曼徹斯特晚報:6個新兵得一個合格?

曼聯專區 於 16/01/2015 發表 收藏文章
英超賽事都已經踢過一半喇,日前《曼徹斯特晚報》就為曼聯今夏嗰6大新加盟球員表現作一個評估,當中報道認為只有白蘭特表現係可以合乎自己身價,更係超出預期,至於迪馬利亞、法卡奧、梳爾、靴里拉同盧祖等人都仲未踢出身價,依家就睇下佢點樣分析…

靴里拉(2880萬鎊)
晌莫耶斯執教時,曼聯已經想買靴里拉,最終晌今夏落實呢一單交易。呢位25歲中場季初表現的確令人眼前一亮,對QPR同李斯特城接連入波,不過最可惜都係逃唔過傷病問題。去年12月初對史篤城正選上陣之後,佢就再冇為曼聯晌英超正選上陣,只是以後備身份出場4次,暫時未睇得出靴里拉有主宰英超中場之爭嘅能力。

梳爾(3100萬)
梳爾亦都係曼聯一早睇好嘅人選,令曼聯今夏以3100萬鎊買入呢位唔到20歲嘅左後衛,不過加盟後佢作用好細,一來被腿筋同腳踝傷病困擾,而且晌雲高爾352陣式中,要踢走上走落嘅左翼鋒位置,至今感覺上佢晌呢個位置上唔係發揮得咁好,令佢連續多場都被提早換離場。

盧祖(1600萬鎊)
晌世界盃表現成名嘅盧祖,吸引曼聯今夏羅致,盧祖可以出位多個位置,包括閘衛同中堅,不過表現上未能給予球迷好穩健感覺,有時有點兒患得患失,加上盧祖亦都受到傷患困擾,晌曼徹斯特打吡戰中脫臼,12月初訓練時肌肉又受傷,到現在仍未復出。
迪馬利亞(5970萬鎊)
迪馬利亞係上季歐聯決賽最佳球員,亦令他今夏英超破紀錄轉會費5970萬英鎊加盟,佢晌頭5場比賽射入3球,包括對李斯特城一戰嘅的世界波,一切大家都認為佢係曼聯今季要打出好成績嘅救星。但最終都係因傷病問題休息,11月對候城一戰腿筋受傷,聖誕檔期賽前訓練中亦再次受傷。上週末佢晌對修咸頓戰中復出,不過俾人感覺全場浪射,被提前換離場,以「救世主」姿態加盟嘅迪馬利亞,仍需要時間俾佢重回季初狀態。

白蘭特(1400萬鎊)
白蘭特雖然11月在荷蘭隊的比賽中膝蓋韌帶受傷,令佢缺席10場比賽,不過出位防守中場嘅佢上陣比賽時好鎮定,傳波方面亦有一手,亦可出任後衛、閘衛,如果以佢1400萬英鎊身價嚟講,表現的確令人滿意,可以說是雲高爾今夏最佳收購。
法卡奧(600萬鎊租借1年)
法卡奧加盟曼聯,當然球迷們就好期待,事關呢位前鋒以前入球表現,的確令人眼前一亮,暫時本季佢身穿曼聯球衣只入了3球,但俾人感覺晌場上其實好努力,好肯走位,之不過晌佢對修咸頓一戰正選後備都無佢名字嘅時候,大家都認為佢來季加盟曼聯機會好低。
標籤: 曼聯  靴里拉  梳爾  迪馬利亞  盧祖  白蘭特  法卡奧  

留言


請按此登錄後留言。未成為會員? 立即註冊
  • RC14 於 17/01/2015 評論 NO. 1

    Tt

快捷鍵:←
快捷鍵:→