【傳奇人物】Legend Series 鄧肯 費格遜 Duncan Ferguson

【傳奇人物】Legend Series

鄧肯 費格遜 Duncan Ferguson

出生日期:27/12/71(43歲)

國籍:蘇格蘭

位置:前鋒

身高:6尺4寸

曾穿號碼:9,24,10

第一次首先要介紹嘅係小弟兒時最愛,”空中霸王“鄧肯費格遜。佢英超生涯裏面入咗68球,其中有35球係用頭槌攻入,頂上功夫絕對係數一數二。

除咗頭槌出名,提起鄧肯絕對唔可以唔講佢嘅脾氣。未加盟愛華頓之前,當時效力格拉斯哥流浪嘅佢,已經因爲用頭槌撼對方球員而惹上官非,更因此而被判監三個月。後來於95-96賽季,鄧肯費格遜被借往愛華頓三個月,期間表現出色,最後被永久羅致。佢可以講得上係一名BigGamePlayer,每逢對住曼聯同利物浦都有上佳表現。

1998年,當年嘅主席PeterJohnson未徵詢領隊WalterSmith同意下,私自將鄧肯費格遜以800萬英鎊賣俾紐卡素,傷盡球迷嘅心。幸而於00-01年賽季,愛華頓再一次將鄧肯費格遜帶返葛迪遜球場。及後,隨住年紀同傷患問題,鄧肯費格遜表現已經未如從前。2005-06年賽季後,當時領隊莫耶斯拒絕給予鄧肯費格遜一張新合約,因此鄧肯決定退休,結束佢嘅職業生涯。於聯賽最後一場賽事,對住西布朗嘅賽事中,鄧肯費格遜戴住隊長臂章為愛華頓攻入最後一球,為職業生涯劃上完美句號。

因爲莫耶斯決絕給予新合約,鄧肯一直唔服氣,甚至離開時亦拒絕同莫耶斯握手。之後嗰五年鄧肯同屋企人搬咗去西班牙嘅馬略卡住,一路拒絕同外界接觸。2010年,鄧肯費格遜主動同莫耶斯道歉,兩人冰釋前嫌,莫耶斯更安排費格遜參與預備組嘅培訓工作,因此壞孩子終於再一次回家。
而家嘅佢,已經升為FirstTeam嘅教練,為愛華頓繼續效力!

「雖然我曾經為其他嘅大球會上陣,但係我心目中,我好似淨係效力過愛華頓咁。效力愛華頓嘅十年係我最開心嘅時間,我永遠唔會忘記各位咁愛戴我嘅球迷!」- 鄧肯費格遜於名人堂晚會上 http://youtu.be/XyvD_YqhTn0?t=2m55s
標籤: 傳奇人物  Legend Series  

留言


請按此登錄後留言。未成為會員? 立即註冊
    快捷鍵:←
    快捷鍵:→