首任正選，前港甲內援陳志釗 閃耀巴西！（連肥哨都讚！） 精選

「中國製造」威到巴甲！多個海外傳媒報道，哥連泰斯尋日喺聖保羅州聯賽揭幕戰以1:1打和保利斯達，嚟自中國嘅陳志釗 Zizao 加盟後第2次上陣，首次打正選即刻交出「森巴味」靚助攻，連朗拿度都忍唔住喺twitter讚佢 （釗仔大放異彩！），甚至有球迷癲到話佢會勁過美斯！而事實上，「大哨」在去年已看好他有力立足巴甲。

插花落底傳中造就隊友
現年22歲嘅陳志釗喺廣州番禺出生，能打右中場及前鋒，07年曾經加盟港甲嘅公民，前年離開中國登陸巴甲，可惜因為受傷，只試過喺上年10月嘅巴甲後備入替。直到尋日對保利斯達，「釗仔」終於把握首次打正選機會騷哥厘，全場有3次左路突破成功，包括博到對手攞黃牌同交出助攻。
陳志釗今季由200號轉冧巴變35號，表現相當活躍，踢到58分鐘嚟料，响左路擺脫對手後再殺入禁區用「單車腳」插花，然後傳中造就祖雲尼比高洛莫射入空門，賽後哥連泰斯官網用「釗仔」比賽嘅相配合標題表揚呢位昔日「中超美斯」，《環球體育》同《蘭斯體育》亦勁讚佢。

釗仔助攻精華：http://www.youtube.com/watch?v=p02lM48C2KE
「海報男」水皮葡語受訪其實「釗仔」加盟「Timao（哥連泰斯外號）」，一直畀人唱係球會開發大陸市場嘅產物，SportTV駐亞洲記者Alencar直情笑過佢「响中國都冇乜名氣」添，但經過尋日一役，不單止有粉絲高舉「Zizao（志釗Zhizhao國語發音巴西化名）勁過美斯」標語撐場，洗脫佢「海報男」嘅冇用形象，朗拿度更引用前幾年佢踢哥連泰斯時，評述員讚佢嘅說話作出鼓勵：「陳志釗喺哥連泰斯大放異彩！」賽後「釗仔」被記者包圍，除咗「Estou happy（我好開心）」、「Obrigado（多謝）」講得最流利之外，都嘗試用勁水皮嘅葡語受訪︰「我唔識點講，入波大家都有功勞，我哋依照教練要求比賽，呢樣係最重要嘅。」而釗仔賽後也大受網民歡迎及支持。

聽日對邦迪比達繼續擔正
雖然新加盟嘅柏圖，嚟緊如無意外係哥連泰斯必然正選，但教練迪迪承諾繼續畀機會陳志釗：「我希望球隊可以延續現時嘅狀態，所有球員，包括陳志釗在內，演出都超乎我預期！」據《蘭斯體育》尋晚嘅消息，嚟緊星期三對邦迪比達嘅賽事，陳志釗會再一次擔正。


-------------------


陳志釗上年離鄉別井由中國遠赴巴西踢波嘅陳志釗，尋日朝喺聖保羅州聯賽為哥連泰斯正選落場兼交出助攻，總算捱到出頭天。當佢講番呢一年嘅甜酸苦辣經歷時，第一時間歸功畀陪伴出國、無微不至照顧佢嘅廿四孝母親。
拒絕夜蒲練大隻適應巴甲
去年初由上海申鑫外借加盟哥連泰斯嘅陳志釗，因為葡語唔夠流利，要適應巴西生活倍感艱難。不過喺過去一年只有20分鐘上陣時間嘅佢，並冇輕言放棄，即使哥連泰斯出戰世冠盃時唔喺大軍名單，佢就選擇返香港喺曾經効力嘅公民跟操，保持狀態靜待機會。

早前陳志釗接受《環球電視》訪問時，就透露幫佢成功捱過以上一切嘅「功臣」：「媽咪喺我生命中非常重要，我想用入波嚟多謝佢。」雖然佢暫時未能如願，但今場交出一個助攻，相信一直喺身邊照顧囝囝嘅陳媽媽，都已經滿意。佢同時亦感謝體能教練法比奧改善其身體素質，能夠應付巴西足球踢法。

至於喺巴西嘅生活，陳志釗最鍾意食以黑豆、肉塊、豬耳等製成嘅巴西傳統美食Feijoada，佢亦未有受聖保羅多姿多采夜生活引誘，只係經常去有「小日本」之稱嘅Liberdade逛吓。
---------

公民職球員反應：
•趙俊傑（公民球員）
08年我踢大埔嗰陣曾經喺足總盃決賽同佢交手，早知佢又快又好波。到上次佢返嚟公民跟操，我覺得佢好似又「升咗呢」！其實當見到曾經喺香港搵食嘅球員去到外國取得成功，我真係好開心，我諗香港球員都有能力做到，只係欠缺咗啲決心。

•黃耀富（公民球員）
佢當年去公民之前去過港會試腳，只係業餘球隊幫唔到佢搞工作證，最後先去咗公民。佢高我唔係好多，但非常健碩，舊年喺巴西練波膊頭甩骹，之後佢就狂做舉重鍛煉上身，真係服咗佢。但巴西球壇未必接受到華人揚威，嚟緊小心畀人踢傷呀！
•貝可泓（公民教練）
佢能夠喺巴西取得好成績，我哋梗係開心，但始終佢只係踢緊州聯賽，究竟有冇實力喺巴甲立足仲要時間證明。我聽聞嗰邊嘅教練其實都好欣賞佢，想畀多啲機會佢，最好係佢嚟緊愈踢愈好，等我哋可以喺電視睇到佢演出啦！阿釗祖家在番禺，不過公民的宿舍亦算是他的『家』，因為他每次放假或空閒便會來港跟操，球會宿舍有他床位，與公民隊友關係亦很密切，如「自己人」一樣，就像從未離開過般。

球迷點睇？
•Paulo Glu（巴西網民）
老實講，佢嘅努力得到回報，但係從技術層面講，只有對住啲實力較次嘅對手，佢先有機會出場。

•Robson Jesus（巴西網民）
球場上表現最好嘅一個，每次佢攞到波都會向前。
•Marcelo Peres（巴西網民）
吹呀吹……「釗仔」勁過美斯、卡卡……吹呀吹……「釗仔」勁過比利、加連查……
--------
陳志釗與Goal.com於2012年尾的訪問

http://www.youtube.com/watch?v=kxSi2Z6utXA

• 「釗仔」小檔案
  出生日期：88年3月14日（24歲）
  出生地點：中國廣東省番禺市
  身高：1米70
  最佳位置：翼鋒/進攻中場/前鋒
  榮譽：08年香港足總盃冠軍
  現効力球隊：哥連泰斯
  曾効力球隊：南昌衡源、公民

希望釗仔加油，繼續進步！

（來源：晴報、東方日報、太陽報、網上綜合資料、圖片）