【東方亞冠之路】東方1:1 川崎前鋒

香港足球 於 01/03/2017 發表 收藏文章
東方1-1川崎前鋒

東方喺旺角大球場完成球隊首場嘅亞冠主場比賽,賽和打少2個嘅川崎前鋒。

由賽前被一致睇死,到對方囉第一張紅牌,東方同你講:只係需要13分鐘!上半場13分鐘,洛迪古斯右路爆入禁區被剷跌,奈良龍樹被罰紅牌出場並有12碼。東方由洛迪古斯輕鬆射入。雖然打多個,但東方始終實力有限,上半場形勢依然一面倒係川崎前鋒嘅攻勢,東方只能憑偶有嘅反擊攻勢,不停利用麥基嘅速度製造威脅。相反川崎前鋒攻勢明顯更多,幸好東方後防並無大犯錯,半場小勝一球。

川崎前鋒下半場立刻換人 加強攻力,換人7分鐘後就見效,拉爾拿亞喺禁區後傳比隊友板倉滉剷入,迅速追和1:1。東方嘅失球將成場波推至高潮,雙方都希望取得入球,喺小組賽中搶分突圍。東方先有球員接應白鶴嘅罰球抽射,但中楣而出,及後又有米曹嘅頭槌被護空門,實在非常可惜。川崎前鋒亦有唔少具威脅嘅攻門,包括80幾分鐘喺禁區嘅近門施射,幸被葉鴻輝擋出。正如前文所講,雙方都非常渴望取得3分,正因如此,犯規次數亦有唔少。補時階段,川崎前鋒終於要為連續幾次嘅惡意侵犯付上代價,拉爾拿亞領紅牌被罰出場,可惜東方未開罰球就吹完場,未能完成最後嘅攻勢。

東方今場能夠賽和川崎前鋒並非完全因為2張紅牌,球員嘅表現亦絕對值得呢1分。英雄輝幾次嘅關鍵撲救,中堅羅拔圖同米曹嘅穩定演出,多次解圍、攔截、包位成功化解對手大部分攻勢。而防中白鶴嘅表現亦有改善,尚算可以接受。而翼鋒麥基嘅表現更係超水準,東方絕大部分嘅反擊都係靠後防球員長傳比麥基快速推進同佢個人喺邊路嘅突破,為川崎嘅後防帶黎非常大嘅威脅。相信牛丸應該有落order ,希望好好利用麥基上場對恆大未算太有用嘅速度,令東方嘅反擊更有效。

另外,川崎前鋒始終今場大部分時間打少個,而且有唔少副選球員上陣,令呢隊日本代表嘅實力大減,亦係同東方打和嘅主因之一。最後,亦有一個較唔科學嘅原因,旺角場呢塊福地的確為球迷帶黎唔少美好回憶,有港中大戰,有南華逼和柔佛DT,今場東方守和川崎前鋒,可能亦得到呢塊福地嘅「保佑」。

最後,我想講講牛丸嘅排陣。筆者並非教練,所講嘅意見未必太專業。雖然牛丸排出3防中,希望堵截對手嘅中路入鍥,球隊表現的確有改善,但打少個嘅川崎前鋒將攻勢轉移到左右路,東方受嘅威脅亦唔少,因此筆者因為東方必須增強閘位嘅防守,否則3防中亦未必有太多作用!

圖片來源:東方足球fb
請like香港足球FB

如果喜歡我們的文章,請即分享到︰

標籤: 東方  

留言

會員
我要評論
請按此登錄後留言。未成為會員? 立即註冊
  • Stevengngng
    Stevengngng 於 01/03/2017 評論 NO. 1

    😭

  • Jason514
    Jason514 於 02/03/2017 評論 NO. 2

    中場增完防守 又增埋左右閘 下場實守得住💪

  • Chi Lik Chui
    Chi Lik Chui 於 02/03/2017 評論 NO. 3

    領先1比0 打多人哋一個 咁都攞唔到3分 作客肯定畀人大吵 嗰個牛丸都唔知點排陣 交學費先啦 有排學嘢呀牛丸……!!

