[比利時的晉級與德國的出局]

K波說故事 於 04/07/2018 發表 收藏文章


德國於分組賽出局已成事實, 而當時於分組賽最後一輪只要德國贏南韓便肯定出線, 賽前幾可近乎一面倒看好德國而且滿以為能大炒一場, 不過德國卻面對等同已出局既南韓變得束手無策, 空有控球卻無實際威脅, 反觀南韓既反擊更越似將會取得入球, 結果最終被南韓補時2次反擊得手, 慘敗出局, 最終小組排名更排在南韓之後排在包尾, 被譽為世界一級門將既紐亞更出醜收場。難為了卻奧斯於絕殺瑞典後還沾沾自喜的表示無幾多隊可以好似德國咁狂攻。
https://youtu.be/DhIQcDTWUD0
日前, 世界盃16強賽事, 比利時面對日本, 上半場攻勢不絕但日本一直在抗衡, 時間一分一秒過去, 半場過後, 日本捱得住。下半場出黎3分鐘, 日本一次反擊機會, 原口元氣入攝禁區射破古圖斯大門領先1:0, 3分鐘後乾貴士禁區頂起腳遠射, 皮球直飛死角成2:0。又一場德國式滑鐵盧嗎?


https://youtu.be/XPZiJztb5NI

比利時領隊馬天尼斯即時變陣, 由純以地面戰改為直接了當既傳中屈頭鎚, 結果帶有半幸運成份下有維頓漢既頭鎚入球, 再黎後備入替既費蘭尼再屈頭鎚追平2:2。此時此刻,  比利時又改變進攻模式, 而呢一刻, 場內有能一扭幾既夏世三, 又有可以老屈頭鎚既費蘭尼同盧卡古, 仲有可以邊路出波既沙迪利, 結果日本深明如果要加時, 同樣死路一條, 最終嘗試完場前角球既情況下大軍壓境, 不幸卻被比利時反擊成功, 迪布尼直傳梅尼亞再地波傳中盧卡古, 後者有意漏給後上既沙迪利入波反超加絕殺日本。總算不用再爆冷了, 當然日本既鬥志值得欣賞但同樣要讚比利時既不慌不忙, 達至有效反擊, 留意一下絕殺一球既過程中, 比利時全場既進攻點及今場MVP夏薩特係無參與過, 即是說, 進攻點絕非單靠一點。


德國與比利時, 級數上相若, 但貴為上屆世界盃冠軍既德國經驗豐富, 加上日耳曼民族多年既冷靜, 面對此類情況卻竟然變得無從入手, 或者你認為南韓是補時才絕殺, 而比利時有接近半場時間去追, 但要留意重點不在這裡, 要講困難, 比利時比德國既劣景更困難, 德國有90分鐘時間去入一球, 而比利時卻要於40分鐘內最少入2球。

德國出局後眾多焦點放在奧燒身上, 卻忘記了路維在今次大賽選人用人的失誤。選人上, 放棄了於今季英超比夏薩特狀態更好既利萊辛尼, 此子今季已証明自己有一扭幾既能力而且狀態火熱, 即使與路維原定既戰術體系不相配但如果放在後備席上卻是一個變陣既選擇, 可惜路維太自滿, 認為沒有此需要, 結果今次德國於世界盃既三場賽事中可以睇到, 多次德國於無從入手時, 都未有新既突破點。再者, 路維所用既前鋒華拿, 如果面對強強對碰或者還可以發揮佢走位及入攝既能力, 但德國隊於分組賽卻應該以主攻為主, 華拿多場變得隱形, 連帶也影響左奧燒及梅拿既發揮。

反觀比利時由於以夏薩特為進攻重心, 地面進攻便是主要戰術體系, 配以梅頓斯及卡拉斯高, 而迪布尼則於身後作支援, 但馬天尼斯也留有費蘭尼這一著, 當打算用頭鎚屈高波時, 夏薩特也需要走到邊路去做傳中的工作。
德國被南韓踢出局與比利時絕殺日本的晉級形成了強烈的對比。當然我們也要欣賞南韓與日本踢出了精彩賽事, 而比利時既劣勢反超更為球迷帶來了今屆世界盃其中一場經典。

鐘意睇我K波講野, 都讚好我個FACEBOOK專頁, 謝謝支持!
K波說故事 - https://www.facebook.com/KBALLSTORY


留言


請按此登錄後留言。未成為會員? 立即註冊
    快捷鍵:←
    快捷鍵:→