日本隊憑著今屆世界盃新增嘅公平競技積分壓過塞內加爾以次名晉級16強, 意思即係如果積分相同, 將順序計算得失球, 入球數目, 如果都係相同就會計算紅黃牌數目(呢樣當然係少拎牌先有著數啦)。結果2隊最終同得4分, 得失球同樣係0而入球數目同樣係4球, 不過日本隊最後以只拎4張黃牌而塞內加爾拎左6張黃牌既情況下, 被稱為"不光彩"下出線。
為何被稱為"不光彩"? 因為當時賽事到左最後10至15分鐘, 只要日本唔再失多一球(當時波蘭1:0領先日本), 唔再拎紅黃牌下, 另一邊廂賽果不變(當時哥倫比亞1:0領先塞內加爾), 日本就可以晉級。結果日本隊最後10-15分鐘選擇慢慢搓波到完場, 被稱為"不光彩"而最終亦以此完場得以晉級。
賽後大量球評認為日本隊尾段消極既踢法作出批評, 領隊仲要走出黎道歉, 不過點解咁都可以批評呢？我K波真係諗唔明(雖然我有份買左角球12.5球大 - 咪想抽水住, 我買埋9.5/10.5角球大)。比賽從來都係一場戰鬥, 公平競技在於以公平既情況下參與球賽, 既然今屆世界盃新增呢一項, 亦即係球隊都要以呢樣作為佢地爭出線既本錢, 而去到最後有呢個機會放向面前, 去珍惜機會有咩問題? 消極踢法? 參加比賽就係為左贏冠軍, 日本隊無出咩茅招都要俾人插真係幾無謂。
如果呢場波最後因為日本尾段為左追平甚至反勝打出熱血精神去積極進攻, 結果被波蘭入多粒或拎多幾張牌而出局, 換來可能係2極化既評價 - 光榮出局及愚蠢魯莽, 無論邊一個評論都好, 出局就要再等4年.......如果覺得咁樣用公平競技但"不光彩"出線係恥辱, 出線都唔抵支持, 咁.......即係日本隊呢場波如果玩角球旗戰術, 龍門開龍門球慢少少, 有球員傷左訓向地上多幾秒(唔一定要無敵風火論既), 補時再換人(雖然82分鐘已換晒)都算係浪費時間, 都係"不光彩"? 咁以後呢d所謂"不光彩"係咪又要計入公平競技既積分內? ! 遲下會唔會講到比賽要1打1先公平, 2,3個人去夾擊對手1個球員都唔公平架?
再者, 戰術好多種, 有球隊打小組, 有球隊專心打防反, 有球隊用硬朗攔截(咪拎多d牌囉), 而鳥籠戰術都係一種戰術, 你都要搓到波唔俾對手搶到波先得架, 你可以話日本當時輸緊波架, 唔去進攻咁唔要面子, 唔知以為贏緊波蘭幾粒添呀, 宏觀d睇啦, 係輸緊波架, 但出緊線架, 咁同贏緊個局有咩分別?.....點解要搏? 再理性d睇啦, 你估日本隊真係勁到可以壓住波蘭黎攻而唔驚輸多粒咩？你估真係足球小將咩?!
所有野都係一場賭博, 日本隊搏局勢不變, 搏贏左咪出線囉, 搏輸左咪出局囉.....諗起King哥(劉華)同化骨龍(張家輝)講果句"你想刺激咁輸, 定悶住咁贏?"
鐘意睇我K波講野, 都讚好我個FACEBOOK專頁, 謝謝支持!
K波說故事 - https://www.facebook.com/KBALLSTORY
請按此登錄後留言。未成為會員? 立即註冊