唐建文——鐵血防守 實而不華

香港足球 於 15/03/2018 發表 收藏文章
無論你有冇睇琴晚傑志對柏雷素爾嘅比賽,相信你都知道年僅20歲嘅鄭展龍,補時階段射入世界波,協助打多個嘅「藍鳥」絕殺對手。但當你仲沉醉緊喺「泡泡龍」嘅入波嘅時候,其實傑志嘅其他球員,同樣值得大家嘅掌聲,由屢救險球嘅鵬哥(雖然琴晚都派咗少少膠),到成功封阻對手兩次空門機會嘅後防,再到全場不斷跑上跑落嘅中場,最後再到以艾力士、科蘭為首嘅前線。當中不得不提嘅,就係傑志右閘唐建文『唐文』。

/對手15分鐘嘅紅牌 成為賽事轉涅點/

唐文嘅表現,相信有入場嘅你一定知:當球星級嘅科蘭都有被球迷鬧嘅時候,球迷們對唐文琴晚嘅表現可以話係有讚冇彈,「唐文真係好X勁」「世界級後衛」多次出現係作者嘅耳邊。當然,呢d讚賞可能過於誇張,但無可否認嘅係,唐文絕對係傑志全場打得最好、最穩定嘅守將 – 面對打少個仍不斷挑戰藍鳥後防嘅對手,唐文嘅責任就更為重大,因為若果傑志係大好優勢下全失三分,四人後防將會受千夫所指。結果唐文不負教練朱志光所託,全場Mark人、緊逼、鏟奪等防守工作做到足,面對無論身高同體型,都冇得鬥嘅拉蒙盧比斯,唐文可以話係完全冇驚過,更多次成功從對手腳下搶返控球權。下半場唐文更加勇於參與進攻,可惜幾次右路傳中都無功而還。所以話,唐文全場嘅表現可以用八隻字黎形容:『鐵血防守 實而不華』。

/唐文全場表現非常穩定 多次將對方攻勢瓦解/
33歲嘅唐建文同教練朱志光緣分始於2000年,當時朱sir執教福建並將踢前鋒嘅唐文改造為右閘,九年後輾轉加盟傑志,可惜係甘巴爾摩下受傷患影響,出場機會唔多下離隊。唐文2012年加盟飛馬,表現開始受球迷肯定,更成為球隊隊長,三年後再次重返傑志,結果一踢就踢到今日。

/唐文同朱sir嘅關係始於球隊福建/

唐文實力近年受球迷肯定,加上穩定嘅表現令唔少球迷一直期待佢可以入選港隊,睇返資料,原來唐文2013年曾經入選省港盃名單,可惜天意弄人,受傷患影響下錯失穿上港隊波衫嘅大好機會。希望唐文可以憑近期嘅高水準演出,同入球功臣鄭展龍一齊,雙雙獲補選入港隊,代表香港作客北韓!

/期待兩名土炮一齊入選香港對北韓嘅名單!/

唐文同鄭展龍嘅好表現再一次證明,香港球隊要有好成績,唔一定要透過重用入籍球員,相反,年輕土炮若過有更多機會上陣,香港將會有更多『唐文』嘅出現!

圖片來源:香港01 體路 UPOWER

如果喜歡我們的文章,請即分享到︰

標籤: 傑志  亞冠  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→