「死車狗，西班牙阿根廷決賽關你英格蘭鬼事呀，收皮啦。」
好，我唔否認，今次【死因研究】嘅死者明明係阿根廷，我一入驗屍房就走去搬英格蘭條屍出嚟，的確有少少九唔搭八。但我睇晒兩場波，再將佢哋擺埋一齊，腦入面就出現咗一個好強烈嘅個人觀感：
西班牙，係踩住英格蘭條屍奪冠。
講明，呢個只係我自己睇波後嘅判斷，唔係迪拉富安迪親口承認，更加唔係任何數據可以直接證明。只不過，英格蘭四日前點樣一度困住阿根廷，最後又點樣突然暴斃，似乎已經將成宗兇案原原本本記錄咗落份驗屍報告入面。
阿根廷以為自己殺完英格蘭，可以帶住同一套作案手法進入決賽。點知西班牙早已拎住份報告，摸清佢哋用過嘅每一件兇器。
結果，上一宗兇案嘅兇手，四日後就瞓咗喺另一張解剖枱上，阿根廷正式變成亞軍廷………
案情重組：由悶到抽筋，到最後一口氣斷纜
講世界盃決賽，賽前又美斯、又耶馬、又新舊球王交接，加埋特朗普坐直升機入場，Madonna、Justin Bieber同Shakira中場開Show，成件事鋪排到好似人類足球史上最豪華嘅終極盛典。
結果上半場，最好睇嘅可能真係中場表演。
阿根廷頻頻用犯規打斷節奏，球證Vinčić亦採取極寬鬆尺度，直到41分鐘細馬天尼斯踢跌奧耶沙巴，先出現第一張黃牌。西班牙控制戰局，但上半場只交出3次射門、0.19 xG；阿根廷就更加直接，零射門、0.00 xG，雙方以0：0返回更衣室。
細馬天尼斯半場前傷出，史卡朗尼換邊後再用柏利迪斯入替Nico González，希望加強中場。但西班牙下半場逐步收緊包圍網，錄得12次射門、8次中框，大馬天尼斯連番救出高巴斯、拿樸迪、力高威廉斯同耶馬嘅攻門，以一人之力將阿根廷拖入加時。
可惜去到補時，我哋車路士嘅安素就親手將形勢推向另一邊。佢先因投訴領黃，再喺第93分鐘魯莽撞跌高巴斯，兩黃一紅離場。
少打一人嘅阿根廷進入加時後收起艾華利斯、換入Senesi，縮成5-3-1繼續死守。大馬天尼斯仍然拒絕投降，力高威廉斯亦曾經入波，但因美連奴犯規在先被推翻。
直到106分鐘，樸路右路傳中，力高威廉斯後柱頂返中間，費蘭托利斯一腳抽入網頂。
1：0。大馬天尼斯全場11次撲救，始終拖唔到十二碼；阿根廷全場只有兩次射門，無一次命中目標。西班牙第二次成為世界冠軍，阿根廷嘅衛冕夢正式宣告死亡。
死因分析：上一宗兇案，出賣咗阿根廷
第一死因：作案手法，四日前已經曝光
有時破案唔需要柯南，因為兇手四日前先犯完案，成套作案手法已經被閉路電視影得清清楚楚。
四強對英格蘭，阿根廷同樣用犯規打斷節奏，再靠長傳、身後空間同美斯尋找反擊機會。英格蘭頭一個鐘用高位逼搶、中路收窄同貼身防守，一度成功將美斯困住；但領先後突然縮成五後衛，主動交出控球同場區，最終俾阿根廷連入兩球反殺。
西班牙由英格蘭條屍上面，得到一正一反兩條線索：阿根廷並非無法封鎖，但困住佢哋之後，絕對唔可以自己鬆手。
所以決賽踢到 0：0，西班牙無因為久攻不入而急躁，亦無退後等待阿根廷攻上嚟。佢哋繼續搶、繼續傳，將戰線牢牢壓喺阿根廷半場。
同一套方法用第二次，已經唔再係奇襲，而係前科。
第二死因：三件兇器，被西班牙逐件沒收
第一件係犯規。
阿根廷對英格蘭開波十分鐘已經犯規四次，今場球證Vinčić同樣採取寬鬆尺度，Mac Allister早段飛鏟奧莫都無牌，照計正中阿根廷下懷。
但西班牙用更快嘅一腳、兩腳傳送，趕喺阿根廷埋身之前將個波送走。即使被踢跌，重新開波後仍然照原有節奏再嚟。阿根廷全場犯規25次，成功令場波悶到抽筋，卻搶唔走西班牙嘅控制權。
第二件係長傳身後。
阿根廷原本可以跳過中場，直接搵前場第一點，再由美斯、艾華利斯或者兩翼衝擊西班牙高位防線。但西班牙前場搶迫唔俾後衛舒服起腳；個波勉強斬上去，中堅就貼住接應球員破壞第一點，後面仲有Unai Simón出迎清理。
結果阿根廷全場長傳成功率只有34%，上半場更加低至26%。睇落身後有大片空位，但個波根本送唔到上去。
最後一件，當然係美斯。
