大鑊!無鋒曼點鬥車?

曼聯專區 於 13/03/2017 發表 收藏文章
今晚就係足總盃8強曼聯大戰車路士的比賽,呢隊車仔同摩連奴仇口原本就已經重,逼宮逼走摩帥之餘,仲有好幾個球員同佢爆出不和,仇人見面份外眼紅唔係講笑,今晚車仔一定搏哂命誓要再一次羞辱曼聯。原本曼聯都仲可以同車仔一較高下,點知先有伊巴要停賽,再嚟就係軍中接二連三傳出壞消息,甚至去到無鋒可用的最差情況!

事緣比賽前消息指,曼聯方面有朗尼、馬迪爾因傷無緣鬥車,再嚟就係拉舒福特病埋,通通都無隨隊去到倫敦,咁即係一個正前鋒都無!而ESPN就大膽假設,今仗曼聯會大膽起用費蘭尼作前鋒以求高空炸車,配以馬達或是米希達利恩支援。

今季曼聯攻擊球員當中,最最出色的當然係伊巴,不過除咗佢之外真係好難數仲有邊個。拉舒福特、馬迪爾同連加特幾個年青人雖然都有表現,不過絕對稱唔上係曼聯的得分人物;朗尼就更加係漸走下坡。而出乎意料無同摩佬打大交嘅馬達,已經成為其中一個曼聯的重要人物,不過與其講攻擊,佢反而著重喺傳送同埋駁腳方面,始終要佢大打突破戰真係有難度,佢唔係可以做到個人突破嘅速度型球員。所以,今仗筆者睇好嘅關鍵人物係米希達利恩喇。

睇數字的話,就知道佢在陣的話曼聯就安全少少,近7場有佢嘅比賽入面,曼聯7戰6勝1和,而且4個入波2次助攻,係曼聯攻擊核心之一,既然無咗入球王伊巴在陣,就要依靠米希達利恩數糊。不過要曼聯今仗擊敗對手的話,真係要球員有火同有心先可以,因為人腳上真係同車仔差好遠,讓哂前鋒畀人之餘,干地亦一早預示咗會「full team」上陣,以最強陣容痛擊曼聯,精神上想打沉曼聯、人腳上又比曼聯好,今仗絕對係苦戰!所以我哋仲唔集氣仲等幾時?咩都唔夠人嚟的情況下都可以踢車仔出局,呢個先係真真正正幫摩帥出一口烏氣!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Hoff Chang
    Hoff Chang 於 13/03/2017 評論 NO. 1

    雖然踢到車仔出局係好事,但係四線作戰疲態全現,加上後面賽程凶狠,要打歐霸爭歐聯,所以出局都唔係唔好

  • OhMyGirl_Arin
    OhMyGirl_Arin 於 13/03/2017 評論 NO. 2

    搵費蘭尼拍迪基亞 打雙前鋒囉 配合曼聯嘅9981斬 實大炒車仔

  • kinfung
    kinfung 於 13/03/2017 評論 NO. 3

    希望車仔打爆獌聯

  • rickytct
    rickytct 於 14/03/2017 評論 NO. 4

    坦白講,呢場波贏其實唔單止係為個盃,更重要係隊波既士氣,近黎士氣真係差d,如果作客車仔都贏到,隊波既面貌應該會更加好

  • Jose 123
    Jose 123 於 14/03/2017 評論 NO. 5

    郎尼仲收緊錢 梗係佢啦 況且輸左有得入佢數 贏波又有入球的話又可以發揮串王本色

  • @michael@
    @michael@ 於 14/03/2017 評論 NO. 6

    費sir當年帶幼齒加無鋒都打到阿妓八個二啦,摩佬功力同費sir不相伯仲,今場有得摶搥,我會選擇排人米仔加馬達最前普巴墮後一格,小豬卡神靴里拉,後衛照舊。有得搏,人地勢強時馬達可再墮後,變打單前。如出費蘭尼只限高波,車仔一樣唔輸蝕,一個唔好彩紅埋就pk。小豬卡神控制節奏一流,和左都有so

快捷鍵:←
快捷鍵:→