曼城11月之星:迪哥夫

我城藍月曼漫談 於 31/10/2017 發表 收藏文章
踏入11月1日,今日除咗出糧之外你會諗起邊個?? 我就諗起曼城傳奇前鋒:迪哥夫,今個星期日參加咗官方攪嘅活動,仲有機會見到佢 .. 真係諗起都興奮!

迪哥夫對唔少新一代嘅城迷來講係會陌生,因為呢位前蘇格蘭國腳當紅日子要數到九十年代中後期,出世未呢? 應該有好多千禧後城迷都未聽過佢大名 ..  呢位阿叔而家就係曼城球會大使之一,即會代表曼城去世界各地出席唔同嘅活動同宣傳之類 “我又飛啦!”應該周不時出自佢把口。


出身自阿仙奴青訓,但響母會又無乜太多上陣機會,僅僅係球會後備或者做盃賽球員,初出道都係外借同外借咁(盧敦,白禮頓)不過都係無乜表現機會,但勢估唔到1996年以近一百萬鎊(相等而家一千七百幾萬鎊)加盟曼城,展開佢成為名宿之路,不過當年嘅曼城輸波多過食飯,而且已經降至英甲(現:英冠) 不過佢當時表現亦唔算搶鏡,因為時任領隊俾嘅機會都唔算多,只係輪換其中一員,最諷刺嘅係97/98球季,因為多位前鋒受傷,佢叫做得到較多上陣機會同成為神射手,不過個季曼城降班收場,再降落乙組(現:英甲),唔少球員對事業有野心嘅球員就會選擇離開,迪哥夫就堅持留低,98/99球季同葛達組成黑白雙煞,著上9號做支援,都射入15球,最重要嘅一球,相信有唔少香港城迷都唔知:99年5月底升班附加賽對基靈咸一役致勝入班入球就出自佢,亦令佢成為所有城迷嘅寵兒,有城迷至今仍然講:無迪哥夫無今日嘅曼城。

99/00 球季迪哥夫就先後因為受傷而缺陣咗一段時間,正選席位間接讓咗俾其他球員,不過都有份協助曼城衝超,但成功衝超反而埋下佢離隊伏線,都係老問題無正選無機會,因為曼城簽入兩位國腳級嘅前鋒雲祖柏(哥斯大黎加)韋亞(蟬聯幾屆非洲足球先生) 雖然佢都升呢做國腳,但始終實力爭幾班,不過該季曼城都只係升降機,所一季就回歸英甲,02年1月迪哥夫亦選擇同大家講Bye Bye 轉投李斯特城。


故事就未完嘅,06/07球季迪哥夫就由當年仍然響英超打滾嘅布力般流浪重投娘家,但都唔知係行衰運定犯太歲,該季佢又因為背傷同舊患膝傷而斷斷續續缺陣咗一段頗長時間,該季亦係佢職業生涯當中首嚐無波入嘅一季,雖然響曼城地位超然,但無表現就難免被淘汰,07/08球季佢只有一場盃亮相,之後離開先後轉投水晶宮同李斯特城,結束咗佢響曼城嘅球員生涯; 不過雖然唔再係曼城球員,名宿呢個身份就係一世,退役後嘅佢就不時獲邀返來曼城出席球迷活動,商業活動之類,今個星期佢又飛啦 … 來深圳同中國城迷見面。
loading

迪哥夫原定出席17年的香港7人足球賽,但因出席曼城在侯斯敦的賽前宣傳活動而缺席。

如果喜歡我們的文章,請即分享到︰

標籤: 迪哥夫  曼城  

留言


請按此登錄後留言。未成為會員? 立即註冊
    快捷鍵:←
    快捷鍵:→