【球星講台】馬天尼斯 • 鐵漢柔情

香港足球 於 17/07/2017 發表 收藏文章
冠忠南區上季勇奪季軍,今季班主加班費並更換部分外援,而巴西外援杜馬斯嘅位置,就係被新兵馬天尼斯 ( Carles Marc ) 『搶去』。我地就揾到Marc講下自己加盟嘅感受同展望!

首先就請Marc簡單地介紹自己『大家好,我叫Carles Marc,司職防中同中堅,我來自西班牙嘅華倫西亞,出身於華倫西亞青年軍,及後曾經喺西班牙,波蘭同羅馬利亞踢波。』

出身華倫西亞青年軍


Marc 14歲嘅時候,得到華倫西亞嘅球探賞識,加入華倫西亞青年軍,之後就踢過預備組同一隊。唔講唔知,Marc更曾為西班牙u16/17上陣,同過唔少頂級球星,例如曼聯嘅馬達一同上陣!

Marc係6號仔,而係佢隔離嘅就係8號仔馬達

於西班牙多年打拼


2010年,Marc離開華倫西亞,繼而喺西乙打滾多年,2016年離開西班牙, 並於同年先後加盟波蘭同羅馬尼亞嘅球隊,2016年7月返到西班牙,成為西丙球隊 古祖洛重要一員,上陣31場。最終今季加盟南區,『其實我當時有唔少選擇,包括西班牙同波蘭嘅球隊,但南區為我提供咗好好嘅報價,加上我未黎過亞洲,所以我希望透過加盟香港球隊,開拓自己喺亞洲嘅市場。』

Marc今季加盟南區

需要適應天氣

上星期先落機,但Marc已經對香港印象唔錯『我對香港嘅第一印象,就係覺得香港係一個好大同發展非常完善嘅城市。不過香港嘅天氣就唔係太好,成日都非常高溫度同濕度,需要時間適應。』Marc下季又有咩目標?『首先我希望能夠盡快適應比賽嘅節奏同埋天氣。作為一個技術型球員,我希望利用自己對足球嘅熱情同埋技術,平衡球隊攻守嘅轉換,協助球隊爭取比上季更好嘅成績。』


享受西班牙足球

踢過唔同大大少少嘅球隊,10年嘅職業生涯,Marc最享受自己為華倫西亞上陣嘅日子『華倫西亞就好似喺我個心裡面咁,而且西班牙係我嘅家鄉,所以我好享受當時嘅日子。另外,喺波蘭踢頂級聯賽嘅日子亦好值得我回味。』

Marc 出身華倫西亞青年軍

鍾愛馬斯查蘭奴

講到自己嘅偶像同座右銘,Marc就話係巴塞後衛馬斯查蘭奴『佢係一個非常穩定嘅球員,經常維持高水準嘅演出。』至於座右銘,『Fighting for my dream係我嘅座右銘,細個屋企人供我踢青年軍,令我時刻記住要堅持為夢想奮鬥,唔好浪費佢地嘅心血。』

Marc亦曾上陣對馬體會

多年征戰西班牙球壇,Marc又有咩秘密武器呢?『武器就講唔上,要保持高水準嘅演出,我嘅秘密可以話係熱情 同埋 要對訓練非常認真!』

愛情路上專一


最後同Marc傾到佢嘅家庭,估唔到原來球場上嘅硬漢亦有長情一面「我已經同女朋友拍拖16年,不過就仲未打算結婚同生小朋友。」

小結

南區有唔少西班牙人,包括馬高斯、加拉度,相信Marc同隊友嘅磨合亦唔成問題。加上多年西甲、國家隊嘅經驗,Marc絕對能夠成為球隊主力,希望Marc能夠達到自己嘅目標,協助南區爭取錦標,繼續Fighting For Your Dream!

標籤: 南區  馬天尼斯  香港足球  港超  垃圾波  

留言


請按此登錄後留言。未成為會員? 立即註冊
    快捷鍵:←
    快捷鍵:→