摩連奴成魔機會日增 精選

球隊成績有啲起色，雲高爾的壓力亦進一步減少，不過ESPN收到風，其實呢幾個月來摩連奴越來越得到曼聯高層的重視，而且雙方一直都有商討摩連奴成魔的可能性。呢個時間，就連摩帥自己都得到曼聯領隊呢份工越來越有信心。

令曼聯高層認為非摩帥教不可的原因，與曼城高調宣佈引入哥迪奧拿有絕對關係。眾所周之，一眾紅魔大佬都好欣賞哥帥，一直都想佢加盟，只係不得要領。如今大將轉投同城宿敵，高層們其實非常驚懼，始終球壇上經驗同實力可以與之媲美的領隊實在不多，大家有眼見雲高爾都做唔到預期的目標時，曼聯高層依家瀰漫住一種氣氛，就係只有摩帥先可以與哥帥爭一日之長短。加上摩連奴誠意十足，表現出龐大的執教興趣，實在令曼聯高層難以抗拒。
當然，呢一刻都未簽表示高層都仲未有一致的決定，原因係人選上其實仲有2個可以揀。傑斯仍然係深得佢哋信任，不過你話用佢咩？當年莫耶斯已經令唔少人怕怕，長遠而言要傑斯上位唔係唔得，不過呢一刻以傑斯的經驗同人脈，高層唔太放心畀佢揸骰住。而另一個人選係熱刺嘅普捷天奴，因為用唔多資金打出水準，而且陣中氣氛好好、球員們都對佢好尊重好信任，令曼聯高層都流口水架。不過數數人數，傾向摩帥嚟一振曼聯雄風的高層佔多數，所以與摩連奴的商討仍然進行中，機會亦一啲都唔細。

至於雲高爾，其實佢都好慘，依家個個都睇死佢走咁…不過咁睇啦，佢自己都唔想做衰自己個名，如果今季曼聯可以拎到歐聯入場卷，甚至係一個唔覺意拎到歐霸冠軍，都叫做係一個急流勇退的好時機；所以好多知情人士都話佢今夏離開奧脫福的機會其實好大。加上高層都唔會做好多挽留，因為計過度過，依家人腳其實唔足以挑戰英超冠軍，要買人就要有好領隊先得，雲帥唔走都好都只係教多一年，對於球員的吸引力其實麻麻，要換帥呢個夏天就真係要做喇。