【戰術超人，收購不行？】 精選

舊年換人後入波係英超之冠，之前以韋根陣容打贏曼城攞足總杯，馬天尼斯嘅調動絕對唔係符碌。但係作為一個成功嘅領隊，球場上要調動得宜之外，轉會市場上亦需要買賣精明。雖然嚟咗愛華頓嘅日子尚短，但係其實已經過咗三個轉會期㗎勒，我哋不如一齊睇下馬天尼斯嘅購買紀錄啦！
高尼
抵買指數 ★
雖然好唔好彩地傷咗好耐，但係喺未傷之前嗰幾場表現非常差，對住空門都失機。買嘅時候已經29歲，以一個600萬英鎊嘅收購嚟講，絕對唔值。
艾卡拉斯
抵買指數 ★
又係另一個被傷患困擾嘅球員。艾卡拉斯買返嚟係諗住俾啲競爭一對中堅，但係舊年嘅表現非常非常差，穩健不足，信心欠奉。雖然係自由身加盟，但係以2萬磅週薪(之前賣咗嘅Duffy都係8千咋嘛)，絕對係唔值。
盧布斯
抵買指數 ★★
以300萬磅買個後備龍門嚟講，盧布斯認真麻麻。同艾卡拉斯一樣，佢表現騰騰雞雞，更加提供唔到競爭。好彩候活表現出色，不過始終盧布斯後生，尤其是龍門多數都遲熟，所以佢仲有機會表現自己嘅！

麥卡菲抵買指數 ★★★★
我相信好多人同我一樣，最初會覺得點解一個寂寂無名嘅中場會值咁多錢，不過而家出多一倍價錢我哋都唔會賣！佢而家已經係我哋球會裡面嘅中場發電機，球評家好多都認為佢比同類型嘅韋舒亞更加出色，係我哋不可或缺嘅一員。

麥基迪抵買指數 ★★★★
200萬唔夠，又正值大熟大勇之年，麥基迪解決咗愛華頓欠缺真正翼鋒嘅問題，近排表現更加漸入佳境，以一個個人盤扭能力咁高嘅球員嚟講，咁低嘅價錢絕對超值！

巴里
抵買指數 ★★★★
巴里同麥卡菲嘅組合舊年表現可人，雖然今年年初表現有啲跌watt，但係經驗搭夠，應該能夠重拾狀態。

比錫治
抵買指數 ★★★
問你400萬買個可以mark死美斯嘅中場你買唔買？令人驚喜嘅係佢嘅腳下功夫非常了得，雖然對車仔玩出禍，但係呢位踢中堅出身嘅防中絕對有機會可以成為未來嘅大將！
盧卡古
抵買指數 ★★★
抵就絕對講唔上啦，不過我哋絕對需要一名正前鋒。雖然到而家都仲未入波，但係以一名咁後生已經喺英超入咁多波嘅前鋒嚟講，2800萬磅係合理嘅。

伊度奧
抵買指數 ★★★★★唔駛錢，第一下掂波就入波，差啲助攻多一球，絕對係5粒星！世界級嘅前鋒，加埋經驗，人工都係55000磅週薪，抵到爛！

咁睇落去，其實除咗韋根四子之外(唔計麥卡菲)，馬天尼斯嘅收購都唔錯。當然啦，仲有啲後生嘅未有上陣機會，好似加路威，史坦尼克咁。希望之後嘅收購會更加好啦！同埋真係要諗下個中堅位！
Like我地個專頁啦！