英格蘭主要靠Anderson貼住美斯；西班牙就先切斷接應路線，到美斯好不容易掂到個波，再立即用兩個人封住佢轉身同推進。美斯頭15分鐘唯一一次觸球，就係中圈開波；成個上半場亦只有15次觸球。
犯規打唔亂節奏、長傳搵唔到第一點、美斯又收唔到波，阿根廷成條進攻鏈就此斷開。法定時間零射門、0.00 xG，唔係史卡朗尼主動選擇，而係三件兇器全部被沒收後留下嘅驗屍結果。
不過，史卡朗尼袋入面，本來仲收埋咗最後一把刀。
第三死因：最後一條逃生路，被安素親手鎖死
史卡朗尼唔係坐喺場邊等死。細馬天尼斯傷出後，佢半場立即換入柏利迪斯，之後再派Molina、Medina同Giuliano Simeone入場，嘗試補充體力、穩住防線，等待西班牙露出破綻。
奈何西班牙封鎖嘅係阿根廷成條進攻鏈。柏利迪斯增加咗中場人數，但解決唔到後場出唔到波；Molina同Giuliano肯跑，個波亦送唔到上去。史卡朗尼換完一件零件，先發現成部機都已經斷電。
睇返換人次序，我估佢哋最後嘅如意算盤，就係靠大馬天尼斯捱過法定時間，再喺加時換入新鮮嘅劉太郎馬天尼斯。四日前對英格蘭，正正就係劉太郎後備入場，補時接應美斯傳中完成反殺。
但安素心念馬德里，親手幫阿根廷鎖死咗道門。
兩黃一紅之後，史卡朗尼原本可能用嚟換入劉太郎嘅加時名額，只能攞去換入Senesi補防。阿根廷收起艾華利斯，縮成5-3-1，最後一把準備用嚟反殺西班牙嘅刀，未拔出嚟就被自己人折斷。
另一邊，迪拉富安迪就仲有武器可以逐件拎出嚟。柏迪維持傳送、美連奴衝擊禁區、力高威廉斯拉闊左路，費蘭托利斯負責埋單。最後兩名後備合作，正式簽下阿根廷嘅死亡證。
一邊仲有新兇器可以入場；另一邊連最後條逃生路，都被安素從內反鎖。
總結：死者無白死，英格蘭終於參與決賽
講到尾，史卡朗尼套計劃其實無想像中咁蠢。
世界盃決賽無規定一定要踢得好睇。大馬天尼斯救足11次，阿根廷亦真係距離十二碼只差十幾分鐘。如果成功捱到尾，再由佢撲兩球十二碼帶走冠軍，到時大家只會讚史卡朗尼老謀深算，邊有人理你法定時間有無射門。
問題係，呢套劇本要求阿根廷120分鐘唔可以犯任何錯；西班牙就只需要等其中一次出錯。
至於西班牙係咪真係參考過英阿大戰，我當然無辦法捉住迪拉富安迪盤問。不過英格蘭確實先示範點樣困住阿根廷，再示範點樣親手放返佢出嚟。西班牙只要睇完唔好學錯嗰半份，已經慳返好多冤枉路。
英格蘭等咗60年，終於再次參與世界盃決賽。
只不過今次唔係以球隊身份，而係以教材形式。
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
https://cfc9up.com/
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。
好，我唔否認，今次【死因研究】嘅死者明明係阿根廷，我一入驗屍房就走去搬英格蘭條屍出嚟，的確有少少九唔搭八。但我睇晒兩場波，再將佢哋擺埋一齊，腦入面就出現咗一個好強烈嘅個人觀感：
西班牙，係踩住英格蘭條屍奪冠。
講明，呢個只係我自己睇波後嘅判斷，唔係迪拉富安迪親口承認，更加唔係任何數據可以直接證明。只不過，英格蘭四日前點樣一度困住阿根廷，最後又點樣突然暴斃，似乎已經將成宗兇案原原本本記錄咗落份驗屍報告入面。
阿根廷以為自己殺完英格蘭，可以帶住同一套作案手法進入決賽。點知西班牙早已拎住份報告，摸清佢哋用過嘅每一件兇器。
結果，上一宗兇案嘅兇手，四日後就瞓咗喺另一張解剖枱上，阿根廷正式變成亞軍廷………
案情重組：由悶到抽筋，到最後一口氣斷纜
講世界盃決賽，賽前又美斯、又耶馬、又新舊球王交接，加埋特朗普坐直升機入場，Madonna、Justin Bieber同Shakira中場開Show，成件事鋪排到好似人類足球史上最豪華嘅終極盛典。
結果上半場，最好睇嘅可能真係中場表演。
