如果要數近年最藥煲嘅日本球員，相信宮市亮認咗第二都冇人敢認第一。呢名幾乎被球迷遺忘咗嘅昔日希望之星，自從今年4月第3次斷十字韌帶之後，外界就對佢重返球場不表樂觀。不過呢名命苦球員竟然奇蹟地極速康復，近日仲喺季前熱身賽披上聖保利球衣上陣。佢先喺上禮拜五對第4級地區球隊SC Weiche Flensburg 08後備上陣半場，仲為隊友Sami Allagui送上助攻，協助球隊以6：1大勝，然後禮拜日晚再喺對邦比嘅熱身賽後備上陣45分鐘，雖然未能阻止球隊淨吞3蛋，但表現已獲教練團滿意，仲話如果將來有12碼射的話會畀佢操刀回復信心。
宮市亮踢完第一場波之後就話好開心可以重返球場，但因為缺陣太耐所以踢半場都覺得好攰。雖然宮市亮已經出道好似好耐兼大傷過幾次，但始終佢都只係25歲仔，坦白講都唔可以再奢望佢會係日本足球嘅將來，不過對於熱愛足球永不放棄嘅佢嚟講，將來可以擺脫傷患繼續喺歐洲賽場追夢，都係一個值得鼓勵嘅感人故事嚟。
#宮市亮 #RyoMiyaichi #ザンクトパウリ #StPauli
圖片：fcstpauli.com、Hamburger Morgenpost
資料來源：J League情報站
https://www.facebook.com/jleagueinfo/
請按此登錄後留言。未成為會員? 立即註冊