加利佬狠批曼聯新星:唔對辦! 仲差好遠！

曼聯喺對諾定咸森林嘅比賽中，雖然喺兩分鐘之內連失兩球，不過最終憑住阿密特．迪亞路（Amad Diallo） 嘅入球，成功逼和對手，搶返一分。

但賽後，前曼聯名將加利尼維利（Gary Neville）對球隊新加盟嘅前鋒錫斯高（Benjamin Sesko) 表現就相當不滿，直言呢位斯洛文尼亞射手「仲差好遠」。

呢位 22 歲嘅前鋒今個夏天由RB萊比錫加盟曼聯，係球隊今季重點收購之一。除咗佢之外，紅魔仲簽入咗麥比奧莫（Bryan Mbeumo) 同馬菲奧斯根夏（Matheus Cunha），三人都被寄望可以重燃球隊前場火力。
喺主帥阿莫林帶領之下，錫斯高今季已經正選上陣六次。今場面對森林，佢繼續獲得正選機會，希望延續上場對白禮頓嘅狀態。不過全場表現平平無奇，特別係下半場幾乎冇乜威脅。

賽後，加利佬接受訪問時毫不留情咁批評：
「我依然睇唔出佢有乜特別。」
「雖然錫斯高仲後生、有潛力，但以佢嘅轉會費嚟講，表現暫時唔對辦。比起其他新兵根夏同麥比奧莫，佢明顯仲未『上晒力』。」


賽後數據:
-13 次傳球中有 4 次失誤

-3 次射門全部唔中目標

-兩次爭頂失敗

雖然錫斯高今場表現未如理想，但現階段要判佢「死刑」都未免太早。畢竟曼聯今季整體表現仍未穩定，對任何新加盟球員嚟講都係一場考驗

球迷只能希望，呢位年輕射手可以盡快搵返信心，踢出佢喺德甲時嘅殺手本色。