  • Danny Lau
    Danny Lau 於 02/03/2017 評論 NO. 4

    其實呢一分都睇到實力差距, 首先人哋一定留咗力, 其次東方喺好早段已經打多人一個, 第三東方佔主場之利, 結果係以艱難嘅形式攞一分…… 其實都幾可悲

  • GWFX Global
    GWFX Global 於 02/03/2017 評論 NO. 5

    打多兩個,應該要全取3分先係。btw,希望可以下場贏水源三星

  • Joe Leung
    Joe Leung 於 02/03/2017 評論 NO. 6

    日本,韓國 ,大陸 直頭係當香港 球隊係二三流貨色, 更加比不上星加坡, 但係禽日打到 好多球員都賣老抽, 香港球隊有幾何對咁強嘅對手, 贏唔到係有少少失望, 又去現場睇嘅人 絕對收貨! # 入場支持本地球隊好重要#

  • Hung Tak Lai
    Hung Tak Lai 於 02/03/2017 評論 NO. 7

    見到川崎咁屎,恒大知道自己出線無懸念,中超可以獨大亞冠

  • Henry Lee
    Henry Lee 於 02/03/2017 評論 NO. 8

    其實已經盡左力啦,人地係日職第二球隊,差唔多係英冠鬥非聯賽球隊啦,唔洗甘刻薄既 , 打到戰術要求,博盡,教練换人決斷,晏間全攻型俾人炒,d人又抽水啦... 算係甘啦(但梁主席之前處理波飛真係差!)

  • Chris Fan
    Chris Fan 於 02/03/2017 評論 NO. 9

    邁向亞洲班霸,復興遠東足球王國之路

  • Gary Lee
    Gary Lee 於 02/03/2017 評論 NO. 10

    其實邊個人對東方有厚望? 歐聯分組賽時冇魚腩隊嘅咩? 本身實力差兩班波傻嘅都睇到,又邊個覺得眾人皆醉佢獨醒咁勁咁。我地香港人就梗係支持本地球隊,打得好有拼勁就係好野。

  • Tsz Chun Ronald
    Tsz Chun Ronald 於 02/03/2017 評論 NO. 11

    對方有中村既話中路應該仲辛苦

  • Kit Tang
    Kit Tang 於 02/03/2017 評論 NO. 12

    人地小打一人兼半力出戰,都係果句東方吾增援無得打。

  • Michael So
    Michael So 於 02/03/2017 評論 NO. 13

    麥基右路爆入禁區被剷跌.............???????

  • WonG WaI
    WonG WaI 於 02/03/2017 評論 NO. 14

  • Daniel Cheong
    Daniel Cheong 於 02/03/2017 評論 NO. 15

    其實亞協盃真係適合港超聯D球隊多D、實力唔會差太遠,升级打亞冠真係完全唔係個皮,甚至比人大炒多。

  • 林向東
    林向東 於 02/03/2017 評論 NO. 16

    現實就個個都知唔夠打啦,根本就志在參與,製造足球氣氛給香港人,唔好乜9都反,

  • 黎永亮
    黎永亮 於 02/03/2017 評論 NO. 17

    的確唔係因為2張紅牌,第2張去到尾先出現,最多都係因為一張啫。。。

  • Danny Ngan
    Danny Ngan 於 02/03/2017 評論 NO. 18

    曾錦濤成日輸身後波,兩閘的確較弱,幸好中堅表現穩定。。先自力保1分

  • Alex Wong
    Alex Wong 於 02/03/2017 評論 NO. 19

    體力問題最嚴重,打多一個都兩三件抽筋,人地神早打少個80分鐘後越踢越有

  • Tsubasa Sasaki
    Tsubasa Sasaki 於 02/03/2017 評論 NO. 20

    攞到一分已經好好,繼續加油!

  • 返身戰
    返身戰 於 02/03/2017 評論 NO. 21

    球十二碼我睇唔出有犯規 仲竟然紅牌 好嘢

  • Samson Lau
    Samson Lau 於 02/03/2017 評論 NO. 22

    本身差人地幾班,一早領先一球踢多個!都唔放開來踢=等死!

  • Shing Hin Wong
    Shing Hin Wong 於 03/03/2017 評論 NO. 23

    前峰依d搵食波 次次亞冠都揸流攤
    對手打少個都唔贏
    上次就話無野好講姐
    話哂今次自己主場又順風
    咁既表現難以接受
    依舖要檢討啦

快捷鍵:←
快捷鍵:→