英超爭冠白熱化 七場關鍵戰將定生死

阿仙奴日前作客被護級嘅狼隊逼和，領先兩球最終只帶走1分。呢場和波，等於親手俾咗曼城重新點燃希望。

如果曼城周末擊敗紐卡素，差距將縮至兩分。對阿迪達（Mikel Arteta）嚟講，呢種「後面有追兵」嘅壓力，往往先至最致命。

而接住落嚟嘅 7 場比賽，極可能決定今季英超冠軍誰屬。


1️⃣ 曼城 vs 紐卡素（2月21日）


伊蒂哈德球場向來係紐卡素嘅惡夢，加上佢哋周中遠征卡拉巴克，體能消耗唔少。如果曼城順利全取三分，壓力會瞬間轉移到阿仙奴身上。

2️⃣ 熱刺 vs 阿仙奴（2月22日）


熱刺新任看守領隊 杜陀（Igor Tudor）首次主場領軍，氣氛勢必唔同。相比之前法蘭克（Thomas Frank）執教時嘅沉悶氣氛，主場球迷會可能更投入。
如果曼城已經贏波，阿仙奴必須頂住壓力。

3️⃣ 阿仙奴 vs 車路士（3月1日）


車路士主帥 羅仙尼亞（Liam Rosenior）上次作客酋長球場以偏保守打法應戰，成功令阿仙奴難以打穿防線。
曼城肯定希望車路士再次「死守反擊」，拖慢比賽節奏。令阿仙奴失分。

4️⃣ 車路士 vs 曼城（4月11日，待定）


曼城自2021年4月後未曾喺史丹福橋落敗。不過車路士主場應該唔會死守，反而更主動。
如果開放式對攻，反而可能更有利曼城發揮。

5️⃣ 曼城 vs 阿仙奴（4月18日，待定）


呢場無需多講。

如果到時只差兩分，甚至曼城反超，形勢會完全唔同。
哥迪奧拿（Pep Guardiola）向來善於處理壓力，而阿迪達則要證明自己唔只係挑戰者。

伊蒂哈德球場屆時氣氛必定火爆。

6️⃣ 曼城 vs 阿士東維拉（5月24日）


最後一輪。

曼城曾經喺尾輪擊敗維拉奪冠，畫面仍然歷歷在目。。不過今季阿士東維拉 實力更穩，如果已確保歐聯資格，鬥志或成變數。

7️⃣ 水晶宮 vs 阿仙奴（5月24日）


同日另一邊廂, 阿仙奴作客水晶宮

作客水晶宮（Crystal Palace）從來唔輕鬆。呢場亦係主帥奧利華加士拿 (Oliver Glasner）告別戰，主場氣氛肯定高漲。

阿仙奴今季雖然一直握住主動權，但今場被狼隊逼和，等於重新打開咗冠軍爭奪戰嘅大門。曼城只要喺周末擊敗紐卡素，就會將差距縮到兩分，壓力瞬間轉移到阿迪達身上。

接住落嚟嘅七場比賽，每一場都係高壓場面、每一場都可能左右冠軍走向。
曼城有經驗、有底氣，阿仙奴則有主動權、有動力——但任何一場失分，都可能令形勢瞬間翻轉。

今季英超冠軍，很大機會要等到最後一日先揭盅。