瞬間看意甲(第二輪):各隊全力開火狂轟43球 咸錫火爆連續兩場梅開二度

黑白意甲 於 07/09/2013 發表 收藏文章
本輪意甲上演入球show,十場波合共攻入43球,平均每場有超過4個入球,阿特蘭大贏拖連奴2比0已經係最少入球既一場,各隊既前鋒都表現出色各有收獲,睇黎經過各隊大力買入優質球星,今季意甲的確比過去幾季刺激精彩。

咸錫狀態火爆連續兩場梅開二度
本輪既入球盛宴先由拿玻里對基爾禾打頭陣,一黎就4比2送6個入球比大家,咸錫繼續佢火熱既狀態,13分鐘就黎個25米勁射先開紀錄,卡利祖亦連續兩輪入波,基爾禾就憑住帕路斯基梅開二度兩度追和,結果上半場2比2平手。睇返拿玻里所失既兩球都係後防混亂而失波,睇黎後防既問題仍然要賓帥諗辦法解決。

明顯地下半場拿玻里既防守有好轉,咸錫再次打破彊局連續兩輪入兩球,而對上一次能夠係意甲頭兩輪都梅開二度既球員係02-03球季既迪比亞路,咸錫已經成為意甲開季最火爆既球員。另外希古恩亦都開齋射入意甲首球,相信球隊同球迷都十分滿意。

之後就輪到我愛隊祖記出場,4比1橫掃拉素兩連勝,詳情見另文。
http://www.fanpiece.com/italy/c1095767.html

國米三場0失球
另一支兩連勝既豪門就係開季到而家仍然零失球既國米,連埋之前既意大利盃,國米已經連續三場0失球,呢個紀錄係上季從未出現過,馬沙利對國米既後防改造的確見效。國米呢場波既進攻比上場更加流暢,柏拉斯奥連續三場入波,狀態非常之好。而更令人意外既係長佑友都亦都連續兩輪入波,而且兩次都係頭鎚,入球之前亦有一個頭鎚僅僅俾對方門將救出,佢今場係左路非常活躍,最後艾華利斯既入球亦係由佢助攻。

巴神助攻入球無所不能
國米既同城球隊AC米蘭繼上場輸波之後亦打開勝利之門,主場3比1擊敗卡利亞里。今場艾格利出人意表地用羅賓奴正選同巴神搭檔,而羅賓奴亦不負所托8分鐘就先開紀錄。巴神就更加唔駛講,幾乎每個攻勢佢都有份參與,先係助攻羅賓奴,之後麥西斯既入波亦係佢射門被對方門將撲出造成,最後更加射入一球埋齋,亦係佢今季第一球,AC無咗佢真係唔知點算。呢個入波又係佢既招牌猛虎射球,門前十碼左右暴力轟門,連門將都怕咗佢。另外今場AC既中場明顯好咗,蒙達利同尼祖迪莊係中路既攻守作用好大,新援普利亦繼續佢上場出色既表現,有多次精彩既帶波過人。後防方面今場受既壓力不大,但以現時既人腳面對強隊就會有好大危機。

費倫恐怖組合開火 卡斯辛奴開齋

羅馬全場㩒住維羅納黎攻,最終係下半場10分鐘之內連入三球大勝對手,順利取得兩連勝。剛剛從費倫轉會既阿當拿積立即入咗球靚波,左邊禁區頂25米勁射死角,呢個新星一加盟就表現出身價,睇黎AC應該後悔無買佢。

費倫亦都大開殺戒,作客5比2大勝熱拿亞,羅斯仔亦都係連續兩場入波,今場仲要入兩球,另外佢既拍檔新援高美斯亦都梅開二度,之前我已經講過,佢兩個將會係今季意甲最恐怖既前鋒組合。
另一場烏甸尼斯順利擊敗帕爾馬取得首勝,值得一提既係卡斯辛奴頭鎚頂入咗加盟帕爾馬既第一球。

呢一輪既意甲唔單止入球多,而且各大前鋒都有入球,好多仲要連續兩輪入波,咸錫、迪維斯、柏拉斯奥、羅斯仔等,狀態非常之好,而巴神、高美斯、卡斯辛奴等亦相繼開齋,今季無論係球隊之間以及神射守既競爭都非常激烈。

今個星期係國家隊比賽日,意甲暫停,我地熱切期待下一輪既意大利打吡-國米主場迎戰祖記!


第二輪火爆之星
咸錫、巴洛迪利、羅斯

留言


請按此登錄後留言。未成為會員? 立即註冊
    快捷鍵:←
    快捷鍵:→