從世人唾棄到關鍵球員 麥佳亞嘅逆轉故事值得曼聯續約?

轉會截止日過後，曼聯短期內唔會再有任何補強動作，但有一個決定，比買人更急更實際——
就係點樣處理 麥佳亞（Harry Maguire）嘅未來。

呢位 32 歲中堅將會喺今年 6 月約滿。據英國傳媒報道，雙方其實一直有傾續約，但到而家都未落實。睇返近幾個月嘅表現，曼聯真係仲拖？


麥佳亞已經「浴火重生」

自從 卡域克（Michael Carrick） 以看守領隊身份接手之後，麥佳亞嘅角色明顯變得更重要。

佢正選上陣嘅三場重要勝仗，包括擊敗 曼城、阿仙奴 同 富咸，麥佳亞全部踢足，而且表現穩定。

尤其作客酋長球場對阿仙奴，面對 阿迪達（Mikel Arteta） 最引以為傲嘅定位球戰術，麥佳亞嘅制空能力，幾乎係贏波關鍵。

而家英超愈嚟愈硬淨，麥佳亞呢類出色防空嘅中堅，反而愈嚟愈值錢。
空中優勢，已經足夠成為續約理由

近幾季英超趨勢好清楚——節奏快、身體對抗多、長波同定位球比重增加。
而喺呢種環境底下，麥佳亞嘅頭槌、防空、身體對抗，仍然係聯賽頂級水準。

如果單睇「制空力」，其實已經好難喺市場上，用合理價錢搵到同級替代品。
換句話講：唔續佢，你就要花幾千萬鎊再賭一次。

被除隊長後，反而成為更好嘅領袖？

一個幾有趣嘅現象係：自從被撤走隊長臂章之後，麥佳亞反而更冷靜、更穩定。

卡域克亦高度評價佢喺更衣室嘅作用：
“A big presence, been there, seen it, done it.”

「佢係一個好有存在感嘅球員，見過世面、經歷過一切。」

喺一支愈嚟愈年輕嘅曼聯入面，呢種角色, 經驗同心理素質, 係十分重要。

年齡唔係問題，合約年期可以解決

下個月，麥佳亞就 33 歲。
現實啲講，一份兩年合約，其實係非常合理嘅折衷方案。

你唔需要承諾太長時間，但可以確保後防穩定；
同時，市場上要搵一個即插即用、熟悉英超、熟悉曼聯嘅中堅，成本只會更高。
唯一嘅隱憂？
近兩年有過幾次肌肉傷患。
但整體計落——利多於弊。


唔續麥佳亞，曼聯可能會後悔

麥佳亞近期表現，唔單止幫自己加籌碼，甚至有聲音認為：佢已經成為曼聯而家最可靠嘅中堅。

無論係球場上，定係更衣室入面，
呢種價值，係買唔返嚟嘅。