加利仔談「閘位進化史」

曼聯專區 於 03/05/2019 發表 收藏文章
足球世界變完又變,筆者印象中三冠王曼聯嘅強大,同依家曼城嘅霸氣都幾唔同。唔止球員嘅氣牆唔同,就連比賽嘅發展、節奏,同埋準備功夫都好唔同,中下游球隊依家引入更科學化、更有效率嘅訓練方式同埋戰術;同樣頂級球隊嘅足球哲學、文化都一直進化緊。只不過筆者再講幾多,都唔會夠局內人親身說法咁有說服力。而今次赤裸裸展現出足球世界改變嘅,係加利仔。

咩都唔好講,佢一句總結已經夠晒力量要你追睇落去:「今時唔同往日,依家打閘難過20年前超級多!」除咗球員嘅速度、體能已經今非昔比之外,最重要係「慣性」都已經好唔同:「我慣咗442陣式入面,總有位中場打翼嘅隊友會比你更貼近邊線,等你交波俾佢再斬入禁區。自己隊如是,對手亦如是,好似翼鋒韋確斯(大部分時間效力布力般)、洗佳亞(曾效力韋斯咸、曼城)都習慣在邊線推進,然後沉底斬波。」

世界幾時開始轉變?其實加利仔都曾經感覺到,只係「入局未深」:「我對拜仁時見到佢哋嘅左右閘走入中間,開始有疑問:搞咩?我從未見過咁嘅比賽方式!」雖然加利仔都見識過己隊嘅轉變,喺史譚、朗尼莊臣等等歐洲球員加入之後,因為佢哋機動又靈活,打得好生,閘位多咗壓前嘅機會,但從未有過如拜仁咁機動嘅防線。換句話講,舊式90年代嘅足球就係打位,中堅就係打死中堅位,閘就係打閘。左右閘即使上前助攻,去到中場附近已經有翼位球員接手,閘位球員最多都只係駁下腳,做下疊瓦。但現今世代嘅閘,已經唔係單純嘅守將,佢哋甚至係攻擊球員!數字唔呃人,紅軍嘅阿歷山大阿諾特同安德魯羅拔臣兩閘今季已經貢獻20個助攻,比起三冠王時代碧咸同史高斯嘅18個助攻仲多!

所以現世代打閘係好鬼辛苦,防守、進攻兼顧,仲要練好出波斬波、突破同扭波,要求好全面。咁亦都解釋到近年來打3後衛、雙防中嘅戰術點解咁盛行,因為兩閘推咗上前,自然要有多個後衛塞番啲位;而防中亦可以為中堅提供更多掩護、支援,甚至化身幽靈中堅。

好喇講咁耐,當然要回到重點:曼聯兩閘出咗咩問題?加利仔嘅答案係,佢都唔知!講起楊格、華倫西亞,加利仔認為佢哋本質上唔係打閘,所以唔可以怪佢哋,不過筆者就認為正正因為2人打翼出身,先夠腳法、速度去勝任新世代閘位一職。唯一問題係,佢哋年紀漸大,體力同腳法又未臻頂級,往往俾人力不從心嘅感覺。所以買左右閘,似乎係蘇B今夏一定要處理嘅問題之一。

加利仔認為,過去幾年曼聯買咗好幾個左右閘,個個都用唔夠2000萬鎊,試完又試都無好出色嘅收購,係時候大刀闊斧,用4000萬、5000萬買一個可以用好幾年嘅閘,專心打起一、兩個最重要。其實呢步曼聯都做緊,梳爾已經係呢個方向之下嘅一大收購,而效果其實都唔錯,係火候同穩定性只要再加強啲,曼聯未來幾年係「左閘無憂」嘅。但右閘呢?預期依家多打右路嘅楊格,其重要性一定會慢慢減弱,甚至要放售;華倫西亞亦一早預告咗會走。曼聯要搵一個又快、又夠氣、又攻守兼備嘅新世代右閘,市場上有咩選擇呢?


如果喜歡我們的文章,請即分享到︰

標籤: 加利仔  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→