細數兩軍舊將：兩個二號門神的故事 (拿殊，基雲) 精選

曼城VS史篤城


講起效力兩軍球員，自不然會諗起倒戈嘅艾利蘭，不過今日就無打算講佢，無獨有偶曾經效力兩城嘅仲有兩位門神：拿殊及基雲，前者一度兩城正選，亦係兩隊升班功臣，但無緣亮相英超，後者縱橫英超多年，晚年在史篤城擔任後備。



拿殊出身自曼聯青訓，職業生涯亦係屬於輸在起跑線嘅一群，曾經離開球圈，回歸球圈後，只有響一D次級聯賽隊伍搵食，不過就係因為效力史托克港城有過唔錯嘅表現，吸引曼城以十萬鎊收購，當時曼城仍然響英甲打滾，論名氣佢當然唔及當時正選嘅韋化，以及後來02/03球季加盟嘅舒米高，不過佢響曼城嘅日子其實都有唔少上陣機會，亦代替過舒米高把關，但始終把關技術同心理質素影響，離開曼城先後效力過當時響當季英超嘅米杜士堡，韋根，愛華頓，諾域治等球會。張cv係勁嘅 … 不過角色都係第二或三門將，幾乎只有無關痛癢嘅表演賽或盃賽亮下相，佢嘅舞台亦只限於英冠球會：普雷斯頓，同英冠時期嘅史篤城，職業生涯大部分時間都係冷板凳上同練習場上渡過。



相對來講，基雲就截然不同，曾經係英超一線門將，成名於紐卡素，既係黑白兵團嘅傳奇之一，亦曾經係愛爾蘭國家隊冧把溫及隊長，風頭一時無兩，2009年1月加盟曼城，成功搶走當時正選嘅祖赫特一號門神位置，不過亦係佢職業生涯另一個轉捩點，2009/10年季中對阿仙奴嘅比賽中不幸肩胛骨折，從此令佢無法再坐上曼城正選龍門位置，只有亮相於本土盃賽，擔任祖赫特後備，輾轉去過阿士東維拉，亦因為年紀及狀態影響由正選退為副選，加盟史篤城時候嘅佢，已經差唔多年屆40，甘願成為年輕龍門嘅大師兄，響正選畢蘭受傷期間，偶爾上陣頂更，不過身手就大不如前。


退役後嘅拿殊先後因為醉駕同虐妻案件而攪到差啲坐監，事業家庭化整為零下，而家係奧咸嘅龍門教練; 基雲自六月完約後，暫時就未有班落，間中講下波寫下專欄，據稱都有英冠球會想搵佢出山嘅。