艾摩廉復出踢波? 意甲「第89分鐘後備上陣」!

日前意甲 克雷莫納（Cremonese）對熱拿亞（Genoa）一戰，電視畫面突然顯示——魯賓艾摩廉（Ruben Amorim）第89分鐘後備入替。

唔少球迷第一反應係：「吓？曼聯前領隊復出踢意甲？」


41歲「後備上陣」？原來搞錯人

艾摩廉十年前已經掛靴，而且喺年初被 曼聯 辭退領隊職務。無論年紀定身份，都唔可能突然喺意甲披甲上陣。

結果證實，轉播單位擺咗個大烏龍。

真正後備入替嘅，其實係熱拿亞新兵阿歷斯艾摩廉（Alex Amorim），佢喺89分鐘入替費倫特立（Morten Frendrup）。

但直播圖像將「Amorim」直接對應咗魯賓艾摩廉，仲配埋前曼聯主帥嘅資料，畫面違和到極點。
社交網即刻瘋傳片段，成為球迷茶餘飯後話題。

場上其實幾好睇

其實比賽本身都幾刺激, 兩隊合共31次射門，門將一共作出12次撲救。

阿歷斯艾摩廉（Alex Amorim）雖然上陣時間唔多，但差啲成為奇兵。佢喺右路傳中，皮球彈起後落到伊古賓（Caleb Ekuban）頭頂，可惜頂高咗。
如果入埋，呢個「錯版艾摩廉」故事可能更加傳奇。