熱刺又要換帥？法蘭克位置危危乎

熱刺嘅氣氛，正一步一步走向臨界點。

據《Sky Sports News》報道，隨住球隊喺主場以 1:2 不敵死敵 韋斯咸（West Ham United），法蘭克（Thomas Frank） 嘅帥位已經受到熱刺高層嚴重審視，北倫敦隨時又一次迎來換帥風暴。

呢場倫敦打吡，不止係三分咁簡單。完場哨聲一響，主場球迷嘅不滿情緒徹底爆發，噓聲四起，更有清晰可聞嘅口號:

「You're getting sacked in the morning」。
「你明天早上會被解僱」
嗰一刻，已經唔再只係成績問題，而係信任全面崩塌。


成績拖垮耐性，氣氛開始「有毒」
輸畀韋斯咸之後，熱刺聯賽排名跌至第 14 位，各項賽事近 8 場只得 1 勝。對一支本來目標係爭歐戰、甚至更高位置嘅球隊而言，呢個走勢幾乎冇任何辯護空間。

據報道，熱刺高層原本願意畀時間法蘭克，讓佢慢慢推動長期重建，但 14 場輸 8 場 嘅現實，已經令耐性接近極限。再加上主場氣氛變得惡劣，「繼續等」本身，都可能變成一種風險。

法蘭克回應：仍然相信自己

賽後記者會上，法蘭克態度並冇退縮，反而選擇正面迎戰壓力。

"Of course, I’ve probably had better times. It’s probably not the best time of course, but I understand, I’m the man in charge, so the blame will go to me."

「老實講，我一定經歷過更好嘅時刻。依家當然唔係最好，但我明白，我係領隊，所有責任自然會落喺我身上。」

"But I can promise that I’m sitting here, giving everything, every single day. I feel the trust from everyone and there’s only one way, we need to keep going."

「但我可以保證，我每日都傾盡全力。我仍然感受到大家嘅信任，而家只有一條路——繼續向前行。」

問題在於，領隊感受到嘅信任，未必同球迷感受到嘅一致。進攻乏力、防守重複犯錯，已經成為球迷每星期都要面對嘅既視感。

接班人傳聞浮現，熱刺再臨抉擇

當帥位動搖，傳聞自然湧現。水晶宮主帥 加士拿（Oliver Glasner） 被視為賠率熱門，但季中挖角並不容易。

至於球迷最熟悉嘅名字，當然係前任主帥 普捷天奴（Mauricio Pochettino）。不過佢目前正帶領美國國家隊備戰 2026 世界盃，真正回歸英超，最快都要等到夏天。

另外，般尼茅夫嘅 伊拉奧拿（Andoni Iraola），亦被指深得熱刺高層欣賞，其高壓逼搶同戰術彈性，正正係熱刺目前最欠缺嘅元素。

如果高層決定即時行動，助教 希汀加（Johnny Heitinga），有可能暫代領軍，應付對 多蒙特嘅歐戰賽事。

法蘭克未必係熱刺所有問題嘅源頭，但喺英超，當成績、氣氛同信任同時出現裂痕，領隊往往最先成為代罪羔羊
如果熱刺高層繼續拖延，會唔會令今季變成又一次無法挽回嘅時間浪費？
。