2018年J2第34輪總結:迪比亞路光臨岐阜 市場部居功至偉

J League情報站 於 28/09/2018 發表 收藏文章
喺回顧上周末J2賽果之前,先要講吓FC岐阜市場部今季繼搵到大空翼(即係戴翅偉)印落波衫左袖,令波衫迷同《足球小將》大肆搜括一番之後,上周末請到前意大利國腳迪比亞路大駕光臨,除咗同小球迷一齊踢波,仲擔任FC岐阜主場迎戰東京綠茵一戰嘅開球嘉賓。呢場波亦吸引到12,045人入場,比今季平均入場人數6,899超出5千人以上,結果岐阜以1:1同東京綠茵打和。

岐阜上季因為鄰近嘅名古屋鯨魚降班,所以聯賽首次出現「名岐打吡」,令岐阜主場對名古屋一戰錄得球會史上最高嘅17,027人入場人數,平均入場人數亦比2016年上升23.2%。今季名古屋上返J1,一向入場人數偏低,要球星冇球星要成績又冇成績嘅岐阜於是想盡辦法去吸客。雖然平均入場人數同上季相差無幾,但係都見到呢間中部球會都係有相當野心。

J League賽會尋日就正式宣布町田澤維亞唔符合J1 License資格,所以就算獲得前2名成績都冇得升班,J1第16名屆時將會護級成功,第17名就由直接降班變為可以透過附加賽爭取最後護級機會。不過町田今輪再次和波失分,連續3場不勝,相反松本山雅繼續贏波,以3分領先町田繼續留守榜首位置。大分三神、橫濱FC同大宮松鼠都順利贏波,3隊藉東京綠茵和波失分,分別升上第3-5位。福岡黃蜂本來喺第34輪贏波得以留喺第7位,但周中喺補賽爆冷輸畀京都不死鳥,令佢哋錯失升上前6位機會,以1個入球差距落後綠茵排喺附加賽區外。

護級方面,榜尾3隊讚岐烏冬海、熊本羅亞素同京都不死鳥今輪全部輸波,不過京都喺周中補賽全取3分,令京都雖然繼續排尾三,但已經領先尾二熊本4分,讚岐同熊本形勢愈來愈危殆。岐阜和到綠茵之後就以2分領先京都排尾四,領先降班區6分,已經相對安全。

最後一提,J League賽會尋日亦宣布水戶蜀葵已經承諾短期內展開增加主場座席,所以暫時獲發J1 License,但如果未能如期完成增座工程就會收回。上季獲得J3冠軍但因為冇License而升唔到班嘅秋田藍閃電,今年終於獲得J2 License。秋田目前喺J3排第6位,落後第2位鹿兒島聯8分,所以升班都應該要下年先再算。

FC岐阜 1:1 東京綠茵

山口雷法 2:3 大分三神

千葉市原 0:1 橫濱FC

讚岐烏冬海 0:2 大宮松鼠

愛媛FC 2:3 福岡黃蜂

町田澤維亞 1:1 德島漩渦

松本山雅 2:0 熊本羅亞素

水戶蜀葵 0:1 新潟天鵝

京都不死鳥 0:2 栃木SC

甲府風林 2:0 岡山綠雉

金澤薩維根 1:0 山形山神

第22輪補賽

京都不死鳥 1:0 福岡黃蜂

#デルピエロ #AlessandroDelPiero #モンテディオ山形 #水戸ホーリーホック #栃木SC #大宮アルディージャ #ジェフユナイテッド千葉 #東京ヴェルディ #FC町田ゼルビア #横浜FC #ヴァンフォーレ甲府 #松本山雅FC #アルビレックス新潟 #ツエーゲン金沢 #FC岐阜 #京都サンガFC #ファジアーノ岡山 #レノファ山口FC #カマタマーレ讃岐 #徳島ヴォルティス #愛媛FC #アビスパ福岡 #ロアッソ熊本 #大分トリニータ #Jリーグ

圖片:JリーグOfficial site
資料來源:J League情報站
https://www.facebook.com/jleagueinfo/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→