「必走之人」或再返曼聯? 拉舒福特命運急轉彎

拉舒福特先後被外借至阿士東維拉，再到巴塞隆拿。而今季喺巴塞，佢狀態全面復活，各項賽事已經交出 9 球 + 12 助攻，歐聯同聯賽都有關鍵表現。

據英國媒體整理，巴塞手上持有約 £2,600 萬英鎊嘅買斷選項。以拉舒福特而家嘅表現嚟講，呢個價錢，幾乎可以話係「執到」。

但偏偏就算踢成咁，巴塞內部對於會唔會正式簽低佢，依然存在猶豫。

而拉舒福特而家嘅表現，更加令人回想起——點解當初會被艾摩廉（Ruben Amorim）逼到無路可走？
當時，甚至連 朗尼（Wayne Rooney） 都公開建議佢離隊，幾乎宣告佢同曼聯緣盡。

但足球世界從來都係咁，一個人離去，路又突然打翻開。


卡域克 成為關鍵變數

據《The Telegraph》報道，隨住艾摩廉已經離任，曼聯內部再次出現「轉軚」嘅聲音。

現任臨時主帥 卡域克（Michael Carrick），如果最終獲委任為正式領隊，將會樂意歡迎拉舒福特回歸。

卡域克同拉舒福特做過隊友、亦做過教練，對佢非常了解，亦一直相信自己可以發揮佢最好一面。卡域克甚至曾形容拉舒福特嘅成長係一個「fairytale」。

拉舒福特回頭真係好主意？

現實層面睇，障礙其實唔少。

首先，拉舒福特如果回歸，幾乎肯定要接受大幅減薪，條件會接近佢而家喺巴塞嘅待遇。其次，佢而家喺西班牙生活愉快，足球同生活都重新平衡，真係有幾大誘因返去一個曾經令佢受挫嘅地方？
更重要嘅係——呢一步，對曼聯真係好咩？

就算卡域克上位，決定權始終唔只係佢一票。

據球會結構，INEOS 管理層需要為整個球會長遠發展負責，而唔係單純為某位主帥嘅情感或回憶作決定。

現實係殘酷嘅：曼聯需要更年輕、更加飢渴、真正想為球會而戰嘅球員。

拉舒福特同曼聯之間嘅問題，早已唔只係狀態，而係關係本身。回頭，很可能只會重演舊戲。