「等咗十年嘅一句話」──雲加親口認錯：放走施捷斯尼係「錯誤」！ 精選

等咗十年，施捷斯尼

終於親耳聽到嗰句佢一直等緊嘅說話——
阿仙奴傳奇教頭溫格承認：2015 年放走佢，係一個錯誤。

呢段破鏡重圓嘅故事，出自亞馬遜最新紀錄片《Tek: The Last Save》，現時效力巴塞嘅波蘭國門將施捷斯尼，喺片中回憶起自己當年離開阿仙奴嘅傷心往事。

2015 年 1 月，阿仙奴作客以 0：2 不敵修咸頓，兩個失球都係施捷斯尼犯下嘅致命錯誤。更致命嘅係，雲加喺賽後喺更衣室淋浴間捉到佢食煙。就係嗰一刻，施捷斯尼唔單止葬送咗阿仙奴嗰場比賽，亦結束咗自己嘅槍手生涯。

施捷斯尼回憶當日：
「嗰晚我返到屋企就喊咗。」]，
「嗰次係我職業生涯唯一一次真正令我心碎嘅時刻。」
當時佢不但被雲加公開批評，更被罰款 2 萬英鎊，仲即刻失去主力位置。
翌年夏天，佢被外借到羅馬；再兩年後，祖雲達斯以 1800 萬歐元將佢簽走。

多年後，兩師徒終於在紀錄片拍攝期間再度相見。施捷斯尼忍唔住問出埋藏多年嘅疑惑：

「我知道自己最終會去祖雲達斯，因為你嗰陣講得好清楚。但我想知，你決定放我走係喺嗰一刻？定係早喺修咸頓嗰日已經決定咗？」

雲加坦白承認，當年嘅事件對佢嘅決定影響深遠：
「修咸頓嗰件事佔咗好大比重。」

施捷斯尼繼續追問：「咁令你做決定嘅原因係係足球層面？定係足球以外嘅？」雲加答得更直接：「足球以外嘅。可能我覺得你太安逸，嗰件事加深咗呢個感覺。你當時 20 歲，16 歲嚟阿仙奴嘅時候前面有十個門將，當你成功突圍後，我覺得你變得太放鬆，以為前路一帆風順。」

面對雲加嘅坦白，施捷斯尼都認同：「你講得啱，我嗰陣可能真係太安逸。」
但佢亦忍唔住補上一句：佢喺羅馬兩年嘅表現證明自己仍然值得信任。佢喺 2016-17 賽季贏得意甲最佳門將，先有之後去祖雲達斯嘅機會。

「我覺得喺羅馬嘅成績足夠令我返到阿仙奴。你冇召我返去係你嘅錯。」

雲加聽後亦毫不逃避：「係，我犯咗好多錯，而我對每一個錯都感到後悔。」

呢一句，終於令施捷斯尼完全釋懷。佢用一種贏家姿態振臂慶祝：「佢承認啦！我而家可以退役啦！」