2018年J1第17輪賽事總結

J League情報站 於 24/07/2018 發表 收藏文章

恩尼斯達同費蘭度托利斯兩名前西班牙世界盃冠軍成員,今輪終於喺日本聯賽首次上陣。可惜佢哋都因為狀態問題只能後備上陣,同樣未能為新東家挽回敗局。

恩尼斯達喺59分鐘後備上陣之後,有一次罰球攻門同接應角球左腳施射,但都未能夠為神戶勝利船入波,結果神戶主場淨吞湘南比馬3蛋。小白賽後話估唔到日本聯賽水準咁高,身體對抗比想像中強,亦有好多速度好快嘅球員。所以自己需要喺往後更努力練波,希望喺體能狀態提升之下表現更好。神戶教練吉田孝行就話由於狀態問題,所以賽前已經同小白傾好只會畀佢踢30分鐘,而小白可以喺只練咗幾日波就有咁嘅表現確實唔簡單。

至於托利斯就喺50分鐘後備上陣,上場之後無論喺高空波同左路進攻都為對手帶嚟明顯威脅,可惜鳥栖砂岩仍然喺主場以0:1不敵仙台維加泰,上半季確定排尾二,下半季要努力爭分護級。托利斯賽後強調自己只係練咗1個禮拜波,所以同其他隊友已經加緊練波一個月完全唔同。王子希望自己往後練返好100%狀態,令佢喺場上表現可以更好。
榜首形勢方面,廣島三箭作客包尾但有4名新將踢正選嘅名古屋鯨魚屢攻不下,最終雙方互無紀錄。同時FC東京就大勝橫濱水手,川崎前鋒亦小勝長崎勝利丸,前三甲位置不變,但廣島領先優勢收窄為7分。大阪櫻花同北海道札幌岡薩多同樣和波,雖然仍然排第4位同第5位,但已經落後川崎6分,前三位上半季已經帶開咗其他球隊。護級方面,名古屋終於有雙位數得分,但仍然同尾三爭5分。鳥栖輸波繼續尾二,尾三大阪飛腳同尾四長崎都輸波,所以尾四位排名不變。

Opta今輪數據

興梠慎三(浦和)- 三哥今輪賽事2次射門就入到1球,上半季射門28次就有20次中框,命中率高達71.4%,係12次射門以上球員當中命中率最高球員。

太田宏介(東京)- 呢名前日本國腳左閘今輪又以罰球入波,係自2015年以嚟第5個罰球聯賽入波,同中村俊輔並列係近4年罰球入波最多球員。

3.橫濱水手 - 上輪以8:2大勝仙台後,今輪又以2:5輸畀東京,單場失5球亦係水手球會史上失波最多一場賽事。

4.鹿島鹿角 - 今季攻力不振嘅鹿島今輪以6:2大勝柏雷素爾,係自2011年8月以嚟單場入波最多一戰。

5.湘南比馬 - 自2015年以嚟,有7場比賽領先到2:0,最終全部獲勝。

神戶勝利船 0:3 湘南比馬

鳥栖砂岩 0:1 仙台維加泰

名古屋鯨魚 0:0 廣島三箭


FC東京 5:2 橫濱水手

川崎前鋒 1:0 長崎勝利丸


大阪櫻花 1:1 浦和紅鑽


北海道札幌岡薩多 0:0 磐田山葉

鹿島鹿角 6:2 柏雷素爾

大阪飛腳 1:2 清水心跳

#北海道コンサドーレ札幌 #ベガルタ仙台 #鹿島アントラーズ #浦和レッズ #柏レイソル #FC東京 #川崎フロンターレ #横浜Fマリノス #湘南ベルマーレ #清水エスパルス #ジュビロ磐田 #名古屋グランパス #ガンバ大阪 #セレッソ大阪 #ヴィッセル神戸 #サンフレッチェ広島 #サガン鳥栖 #Vファーレン長崎 #Jリーグ

圖片:JリーグOfficial site
資料來源:J League情報站
https://www.facebook.com/jleagueinfo/

如果喜歡我們的文章,請即分享到︰

標籤: J League  J League情報站  

留言


請按此登錄後留言。未成為會員? 立即註冊
    快捷鍵:←
    快捷鍵:→