[事後煙 - 敗於經驗: 熱刺 V 祖雲達斯]

K波說故事 於 08/03/2018 發表 收藏文章



歐冠杯16強次回合, 熱刺手執2球作客入球返到主場溫布萊迎戰祖雲達斯, 雖然祖記有戴巴拿復出, 不過以熱刺今季主場氣勢加上信心, 一D都唔怕祖記, 而且祖記最強係防守力。 其實熱刺今場波只要不敗, 以今季熱刺既防守力, 都已經好穩陣, 加上熱刺最強就係前場三位反擊之鬼- 孫興文, 阿里同埋哈利簡尼, 其餘中後場球員只要做好本份已經足夠。



開波熱刺一直控制節奏, 祖記中前場根本產生唔到咩威脅, 而最搶眼當然就係孫興文啦, 只要佢拎到波, 基本上祖記右閘巴沙利都要嚇親死。加上熱刺球員進攻立體, 你要守住孫興文, 又仲有哈利簡尼, 上半場就有一球機會扣過保方窄位射空門斜出, 不過孫興交於39分鐘幫熱刺打下一支強心針, 門前執雞成功射成1:0, 總比數為3:2. 亦即係話, 熱刺要輸就要失2球。



咁樣返入更衣室, 相信係最好不過既事, 下半場返出黎其實熱刺都仲係無走樣, 想祖記入波不如佢似失多一球既機會仲大。點知賽事發展到64分鐘就改變左一切, 希古恩門前空晒將基迪拉既頭鎚改變方向追成1:1, 總比數3:3, 呢球迪亞甩晒位真係要咩下鑊, 不過其實如果呢個時候, 熱刺肯乖乖地, 集中精神以防守為主, 普捷天奴呢個時候其實可以將成隊波個form縮後半格, 收窄防守網, 留前場3劍俠向度試下攻就得, 始終要再入保方波唔係易事黎。


可惜只係2分鐘後, 希古恩一次空晒既直線, 就劏穿熱刺後防, 一對中堅出現呢D失誤相信向今季熱刺失波中都好少發生, 偏偏就發生向呢場咁重要既比賽, 加上查比亞包埋個越位, 就係咁戴巴拿面對洛里斯同門框一射, 入波反超前成2:1。呢個時候, 要急既就係熱刺喇, 但佢地由於根本一開始就用呢種氣勢去踢, 要再谷多一浸都谷唔起, 唯有靠一向最強既45度斜傳試下俾哈利簡尼破關啦, 雖然哈利簡尼有一球頭鎚中柱, 不過都係無用...............強勢下出局而回, 祖記則算是小奇蹟反勝對手。



講到呢度, 唔係話祖記係弱旅, 無料到所以熱刺輸係抵死, 但細心諗下祖記最強就係防守, 反而進攻只要睇實2位射手都幾安全, 而熱刺今季進攻防守都唔差, 偏偏就係輸經驗, 輸普捷天奴臨場即時反應。一開波加上主場出擊, 你想搏多球無問題, 都俾你搏到贏1:0, 下半場出黎就應該變一變個陣, 等祖記反應唔黎, 拖慢個節奏, 時間一分一秒過, 到時急既只係祖記, 偏偏熱刺就係死衝, 結果咪(幫對手)踢左場奇蹟之戰囉。



K波

鐘意睇我K波講野, 都讚好我個FACEBOOK專頁, 謝謝支持!
K波說故事 - https://www.facebook.com/KBALLSTORY

留言


請按此登錄後留言。未成為會員? 立即註冊
    快捷鍵:←
    快捷鍵:→