[我想跟隊] 精選 推薦

鐘意睇我K波講野, 都讚好我個FACEBOOK專頁, 謝謝支持!
https://www.facebook.com/KBALLSTORY

生於90年代既我，係一名波牛，放學去踢波係每日最開心既事！放學鐘聲一嚮，成班男學生就衝去球場，周街換衫，甚至著住校服，換對白飯魚就開波喇！
果個年代，跟隊係正常不過既事，球場２邊坐滿不同國籍，不同球隊或者不同學校既球星，當每班人夠６個時，就會大叫"跟隊"！唔係踢７個咩？係呀，但叫得黎，第七人就會到架啦，就算唔到，咪踢住先囉！或者求其搵條蛋散幫住拖先，好蝦既咪叫佢守龍囉！
不同既球隊，就係向度靜靜觀賞場中２隊既對戰，為既，你估真係欣賞秀麗既腳法，穩建既防守咩？千其唔好防守得穩建添呀，萬一遇著大巴對大巴，咁就仆街喇！最好２隊波都係阿仙奴，攻呀，攻呀，唔夠氣都攻呀，攻呀！快快搵隊入左波佢就得喇！
一入左波，呢個時候，盡顯香港人守秩序既一面，我Ｋ波又真係未試過有球隊為左打針問題爭吵，就算有爭執，明明大家就係波牛，但又好講道理，講完２句，就是旦一隊出去先喇！可能大家都認為，俾你踢左先，又點唧？你有本事咪贏囉，贏完到我贏番你（因為下輪就到我地出場啦麻），你無本事，可能好快就輸啦！仲可以向場邊睇清楚你地乜踢法添！

而最期待，就係當自己友有成２隊既時候，出現所謂既國家打比戰！有晒當年睇足球小將，南葛對明和既感覺喇！２軍對陣，為左一球之爭，踢過你死我活！呢種感覺，去邊度搵到呀？自我感覺非常良好!

可惜，直到有一晚７點既時候，有一行十幾人黎到球場，心諗，未見過喎，乜料呀？入到黎，又唔叫跟隊，做乜７呢？呢個時候，望一望錶，７點喇喎，踢多一粒鐘就返屋企啦！說時遲，哪時快，班死仆街拎張死亡証出黎，"我地ＢＫ左場，７－９點"！

"ＢＫ場？"乜７野黎架？一望果張所謂場紙既死亡証，有文有路喎，結果！"跟隊既球星們，你地收得皮喇，睇我地表演啦！"我地深深覺得呢班ＢＫ左場既仆街係咁樣諗既！我地深深不忿，坐向場邊睇左陣，有Ｄ未踢夠既就向場邊搓波，到最後，咪又係要走囉！


呢個就係我地對於ＢＫ場既認識，慢慢，每當我地一望到一大班人步入球場，第一時間已經唔係諗呢班友乜料呀？而係諗"唔撚係又ＢＫ左場呀？我踢左１場乍喎"！世界在變，我地都要與時並進，就係咁，迫我地認識咩叫ＢＫ場，我地就開始試下ＢＫ場喇！

慢慢地，我地都變左一班ＢＫ場既死仆街，不過，呢個就係現實，你唔ＢＫ場，踢條毛啦！又再慢慢地，都唔敢唔ＢＫ場就去球場，不過ＢＫ左場，再無跟隊既快感，除非有一行超過２０人啦！


其實，我仍然好掛住跟隊既快感，等一輪之後出現既國家打比戰………下雨天總掛念從前，球場上哪可愛片段………


https://www.youtube.com/watch?v=RDuiXFQO2u8
“跟隊唔該”

https://www.youtube.com/watch?v=rp2mMZl2dAo
K波

鐘意睇我K波講野, 都讚好我個FACEBOOK專頁, 謝謝支持!
https://www.facebook.com/KBALLSTORY