季後感言 - 熱刺

踢完對FC悉尼嘅比賽之後就正式完季啦，今年最後都上返第五名真係不過不失啦，今年又唔少令人振奮嘅地方，但同時都有好多要改善嘅空間，等我響度9up 下啦。
- 年輕球員
今年最令人興奮就係有一班年輕球員彈左出黎，前領隊舒活同一眾前教練可謂功不可抹，而普帥對佢地嘅信任亦令佢地愈來愈有自信。賓特納同路斯都係我今年最欣賞嘅球員，前契仔賓特納打完非洲杯之後，同上季比好似變左另外一個人咁，響中場無論防守同控制節奏都比上季進步左好多，雖然有時候都有唔穩定嘅表現，唔好忘記佢今年只係廿歲，仲有大把進步空間，所以千祈唔好比佢走！而路斯今年真係我心目中英超最佳左閘，有佢嘅比賽同無佢嘅比賽真係分別好大，成條左路好似佢控制哂咁，不過同時佢上左去亦有時返唔切黎防守，所以佢同防中們嘅默契將會十分重要。
年輕球員無得唔講簡尼啦，今年佢真係著哂火，好耐無見過球隊有一個咁穩定嘅前鋒，問題係，出年佢一定係列強重點防守嘅對象，唔會再有人好似季初咁睇少佢，所以買多個前鋒幫佢真係刻不容緩。

最後馬臣同唐辛兩個，當然無上面三個咁突出，但係都不過不失啦。普仔真係比新契仔馬臣好多機會，但係佢仲未顯示倒果一種級數比大家睇，而且仲有唔少失誤，不過大家唔好忘記佢只係第一季打英超，賓特納同簡尼都話比我地聽兩季間嘅分別可以好多，只要佢仍然保持住柏加式拼命三朗打法我對佢仲存有希望的。反之，唐辛就真係比較令人失望，比其他人早出道嘅佢，幾年來進步真係唔大，而且打法單調，好難可以比佢打倒正選，不過如果佢肯繼續坐後備都算係一個唔錯嘅板凳力量嘅。

- 戰術單調+臨場應變差勁今年球隊戰術極之單調，令到對手好容易防守，特別係當對弱隊嘅時候，成日都久攻不下，就係因為戰術單調引致。

球隊今年嘅進攻套路主要有幾款，1) 兩閘瘋狂爆上傳中。獲加同路斯都係進攻能力好強嘅球員，今年好多時都係靠佢地爆上黎製造攻勢，但係好多時都有上左去返唔必黎回防嘅情況出現，令對方容易反擊，而且佢兩個傳中能力都唔係突別好，所以佢地上黎助攻嘅收獲唔多，反而迪亞打閘時成日有好多好精妙嘅傳中助攻，雖然佢後上頻率無路斯獲加咁多，但效率就好得多。2) 簡尼獨自搵食。簡尼係一個好有能力自己搵食嘅球員，有身型有速度，好多時個波一交到比佢就可以自己搵食。特別係當佢未彈起嘅時候，對手無突別搵人Mark佢，就有好多入波機會。但係季尾果陣對方都知道佢有能力而派幾個人去Mark佢，而當時球隊入球量亦大幅下跌，所以下年搵多個前鋒幫佢真係好重要。3) 兩翼Cut in。睇左咁多場波，都知道我地兩翼嘅攻勢多數都係Cut in交波射波多過落底出波，所以佢地想點其實好易估，亦令對手容易防守。
來季球隊響進攻可以有更多變化，突別係中場同兩翼更應該有唔同嘅進攻套路，咁對手先無咁容易防守，呢個亦都係肥仔暑假迫切面對嘅課題。

至於我地Lilywhitehk，黎緊暑假將會有好多驚喜比大家，等一眾熱刺Fans可以有機會一齊玩，記住Keep住留意我地Facebook Page啦！

-leo