2018年J1第23輪總結：川崎勝廣島爭標緊湊

廣島三箭迎戰川崎前鋒呢場絕對係今季爭標最重要一戰，柏德歷先為廣島頂入個人今季第17個入波，但係下半場小林悠梅開二度，令川崎作客以2：1反勝。廣島輸波之後仍然以49分排榜首，但係川崎就以43分緊隨第2位，如果少踢一場嘅川崎往後補賽贏埋就只係落後廣島3分，令今季聯賽爭標戰又緊湊返。至於FC東京就喺領先2球之後畀北海道札幌岡薩多連入3球反勝，3連敗嘅東京繼續排第3位，落後廣島9分，基本上已經退出爭標行列，而且只係領先神戶勝利船同大阪櫻花4分，隨時連前三位都不保。

神戶勝利船嘅星級戰將恩尼斯達雖然未能連續3場入波，但係今輪都放個招牌靚長傳入禁區，畀首次上陣嘅長沢駿第一時間頭鎚二傳畀三田啓貴先開紀錄。另一名神戶星級球員普度斯基下半場亦作出近門施射，雖然畀對手門將擋出，不過隊友鄉家友太及時執雞補中，令神戶作客以2：0擊敗湘南比馬，得以繼續排第4位。
護級方面，名古屋鯨魚雖然冇咗祖奧，但係仍然可以主場以3：0大破鳥栖砂岩，5連勝嘅名古屋已經升上第14位，距離降班區3分。鳥栖就跌落尾三，至於大阪飛腳同長崎勝利丸就一齊輸波，令鳥栖繼續領先飛腳同長崎1分，橫濱水手又輸一場之後排尾四。由第12位嘅湘南至包尾嘅長崎之間只差5分，所以護級形勢仍然混亂。

Opta今輪數據

1.小林悠（川崎）- 今輪賽事連入2球助球隊反勝，川崎今季3次落後1球下反勝，小林悠3場都有入波為川崎追平。

2.廣島三箭 - 今季強勢嘅廣島賽前13次先開紀錄，成績係12勝1和不敗，但今場畀川崎反敗為勝，係今季首次開紀錄而要輸波。
3.FC東京 - 今場領先2球下被札幌反勝，係東京自2016年6月輸畀浦和之後，再次領先2球下反負。

廣島三箭 1：2 川崎前鋒
https://www.youtube.com/watch?v=PLA1dZEm-C8
北海道札幌岡薩多 3：2 FC東京

湘南比馬 0：2 神戶勝利船
https://www.youtube.com/watch?v=V_6had-KVeM
名古屋鯨魚 3：0 鳥栖砂岩
https://www.youtube.com/watch?v=2T87elca-pw
仙台維加泰 2：1 大阪飛腳
https://www.youtube.com/watch?v=hZd7IvF3hlY
長崎勝利丸 0：2 大阪櫻花
https://www.youtube.com/watch?v=77BRidhPdRw
鹿島鹿角 1：0 橫濱水手
https://www.youtube.com/watch?v=8vYnm5qJFcY
磐田山葉 2：0 柏雷素爾
https://www.youtube.com/watch?v=Ac4j7OHII18
清水心跳 3：3 浦和紅鑽
https://www.youtube.com/watch?v=REaRGo-1bZc
#北海道コンサドーレ札幌 #ベガルタ仙台 #鹿島アントラーズ #浦和レッズ #柏レイソル #FC東京 #川崎フロンターレ #横浜Fマリノス #湘南ベルマーレ #清水エスパルス #ジュビロ磐田 #名古屋グランパス #ガンバ大阪 #セレッソ大阪 #ヴィッセル神戸 #サンフレッチェ広島 #サガン鳥栖 #Vファーレン長崎 #Jリーグ

圖片：JリーグOfficial site資料來源：J League情報站
https://www.facebook.com/jleagueinfo/