【簡評】香港冬季轉會窗 交易

香港足球 於 01/02/2017 發表 收藏文章
踏入2月,意味著香港嘅冬季轉會窗已經正式完結,雖然冬季轉會窗通常都係比較靜,但今年都算係有幾單“大”交易,下文將同大家簡單講一講。

1)賴恩格菲斯 南華->西悉尼流浪者 (ST)

第一單就梗係講啲「開心事」,呢位經常被球迷話係“最hea外援“嘅賴恩格菲斯終於離開南華,返到去澳職聯踢波。呢位35歲嘅前澳洲國腳2016年初由馬超球隊砂拉越 上山,加盟球隊1年多,射入11球。雖然睇數據唔算太差,但今季上陣8次入0球,再加上體力問題同比賽中前場跑動未算積極,令球迷對呢單轉會普遍都表示歡迎。

2)陳肇麒 ---HKD 200000 南華-> 香港飛馬 (ST)

第二單就同大家講講呢單由1月初已經開始傳出嘅"大花生",當時陳7喺對南區一戰中並冇上陣,引發離隊傳言,後來更被南華指有違職業操守。後來南華同飛馬嘅轉會費又"傾唔掂數",令轉會一直無法實行。而且當時隊友羅素獲球會免費放人,令陳7有感待遇不公,加劇與會方嘅矛盾。直到1月27日,轉會窗即將關閉之際,南華願意將費用由最初嘅120萬減至20萬,令交易能夠完成。
陳7近年喺南華失去正前鋒嘅位置,改踢翼鋒,令入球數字大減。今次再返到羅生 羅太之下,有望返到去正前鋒嘅位置,並可能喺沙華復出後,一同擔任正前嘅角色。同時,呢個收購亦為飛馬除黎洛賢、梁嘉恆、查維斯外,提供更多前場球員嘅選擇,相反南華同時失去2位前場球員(陳7、賴恩格菲斯),雖然有新援麥高派路域加盟,但亦無疑會影響板凳深度。

3)華杜斯 孟買城->傑志(CM) 金東進 首爾依戀-> 傑志 (LB CB)

2位同為前國腳級人馬,傑志重金簽入並希望協助球隊喺亞冠盃外圍賽取得好成績。2位都為傑志喺聯賽、銀牌同亞冠上陣幾次,雖然表現未至於十分特出,但豐富嘅國際賽經驗,對傑志球員嘅成長同埋亞冠之路絕對有幫助。

4)馬高斯 自由球員-> 冠忠南區 (ST) 內田智也 橫濱FC-> 冠忠南區 (CAM)

隨著法國前鋒禾達離隊,冠忠南區簽下2位前場球員。第一位就係傑志棄將,32歲嘅西班牙前鋒馬高斯。呢位留長鬚嘅球員喺傑志上陣4場但冇取得入球,球迷對佢嘅評價亦唔算太好。但係去到南區後,馬高斯嘅前場表現明顯較活躍,相信亦同鄭兆聰教練嘅指示有關,而且球迷對佢嘅評價亦比傑志時好,相信馬高斯嘅加盟會有助南區爭取較前嘅聯賽排名。
第二位嘅球員,就係經前夢想駿其球員福田健二推介嘅日本進攻中場內田智也。33歲嘅佢只係為南區後備出場過2次,所以佢技術算唔算了得就仲未知,但佢十分受歡迎就大家都知。因為喺對傑志嘅比賽中,佢就有FANS專情由日本黎到香港支持,可見佢受歡迎嘅程度。
南區原本已有陸志豪、蘇沙、迪基圖等好波之人在陣。再加上兩位新兵,進攻威力不容忽視,對手必須打醒十二分精神。

5)伊達 新疆天山雪豹->和富大埔 (CAM)

高齡港腳伊達喺效力中甲球隊新疆天山雪豹一季後,決定回流港超,加盟今季升班並取得唔錯成績嘅大埔。37嘅伊達喺香港踢過多年,應該會非常習慣香港嘅環境,再加上同中場隊友陳俊樂喺港隊合作過,隊內又有唔少巴西兵(伊達原籍巴西),包括另外一位中場隊友大衛拉菲爾,默契絕對唔成問題。伊陣達只係上陣3場就明顯加強球隊嘅進攻威力,並喺對流浪一場中取得入球,球隊更分別逼和東方及小勝傑志。因此,伊達嘅加盟為大埔嘅中場攻力加強唔少,有望喺列強身上搶分。

其他轉會:
吳偉超 -> 東方
麥高派路域 -> 南華
摩域治 李吉勳 -> 標準灝天
謝家榮 貝治 -> 理文流浪
李毅凱(租借)楊賜麟 -> 香港飛馬


小結
今季冬季轉會窗屬較熱鬧嘅一年,當中有唔小新加盟港超聯球隊嘅球員,都大有來頭,筆者衷心希望佢地可以喺香港發展成功,亦希望離開球會嘅球員,能為新球隊作出更大嘅貢獻。

圖片來源: 各球會fb, oncc, apple daily

~~~~~~~~~~
本專欄會從不同角度,與球迷分享有關香港足球的所見所想。同時亦希望能吸引更多球迷入場欣賞本地波嘅賽事,為香港足球加油!

本專欄每月會出4-5篇文章,當中會有分析,講解或其他唔同類型嘅文章。

facebook page :香港足球

https://www.facebook.com/%E9%A6%99%E6%B8%AF%E8%B6%B3%E7%90%83-103406636843347/posts/

標籤: 轉會  港超  傑志  南區  南華  大埔  

留言


請按此登錄後留言。未成為會員? 立即註冊
  • Ringo418 於 01/02/2017 評論 NO. 1

    好文

  • 香港足球 於 01/02/2017 評論 NO. 2

    多謝球迷支持

  • 香港足球 於 01/02/2017 評論 NO. 3

    請like香港足球 fb

快捷鍵:←
快捷鍵:→