巴城會之哥迪奧拿的巴塞倒戈戰 - 曼城編 精選

巴城會之哥迪奧拿嘅巴塞倒戈戰 - 曼城篇

相信唔駛講都知，以前巴塞對曼城嘅幾場歐聯賽事，曼城可以講係送分俾巴塞嘅「歐聯私家雞」。今季簽哥迪奧拿做領隊，球會高層多少希望曼城踢得出巴塞嘅tiki-taka。人算不如天算，今季歐聯抽籤，曼城再次抽中同巴塞同組，而哥迪奧拿3年前於拜仁慕尼黑領軍時亦曾敗於巴塞而四強出局。雖然球員有足夠經驗面對巴塞，但面對一個屢次擊敗自己嘅對手，加上最近3場正式賽事未能得勝，心理質素肯定會受影響。哥迪奧拿能否解決球員心理壓力就成為對巴塞最重要嘅一環。
哥迪奧拿對巴塞一戰，相信必定依靠迪布尼及施華呢兩位甚有默契嘅中場。早喺開季初段，佢地就為球隊帶出相當凌厲嘅攻勢，令對方中後場面對兩人時往往力有不逮，因而成為球隊獲勝嘅最大得分來源。

至於後防只能依靠奧達文迪及新援史東斯呢兩位中堅。雖然甘賓尼對愛華頓一場中後備入替，但上陣時間太短，未能確定甘賓尼能否適合正選上陣，因此亦只能由奧達文迪及史東斯兩人拍檔。而左右閘人選方面，由於沙格拿仍然傷出，右閘唯一人選只有薩巴列達。左閘方面高拉洛夫及基治兩人實力相差不大，因此選擇遠射能力佳嘅高拉洛夫亦無不可。

前鋒線無疑問沿用洛列圖擔任左翼鋒、史達寧擔任右翼、正前鋒阿古路呢個組合。阿古路於國家隊賽事中未有突出表現，亦同時影響他在球會中嘅表現，佢竟然與迪布尼一齊射失對愛華頓嘅12碼，各自錯失得分機會。史達寧喺開季時有如神助，入球助攻停不了，直到敗於熱刺為止。由於哥迪奧拿相當重視史達寧，佢可以係突破巴塞後防嘅希望。今季加盟嘅洛列圖雖然未有令人眼前一亮嘅表現，然而配搭施華嘅洛列圖在左路時亦能給予對方一定壓力。可惜佢初到貴境，唔熟習英超球證執法尺度，響對般尼茅夫一役中領紅離場，希望完成停賽嘅洛列圖能夠繼續交出表現。
龍門當然只有今季從巴塞轉投嘅巴禾，巴禾加盟曼城主因實為哥迪奧拿嘅控傳戰術。但係佢喺英超嘅守門表現未算合格，開季至今(包括歐洲賽事)僅得4場有零失球，因此對巴塞隆拿能否守得住MSN實令人擔心。

預測陣容4-3-3：龍門：巴禾，後防：薩巴列達、奧達文迪、史東斯、高拉洛夫，中場：施華、費蘭甸奴、迪布尼，前鋒：史達寧、阿古路、洛列圖
後備席：卡巴尼路、基治、甘賓尼、根度簡、拿華斯、辛尼、伊拿祖。