名宿有嘢講:加利仔傑斯仔歸結問題為「唔穩定」!

曼聯專區 於 27/11/2018 發表 收藏文章
我哋睇波同曼聯名宿睇波當然有唔同,你估下92班點睇依家嘅曼聯?其實傑斯同加利仔都表達咗自己一套意見,不約而同的將問題歸於一個字:「inconsistent」,唔夠穩定。

加利仔講得好仔細:「曼聯依家好唔穩定,唔單止每場比賽之間水準好唔同,同一場比賽入面都可以好唔穩定,上下半場表現大不同。球會投資咗咁多資源,所以摩連奴係需要挑戰冠軍而唔係保前四。但呢一刻球隊真係同目標差好遠,唔穩定係主因。佢哋可以作客車仔差啲贏埋,但亦可以對狼隊、水晶宮狼狽不已。我認為摩連奴依家好迷惘,最穩定嘅陣容係點都唔太清楚。」

傑斯都一樣,認為穩定性係關鍵:「榜前列嘅曼城、利物浦表現好穩定。如果相比上來你自己唔穩定,差距一定越來越大。睇到宿敵行得咁遠當然好難接受,不過依家仲有13場比賽剩,係時候收復失地。讓我們慢慢來:先盡力做到7至8場不敗先,一小步一小步重建信心。」不過呢一點都唔易,悶和水晶宮先係今季主場第一場無失波嘅比賽,要求不敗都唔係容易……

然而傑斯對於摩連奴仍然抱有信心,認為炒佢無補於事:「我唔認為依家換領隊可以幫到球隊。人人都知成功嘅領隊需要時間去調整隊波,我認為依家曼聯有多年來缺乏嘅安定感。所以我哋要信任摩連奴。當然成績都要有改善,佢哋會做到嘅。」

但筆者對傑斯呢一個諗法唔太認同,摩連奴從來未試過教一隊波超過3年,佢嘅成功都係「速食」。君不見佢13年第二次「上車」,15年球季初段車仔大跌watt,聯賽16場比賽只得15分?換一換領隊雖然幫唔到球隊重回歐戰戰場,但最少餘下比賽執返35分,以50分第10名完成球季,保住少少面子。如今曼聯又嚟一次大跌watt,應該點做先係最好呢?

如果喜歡我們的文章,請即分享到︰

標籤: 加利仔  傑斯  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→