各路名宿談曼聯首戰

曼聯專區 於 15/08/2017 發表 收藏文章
球季第一場比賽當然唔代表一切啦,不過曼聯第一場比賽亮眼,球隊展現唔少潛力,好多球壇名宿都睇好曼聯今季嘅發展。始終一個人話你勁未必係勁,如果個個都咁講,你應該差極都有個譜!

首先係阿仙奴名宿亨利,作為前鋒佢當然比較留意盧卡古同埋福仔:「盧卡古差啲戴帽,我哋預期佢有波入佢都做到,雖然有啲啲小瑕疵,不過佢嘅曼聯首戰仍然亮眼。我諗佢要改善嘅係控球,佢要好好努力,因為成場比賽佢失控球權達18次,真係多咗少少。除咗佢福仔都打咗場好出色的比賽。如加利仔所言,佢哋有速度、有身型,而且入球效率出色,呢啲都係上季欠缺嘅。盧卡古出色、馬迪無得彈,福仔成場比賽都帶嚟威脅。就連馬迪爾都有上季欠缺嘅渴求,佢一出場已經正面推波挑戰薩巴列特。今季曼聯有強大火力,亦有馬迪主導中場,佢哋將會表現得非常出色。」

咁加利仔講過咩呢?佢話,今次真係多謝車仔:「我呢刻仲未相信車路士竟然肯放馬迪離開。呢個決定唔科學,今場比賽馬迪表現超班,各方面都好出色。我哋睇佢踢波好多年,不過我從未見過佢用波用得好似今場咁好。佢好冷靜,傳波都好準繩。英超冠軍應該配備力量、速度,而且隊中要有好強的骨幹成員。你睇下今日嘅曼聯,佢哋好似已經有齊呢幾樣嘢。只係第一日比賽,佢哋已經表現出奪冠嘅質素,甚至已經有贏得一切嘅風範。」

利物浦名宿桑拿士都大大睇好今季曼聯:「無受過足球訓練嘅人未必睇到哂馬迪呢個位置對球隊有幾重要,不過我認為今仗大家都好清楚見到佢表現有幾全面。無論係助攻定係控球,佢都好出色。你睇睇曼聯,佢哋有好穩健嘅龍門,後衛好硬淨好有力量,而且成隊波都高大,更有福仔、馬迪爾等等年輕球員,而米希達利恩甚至根本未發揮真正實力。仲有連格特呢?佢哋有好多好球員,可以打好多唔同風格嘅戰術。」

可以得到阿仙奴、利物浦同埋曼聯名宿嘅加持,可見曼聯今仗勝仗係有說服力,依家硬件就有喇,就睇大家點樣磨合同埋加強默契、戰術效果喇!

如果喜歡我們的文章,請即分享到︰

標籤: 桑拿士  亨利  加利仔  

留言

會員
我要評論
請按此登錄後留言。未成為會員? 立即註冊
  • tinchi3721
    tinchi3721 於 15/08/2017 評論 NO. 1

    冷靜d先打左1場波就吹到英超冠軍 如果超級盃贏左皇馬咪吹到歐聯冠軍?英超想知邊隊係冠軍過左聖誕快車期先啦如果以季初1-2場既表現定奪既話阿仙奴咪🙊

  • Yong Yuhan
    Yong Yuhan 於 15/08/2017 評論 NO. 2

    咪就系,我系曼迷都睇唔过眼

  • ChelseaHarry
    ChelseaHarry 於 15/08/2017 評論 NO. 3

    都唔車仔點解要放Matic走,而家冇人踢中場,作為車迷既我真係好傷心😭😭

快捷鍵:←
快捷鍵:→