森保一料掌日本隊　或得西野雲加協助

多間日本媒體今日報道指出，目前擔任日本奧運隊主帥嘅森保一，今日將會獲日本足總確認兼任日本國家隊主教練一職，據聞將會先簽約2年，年薪達1.5億日元，完約之後先再按表現決定會否繼續帶領球隊進軍卡塔爾世界盃。同時消息指世界盃決賽周後離任嘅前主帥西野朗，會繼續留喺JFA協助森保一領軍，同時以往執教過名古屋鯨魚嘅雲加，亦可能答應成為JFA嘅技術總監。
49歲嘅森保一喺新主帥遴選過程一直獲得JFA會長田嶋幸三及技術委員會會長關塚隆支持，田嶋會長仲讚森保一係目前日本成績最好嘅教練。的確森保一令廣島三箭3度成為J1冠軍係佢最強嘅後盾，同時喺俄羅斯世界盃亦以助教身份協助西野朗領軍，亦喺日本獲得唔少稱許。至少香川真司已經表明喺世界盃期間同森保一合作愉快，所以相信佢係接手嘅好人選。當然目前一切仍然只係傳聞，要等今日稍後落實先可以下結論嘅。

#森保一 #日本代表 #HAJIMEMORIYASU #SAMURAIBLUE

圖片：Getty Images
資料來源：J League情報站https://www.facebook.com/jleagueinfo/