2018年8月第二周旅外球員一覽:堂安律荷甲建功 武藤嘉紀首踏英超賽場

J League情報站 於 14/08/2018 發表 收藏文章

隨住歐洲主流聯賽開波,又係時候出嚟簡單總結吓旅外日本球員每個禮拜嘅表現。隨住本田圭佑離開墨西哥去澳洲半踢半教波,以及小林大悟今年終於轉戰美國低組別聯賽,本站會介紹嘅旅外日本球員基本上都會集中返喺歐洲方面。



先講吓今年夏天日本旅外球員嘅變動,主要係因為國家隊喺世界盃表現出色,令比利時球隊樂於嘗試用日本球員,所以連同繼續留守比利時嘅森岡亮太同久保裕也,比甲今年有成7個球員,係僅次於德國嘅第二大戶。其中聖圖爾登就有3名日本球員,當然呢樣係同球隊係日資班主背景有關。武藤嘉紀由德甲轉戰英超就係目前日本唯一由歐洲聯賽轉到另一歐洲聯賽嘅球員,至於香川真司會唔會真係如傳聞般轉戰土耳其就要繼續留意。世界盃首席門將川島永嗣上季同梅斯約滿之後仍然係自由身,呢名35歲老將據聞仍然有法甲球隊想羅致,到底最終花落誰家仍然有待觀察。



講返上周末各旅歐球員表現,武藤嘉紀首次喺英超上陣應該係球迷們最期待嘅事,雖然佢只係尾段後備上陣,亦幫唔到紐卡素挽回敗局,但係可以首次踏足英超賽場,亦算係好開始。至於今季改着7號波衫嘅年青中場堂安律就繼續上季高效率表現,聯賽首戰就為格羅寧根入波,縱然球隊最終慘敗而回亦值得高興。植田直通亦喺上周末終於首次出戰比甲,亦協助色格拉布魯日作客逼和標準列治。至於小林祐希、酒井宏樹、酒井高德、長友佑都同南野拓實都以正選身份為所屬球隊取勝,另外上季幾乎冇機會上陣嘅小將冨安健洋同豊川雄太,今季都喺所屬球隊受重用,期望佢哋今季把握機會獲得更多進步。


紐卡素 1:2 熱刺
維迪斯 5:1 格羅寧根

斯禾利 2:3 海倫芬

旅外球員數據
武藤嘉紀 紐卡素(英超)主1:2熱刺 後備上陣9分鐘
小林祐希 海倫芬(荷甲)客3:2斯禾利 正選上陣90分鐘
堂安律 格羅寧根(荷甲)客1:5維迪斯 正選上陣90分鐘,入1球
長友佑都 加拉塔沙雷(土超)客3:1安卡拉 正選上陣90分鐘
酒井宏樹 馬賽(法甲)主4:0圖盧茲 正選上陣90分鐘
酒井高德 漢堡(德乙)客3:0辛特侯森 正選上陣73分鐘
伊藤達哉 漢堡(德乙)客3:0辛特侯森 後備上陣17分鐘
長谷部誠 法蘭克福(德超盃)主0:5拜仁慕尼黑 正選上陣90分鐘
中島翔哉 樸迪莫倫斯(葡超)主0:2博維斯塔 正選上陣90分鐘
植田直通 色格拉布魯日(比甲)客0:0標準列治 正選上陣90分鐘
遠藤航 聖圖爾登(比甲)主1:1洛格倫 正選上陣90分鐘
冨安健洋 聖圖爾登(比甲)主1:1洛格倫 正選上陣90分鐘
豊川雄太 奧賓(比甲)客0:0華利根 正選上陣90分鐘
南野拓實 薩爾斯堡(奧甲)主2:0奧地利維也納 正選上陣90分鐘

#武藤嘉紀 #小林祐希 #堂安律 #酒井宏樹 #中島翔哉 #植田直通 #遠藤航 #冨安健洋 #豊川雄太 #南野拓実

圖片:Getty Images
資料來源:J League情報站
https://www.facebook.com/jleagueinfo/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→