爭氣的一分鐘 - 馬里安奴

HOMME快報 於 02/03/2020 發表 收藏文章
昨夜西甲國家打呲落幕,皇馬以兩球擊敗巴塞重奪西甲榜首位置。今仗除對首個入球者雲尼斯奧斯及銀河艦隊非常重要外,對馬里安奴嚟講可能更加意義非凡。

馬里安奴 (Mariano Díaz) 為皇家馬德里自家青訓出品,16/17球季首次為一隊上陣,分別於西甲、歐聯、國王盃都獲得上陣機會共14次,為球隊攻入五球。皇家馬德里最後於該個賽季勇奪西甲、歐聯、世冠盃、歐洲超級盃等等,馬里安奴一眾後備兵絕對功不可沒。


當時銀河艦隊鋒線星光熠熠,除必然正選C朗、賓施馬外,球隊亦有出場排名較馬里安奴前嘅莫拉達、阿辛斯奧等等。為爭取上陣機會,馬里安奴選擇離隊他投,於2017年夏天以800萬歐元超低價轉投法甲里昂。

轉投法甲後,馬里安奴以表現證明自己值得於歐洲球壇佔有一席位。馬里安奴於里昂一年時間,為球隊上陣45場就攻入21球,並交出6個助攻,助里昂取得歐聯參賽資格吸引不少豪門注意。


2018年夏天,皇家馬德里當家射手C朗拿度離隊,而馬里安奴之前嘅競爭對手莫拉達亦於上個賽季離隊。正當西維爾已經接近完成馬里安嘅收購之際,銀河艦隊決定行使回購權以3000萬歐元將馬里安奴帶回球隊,當時認為時機成熟、機會來臨嘅馬里安奴亦義無反顧重返班拿貝,帶著「C朗接班人」、「新七號」等希望開始賽季。


不過世事總是不如人意,C朗拿度離隊後球隊渡過一個令球迷無法接受嘅賽季,於歐聯十六強就被阿積士淘汰出局,西甲最後亦只得第三位。與於里昂時差不多踢足相比,「新七號」馬里安奴於賽季亦不太獲球隊信任,整季只能為球隊上陣19場,以4個入球完結一個令人失望嘅賽季。

2019年夏天,皇家馬德里展開重建,分別大手購入夏薩特、文迪、祖域等等球星。當中以6000萬歐元由法蘭克福轉投嘅盧卡祖域 (Luka Jovic) 對馬里安奴影響最大,呢位多米尼加又再淪為球隊三號前鋒。即使祖域未能融入球隊,施丹今季亦已將馬里安奴列為球隊邊緣人,不說上陣機會,多次比賽更連大名單不入,而以往馬里安奴有機會發揮嘅比賽「垃圾時間」亦轉為由祖域上陣。


於國家打呲之前,馬里安奴今季於銀河艦隊只曾於西班牙超級盃獲得可憐嘅兩場上陣機會,共44分鍾嘅上場時間亦未曾為球隊帶來貢獻,大家都認為26歲嘅馬里安奴似乎於皇馬嘅美夢已經走到尾聲。

令人出乎意料之外,國家打呲一戰施丹竟然捨棄高身價射手祖域,改選馬里安奴進入大軍名單。不過作為施丹契仔,皇馬正選前鋒賓施馬當然為球隊首選,該法國射手今場無太大貢獻之下於91分鍾被掉離場,皇馬於補時階段換人亦明顯為拖延時間之舉。沒錯,馬里安奴又再一次於「垃圾時間」為球隊上陣。

補時三分鍾,於91分鍾才獲派上陣,相信唔少球隊都會認為教練是玩弄自己,甚至覺得自己只係一個拖延時間嘅棋子。不過馬里安奴並未有放棄,於一分鍾時間亦拚命去表現自己。補時階段巴塞大軍壓前,一次界外球攻勢馬里安奴成功完成一次速度突破,於最後一秒剷射入網,助球隊奠定勝局。入球之後,整個班拿貝頓時佈滿掌聲,除了因為球隊確認獲勝外,相信更大原因是對不放棄嘅馬里安奴嘅最大肯定。


馬里安奴是次一分鍾的「神來之筆」,或可改變施丹未來對賓施馬、祖域、馬里安奴三人嘅整季,甚至未來安排。作為球隊邊緣人,每一次上陣都係自己發揮嘅機會,每一次都係令教練對自己改觀嘅機會。馬里安奴非常勵志地告訴大家,只要做好準備,機會隨時會降臨到自己身上。91分鍾才獲派上陣,只需一次控球,一次機會,就可以改變戰局,更可能改變自己整個人生。

本文原文: https://hommehk.com/real-madrid-1-minute-mariano-diaz/
本欄Facebook 專頁:https://www.facebook.com/hkomme/
本欄網址: http://hommehk.com/

如果喜歡我們的文章,請即分享到︰

標籤: 馬里安奴  西甲  皇家馬德里  

留言


請按此登錄後留言。未成為會員? 立即註冊
    快捷鍵:←
    快捷鍵:→