10年人事幾翻新 .. 曼城對屈福特 2006年 人腳今日去向

我城藍月曼漫談 於 03/01/2018 發表 收藏文章
上次屈福特響曼城主場爭到1分就係2006年12月嘅事,當年同今日兩隊都人面全非,我地又睇下當年曼城人腳今日去向


龍門:韋化,當年嘅呢位曼城傳奇,當季偶有上陣機會,可謂守得雲開,而家已掛靴,間中參與曼城活動,出任嘉賓。

後防:

迪斯甸,當年嘅曼城必然正選中堅,最後效力嘅係般尼茅夫,舊年完約至今一直未有班落。


鄧尼,當年曼城隊長,38歲嘅佢,響2015年正式宣布退役,現於法國定居,不時出席曼城名宿活動同講波。

李察士,曼城青訓產品,以當年來講亦係屬於較多上陣機會嘅小將,可惜早熟早殘,經歷多次傷患後,已不復當年勇,現效力維拉。


查比爾,突尼西亞國腳,現已退役,諷刺嘅係曼城 曾經以低價簽佢,而家嘅佢就間中亮相講波。


戴卓爾,前威爾斯國腳,2007年6月離開曼城後輾轉效力過查爾頓及葉士域城,2010年掛靴後,鮮有公開露面,行蹤低調。


祖爾巴頓,同樣由曼城青訓出身嘅佢,球員生涯基本上都離唔開攪事 .. 上季就被踢爆參與賭波,被足總罰停賽18個月,而家仲停緊。

雷拿,當年其中一位防中正選,今日就成為紐約城嘅球會總監,負責買賣球員。


森馬拉斯,希臘國腳,當年投城曾經名噪一時,就係一時, 結果蘇超才是佢天堂,近年狀態大不如前,現效力土甲球會:Samsunspor FK
科拉迪,前意大衛國腳,佢最光輝日子都係響意甲,曼城日子傷多過踢,2010年掛靴後就主力演藝界發展,曾經主持真人ShowSelfie – Le cose cambiano


華素爾,前英格蘭國腳,近年活躍於社交網站,於去年初出過一本自傳,16年初已宣布退役,間中踢下衛生波過下波癮亦有客串曼城球迷活動。
標籤: 曼城  屈福特  

留言


請按此登錄後留言。未成為會員? 立即註冊
  • Ivanb 於 04/01/2018 評論 NO. 1

    胡禮菲臘斯,前鋒高達

快捷鍵:←
快捷鍵:→