堅尼：我唔驚爵爺 精選

曾幾何時有珠寶公司做過一個調查，想搵出英國人心目中「最恐怖外父」嘅人選，好不幸爵爺成為冠軍，要同佢個女拍拖真係要有中世紀騎士嘅勇氣先搞得掂…不過面對咁恐怖的人，都有人會表示自己唔驚嘅！而呢個人，本身亦都係「恐懼」嘅代名詞，佢就係火爆程度不下於爵爺嘅鐵漢堅尼。

堅尼同爵爺的恩恩怨怨大家都不會陌生，而佢喺電視上面批評自己隊友，就成為了爵爺於2005年賣佢走的導火線。不過佢走咗之後，曼聯中場線嘅強度就一直下降…而佢就談到自己同爵爺的關係：「好多人都好驚佢。你唔可以逆佢意，如果唔係就唔駛旨意再同佢講說話。感謝神，我無呢個問題，點解大家要俾佢得逞先？個個人都驚佢驚到死，就連好多領隊都係，對佢卑躬屈膝。在我為曼聯比賽的時候，每天都要表現出最強，不能示弱，恐懼在過去、現在都在。不過不要誤解我，我唔係對住佢日日喺到震嘅人。」
堅尼仲話，爵爺樹敵的不止佢自己一個：「好多對曼聯有貢獻的球員，費格遜都要去批評。佢幾百萬幾百萬鎊入袋、有名有利，連看台都有佢個名，不過最後佢返嚟批評為佢帶來榮耀的人。我講過，佢咁做對我無影響，不過你要知道，佢批評為佢打天下嘅人係好荒謬的事。我會唔會原諒佢？我唔知。聽住，係我唔知。睇下我哋嘅平行線會唔會再次交集啦，我估我哋會嘅。」最後，堅尼仲話有一班忠心的傳媒人會為爵爺護航，佢遠在一英里之外已經可以感覺呢班人嘅存在。不過呢班人，再加上唔同嘅前曼聯球員，好多都係大話精，講好多說話都係假嘅，所以佢要成日出嚟澄清咁話。

筆者對於呢一番說話真係唔知信好唔信好，如果真係要講，筆者真係幾懷念有堅尼在陣的曼聯就真…在中場指揮官呢個位置上，當今世上要搵個咁火爆得嚟又有感染力嘅人真係好艱難，佢個人嘅風評係點都唔會影響佢喺曼聯嘅歷史。發生過嘅就係發生過，後人點評價，就唔到大家話事啦！