻堅工作，而佢亦真係做得非常不錯，聯賽5戰1入球1助攻，睇落好似麻麻哋，不過在歐聯的賽場佢其實表現得幾好，連中三元助阿記擊敗加拉塔沙雷，要知道呢隊土耳其的勁旅其實唔係一般對手，韋大帝在雲加手下看似可以打出更好的表現…
香川真司
佢呢？一回到蜜蜂軍團就有入波，不過其後球隊面對不少的危急關頭，香川似亦唔係幾幫到手…不過，有得上陣總好過坐冷板凳，係唔係？

里奧費迪南
QPR目前在英超20隊中失球數為全聯賽中第2多，對曼聯時已經連失4球，里奧其實唔多唔少都要負啲責任…近年來大師兄其實速度已經慢咗好多，不過因為經驗豐富，位置感非常好，都尚算穩健；不過自上年開始就連呢個優點都開始褪色…

維迪
32歲的維迪是另一位曾幾何時曼聯的最強中堅之一，佢同里奧鎮守的曼聯可謂固若金湯。而佢轉投意甲的國米之後，其實風頭都一時無倆，曾經多次攻門中柱，對對手的威脅頗大。然而可能因為未習慣意甲的球證風格，佢今季未有波入之餘仲要輸過2次12碼同領紅一次….俾啲時間佢啦！
艾夫拿
至於呢位法國後衛呢….都係算啦，祖雲達斯氣勢如虹，作為後衛艾夫拿面對的壓力其實不算太大，現階段好難評論啲咩！

小豆
喺皇馬，小豆其實無喺英超打得咁受壓，佢為皇馬攻入的兩球都無後衛力逼佢，所以先可以舒舒服服射個靚波！由佢身上，筆者就估到c朗就算真係返到曼聯都唔會多波入，因為秀才最驚兵，你斯斯文文自然可以好好發揮；對住啲暴力推撞、狠辣攔截、拳打腳踢、惡意掃蕩，點會咁易有入波！