小弟喺場上作為一位守門員，睇波時亦會特別留意呢個位置，希望從中學習。
當然睇愛隊熱刺更加會肉緊啦。
好幸運我地隊中擁有現役法國國家隊隊長出任呢個重要嘅位置，如果無左佢多番精彩演出，熱刺今季成績應該慘不忍睹。
喺普通人眼中，能夠救出險球已經係一個好龍門。但係喺龍門眼中，除左要識救波，仲需指揮後防，組織好防線。
我地嘅洛里斯有冇做到呢？熱刺條防線經常風聲鶴唳，到底係洛里斯指揮得唔夠，定係後衛們「犯上腦筋上嘅錯誤」？
我睇法係偏向後者。
睇直播其實唔難睇到洛里斯經常向後衛提場，但係後衛就好似聽唔到咁……特別係隊長在場時，三閘線經常出現混亂，而且時時要為左閘補位﹙丹尼路斯回唔切防是常識吧……﹚，其中一個中堅就必須棄守中路。
呢啲情況，季初不時發生。
而當面對反擊時，亦經常唔知點解其中一個中堅係上左去，得返一中堅加閘/中場，但係兩位球員又成日撞埋一齊，無一種「一個逼一個包」嘅意識。﹙呢個情況，喺上屆踢high-line嘅時候更嚴重，所以上屆見到洛里斯棄關出迎次數遠高於今屆﹚
一個指揮得再好嘅守門員，都要有至少一個有頭腦嘅中堅明白佢指揮先可以穩定防線。棄用卡保前唔難見到佢經常指揮防線，但係佢係咪真係指揮到？失球數字同洛里斯撲救數字已經話左比大家知。
到棄用卡保，洛里斯撲救次數依然高企，但係混亂情況已經大幅減少。有嘅都係出現喺兩閘﹙丹尼路斯回唔切，基列基治、戴亞非最佳位置，諾頓……不要再說了﹚，呢樣已經唔係守門員指揮能力問題。
不過中堅位置依然係要補強。
雖然洛里斯撲救能力無可置疑，指揮亦甚佳，但係佢長傳質素、腳下功夫真係唔合格﹙今屆其實好左，上屆見佢有人逼，真係撳定平安鐘﹚。
迪基亞(David de Gea)、高圖爾斯(Thibaut Courtois)同洛里斯被認為英超三大門將﹙公平講，用不失球場數計，係費沙科士打同法比安斯基領先﹚，迪希亞經常被秤先，腳下功夫會係重要一環。
現今足球世界，守門員用腳次數甚多，有時更要擔當清道夫角色。洛里斯真係需要喺腳下功夫落多少少苦功先得。
-ian
請按此登錄後留言。未成為會員? 立即註冊