【東方亞冠之路】恆大7-0東方 精選

東方亞冠第一場比賽，就要作客廣州面對住熱門恆大。同賽前普遍預測一樣，東方最終難免被大炒。

由於發生行政失當，令東方要喺0客隊球迷嘅天河體育館苦戰，開波只係3分鐘，主隊一次右路角球，門前混亂下近柱嘅黃梓浩疑似手球，將對方嘅必入球撞出，被罰紅牌兼12碼，高拉特完成任務，恆大極速領先1-0。22分鐘，又係角球惹禍，保連奴接應角球球槌攻門，英雄輝及時拍出，但被王上源門前執雞搞掂。短短3分鐘後，今場出奇正選嘅「聰頭 」黃志聰禁區犯手球，但阿倫嘅12碼比英雄輝救出，保住2-0嘅局勢。
可惜去到32分鐘，廖力生門前無人看管下射入，恆大領先3球。1分鐘後，東方再有聰頭2黃1紅被逐，東方打少2個。東方明顯形勢極差，臨完半場主隊有多次黃金機會，包括鄭智同阿倫嘅多次埋門，都被阿輝一一化解。半場東方食3蛋入更衣室。

下半場開波後，恆大繼續輕鬆主導形勢，47分鐘廖力生再接應傳中頂入。恆大領先到4球後將節奏稍稍拖慢，直到66分鐘阿倫左路推至禁區頂勁射，收死葉鴻輝，東方食到第5隻蛋。82分鐘，保連奴喺禁區頂一路推，一路推，再射一腳遠程炮，入到個人第2球。2分鐘後，東方已經可以話係「 全軍覆沒 」，王上源近門抽射入網，比數去到7-0，最終呢個比數亦一直維持到完場。
東方今場2分鐘就打少個，去到34分鐘更打少2個，令牛丸嘅部署付諸流水。總總賽前未能預測嘅不幸局面，再加上賽前牌面已輸一仗，令東方最終慘呑7蛋，猶如一隊港會、富力。但7球失球又是否完全不能避免？

首先，黃梓浩嘅手球鏡頭未算交代得非常清楚，究竟係頭定手將波撞出，相信只有「王子」先知。東方喺角球亦明顯輸蝕，爭頂、走位都有問題，當中東方第2球失球就係因為mark人唔成功而造成。另外，東方失嘅第4球係筆者最失望嘅一球，廖力生近門接應郜林嘅左路傳中，當中白鶴只係「睇波」，令人憤慨，絕對要為呢個失球負責。東方今場打少2球個雖然係比大炒嘅其中一個因素，但有球員嘅表現的確未算特別理想，再加上賽前嘅關公災難，令唔少球迷都對球隊反感，筆者只希望東方能夠檢討好自身問題，希望能夠喺主場嘅比賽力爭分數，用表現打破球迷嘅不滿！
圖片來源：東方龍獅足球隊fb
~~~~~~~~~~
本專欄會從不同角度，與球迷分享有關香港足球的所見所想。同時亦希望能吸引更多球迷入場欣賞本地波嘅賽事，為香港足球加油！

本專欄每月會出4-5篇文章，當中會有分析，講解或其他唔同類型嘅文章。

facebook page ：香港足球

https://www.facebook.com/%E9%A6%99%E6%B8%AF%E8%B6%B3%E7%90%83-103406636843347/posts/