【解構】次級雞肋？歐洲足協正式公布2021年舉辦第3級盃賽 精選

歐洲足協於星期二舉行會議，會上通過多項決議，包括落實未來三屆歐聯決賽場地、宣布歐洲國家聯賽改制，以及公布第3級別歐洲球會賽事。2018年底，已有消息指出歐洲足協將會推出喺歐聯 (Champions League) 、歐霸 (Europa League) 之下嘅全新第3級別球會賽事，到底呢項賽事係咩玩法？


根據《BBC》於2018年12月報導，歐洲足協有意設立一項暫名為 'Europa League 2" 嘅賽事，顧名思義係大約等於次級嘅歐霸。2019年9月24日，歐洲足協公布將會於2021年開辦全新賽事，名為 "UEFA Europa Conference League" (「歐霸聯」)，比賽時段及賽制與歐霸相同。

現時歐霸分組賽共有48支球隊參加，加上淘汰賽階段有8支歐聯分組賽第三名加入，頻密賽程加上獎金不夠吸引，唯一吸引之處係歐霸冠軍可以直入歐聯分組賽，令歐霸成為不少主流聯賽中上游分子策略性放棄嘅「雞肋」。


歐洲足協2018年公布2021-2024三年計畫時表示，設立歐洲「第三盃」意念其中一個需要處理嘅問題，就係將歐霸正賽的參賽隊伍縮減，平衡三個盃賽分組賽至各32支球隊 (現時歐霸分組賽共有64支球隊參加) ，以及提高歐霸可觀程度。

「第三盃」設立，除咗吸納部分原本參加歐霸嘅球隊之外，亦同歐聯、歐霸一樣，有不同階段外圍賽，因此必定令到更多原本冇機會角逐歐洲賽嘅球隊，可以一嘗歐賽滋味。另外，一啲喺歐霸不同階段出局嘅球隊，亦會好似歐聯同歐霸嘅關係咁，跌落「歐霸聯」參賽，「歐霸聯」 冠軍可以獲得下季歐霸分組賽資格。

重點如下：

• 「歐霸聯」將會複製歐聯及歐霸賽制，由32支球隊參加分組賽
• 參賽隊伍分為8組、每組4隊，分組賽後設16強、8強、4強及決賽
• 16強淘汰賽前增設一圈附加賽，由「歐霸聯」小組次名，對歐霸小組第三，勝方進入16強
• 新賽事與歐霸一樣共分15周賽事、共舉行141場比賽
• 「歐霸聯」冠軍直接晉身翌季歐霸分組賽
• 比賽於歐洲時間星期四進行，部分比賽與歐霸時間重疊
• 三個盃賽決賽將於同一周內舉行，周三為「歐霸聯」決賽、周四歐霸決賽、周六歐聯決賽 (歐洲時間)

2021年「歐霸聯」，歐戰系數第1-5位國家 (此刻為西班牙、英格蘭、德國、意大利、法國) 可各自獲得一個「歐霸聯」附加賽 (play-off) 席位，第6-15位國家各自獲得2個席位由第三圈外圍賽打起，如此類推。可以見到，一啲歐戰系數排名較低 (16-55位) 嘅國家，原本只有聯賽冠軍1支球隊角逐歐洲賽，參加較早階段歐聯外圍賽，設立「歐霸聯」後將會額外獲得2-3個歐戰名額。同時，由於歐戰系數排名較高嘅聯賽如西甲、英超等五大聯賽內部競爭激烈，可以預期佢哋打入「歐霸聯」嘅中上游球隊好大機會寧可專心本土聯賽，結果俾到好大機會其他二三線聯賽球隊喺「歐霸聯」 大展拳腳，畢竟冠軍可以直入歐霸分組賽，獎金、關注度、歐戰經驗，對呢啲球隊仍有一定吸引力。不過另一方面，由於球隊有機會從歐霸跌落「歐霸聯」，部分球隊想策略性放棄歐戰又要多花一重功夫。


附錄：「歐霸聯」晉級之路

註：此為歐洲足協預設「歐霸聯」席位分配，實際上可有出入，例如英格蘭將其最低排名歐戰席位分配予第二項本土盃賽冠軍

第一圈 72隊

• 26隊本土盃賽冠軍 (歐賽系數30-55位) [如羅馬尼亞 (30)、斯洛伐克 (32) 、聖馬力諾 (55)等*]
• 24隊本土聯賽亞軍 (歐賽系數30-54位，列支敦士登除外)
• 22隊本土聯賽季軍 (歐賽系數29-51位，列支敦士登除外)

*例子僅以現時2020系數排名 () 為參考，不代表新賽事開始時的歐戰系數，下同

第二圈 110隊

非冠軍組

• 36隊上圈勝方

+

• 1隊本土聯賽第5名 (歐賽系數第6位) [俄羅斯]
• 9隊本土聯賽殿軍 (歐賽系數第7-15位) [如葡萄牙 (7) 、比利時 (8)、希臘 (15)等]
• 16隊本土聯賽季軍 (歐賽系數第13-28位)
• 14隊本土盃賽冠軍 (歐賽系數第16-29位) [如克羅地亞 (17)、塞爾維亞 (18) 等]
• 14隊本土聯賽亞軍 (歐賽系數第16-29位)

冠軍組

• 20隊歐聯預賽及外圍賽第一圈敗方

第三圈 62隊
非冠軍組

• 45隊非冠軍組上圈勝方

+

• 6隊本土聯賽季軍 (歐賽系數第7-12位)
• 1隊本土聯賽殿軍 (歐賽系數第6位) [俄羅斯]

冠軍組

• 10隊冠軍組上圈勝方

附加賽 44隊

非冠軍組

• 26隊非冠軍組上圈勝方

+

• 3隊歐霸外圍賽第三圈敗方

+

• 4隊本土聯賽第6名 (歐賽系數第1-4位) [西班牙、英格蘭、意大利、德國]
• 1隊本土聯賽第5名 (歐賽系數第5位) [法國]

冠軍組

• 5隊冠軍組上圈勝方

+

• 5隊歐聯外圍賽第三圈敗方

分組賽 32隊

• 5隊冠軍組上圈勝方
• 17隊非冠軍組上圈勝方

+

• 10隊歐霸附加賽敗方

淘汰賽預賽 16隊

• 8隊小組次名
• 8隊歐霸小組第三名

16強

• 8隊小組首名
• 8隊淘汰賽預賽勝方

Source: BBC、Wikipedia、UEFA