阿根廷頻頻用犯規打斷節奏，球證Vinčić亦採取極寬鬆尺度，直到41分鐘細馬天尼斯踢跌奧耶沙巴，先出現第一張黃牌。西班牙控制戰局，但上半場只交出3次射門、0.19 xG；阿根廷就更加直接，零射門、0.00 xG，雙方以0：0返回更衣室。
細馬天尼斯半場前傷出，史卡朗尼換邊後再用柏利迪斯入替Nico González，希望加強中場。但西班牙下半場逐步收緊包圍網，錄得12次射門、8次中框，大馬天尼斯連番救出高巴斯、拿樸迪、力高威廉斯同耶馬嘅攻門，以一人之力將阿根廷拖入加時。
可惜去到補時，我哋車路士嘅安素就親手將形勢推向另一邊。佢先因投訴領黃，再喺第93分鐘魯莽撞跌高巴斯，兩黃一紅離場。
少打一人嘅阿根廷進入加時後收起艾華利斯、換入Senesi，縮成5-3-1繼續死守。大馬天尼斯仍然拒絕投降，力高威廉斯亦曾經入波，但因美連奴犯規在先被推翻。
直到106分鐘，樸路右路傳中，力高威廉斯後柱頂返中間，費蘭托利斯一腳抽入網頂。
1：0。大馬天尼斯全場11次撲救，始終拖唔到十二碼；阿根廷全場只有兩次射門，無一次命中目標。西班牙第二次成為世界冠軍，阿根廷嘅衛冕夢正式宣告死亡。
死因分析：上一宗兇案，出賣咗阿根廷
第一死因：作案手法，四日前已經曝光
有時破案唔需要柯南，因為兇手四日前先犯完案，成套作案手法已經被閉路電視影得清清楚楚。
四強對英格蘭，阿根廷同樣用犯規打斷節奏，再靠長傳、身後空間同美斯尋找反擊機會。英格蘭頭一個鐘用高位逼搶、中路收窄同貼身防守，一度成功將美斯困住；但領先後突然縮成五後衛，主動交出控球同場區，最終俾阿根廷連入兩球反殺。
西班牙由英格蘭條屍上面，得到一正一反兩條線索：阿根廷並非無法封鎖，但困住佢哋之後，絕對唔可以自己鬆手。
所以決賽踢到 0：0，西班牙無因為久攻不入而急躁，亦無退後等待阿根廷攻上嚟。佢哋繼續搶、繼續傳，將戰線牢牢壓喺阿根廷半場。
同一套方法用第二次，已經唔再係奇襲，而係前科。
第二死因：三件兇器，被西班牙逐件沒收
第一件係犯規。
阿根廷對英格蘭開波十分鐘已經犯規四次，今場球證Vinčić同樣採取寬鬆尺度，Mac Allister早段飛鏟奧莫都無牌，照計正中阿根廷下懷。
但西班牙用更快嘅一腳、兩腳傳送，趕喺阿根廷埋身之前將個波送走。即使被踢跌，重新開波後仍然照原有節奏再嚟。阿根廷全場犯規25次，成功令場波悶到抽筋，卻搶唔走西班牙嘅控制權。
第二件係長傳身後。
阿根廷原本可以跳過中場，直接搵前場第一點，再由美斯、艾華利斯或者兩翼衝擊西班牙高位防線。但西班牙前場搶迫唔俾後衛舒服起腳；個波勉強斬上去，中堅就貼住接應球員破壞第一點，後面仲有Unai Simón出迎清理。
結果阿根廷全場長傳成功率只有34%，上半場更加低至26%。睇落身後有大片空位，但個波根本送唔到上去。
最後一件，當然係美斯。
英格蘭主要靠Anderson貼住美斯；西班牙就先切斷接應路線，到美斯好不容易掂到個波，再立即用兩個人封住佢轉身同推進。美斯頭15分鐘唯一一次觸球，就係中圈開波；成個上半場亦只有15次觸球。
犯規打唔亂節奏、長傳搵唔到第一點、美斯又收唔到波，阿根廷成條進攻鏈就此斷開。法定時間零射門、0.00 xG，唔係史卡朗尼主動選擇，而係三件兇器全部被沒收後留下嘅驗屍結果。
不過，史卡朗尼袋入面，本來仲收埋咗最後一把刀。
第三死因：最後一條逃生路，被安素親手鎖死
史卡朗尼唔係坐喺場邊等死。細馬天尼斯傷出後，佢半場立即換入柏利迪斯，之後再派Molina、Medina同Giuliano Simeone入場，嘗試補充體力、穩住防線，等待西班牙露出破綻。
奈何西班牙封鎖嘅係阿根廷成條進攻鏈。柏利迪斯增加咗中場人數，但解決唔到後場出唔到波；Molina同Giuliano肯跑，個波亦送唔到上去。史卡朗尼換完一件零件，先發現成部機都已經斷電。
睇返換人次序，我估佢哋最後嘅如意算盤，就係靠大馬天尼斯捱過法定時間，再喺加時換入新鮮嘅劉太郎馬天尼斯。四日前對英格蘭，正正就係劉太郎後備入場，補時接應美斯傳中完成反殺。
但安素心念馬德里，親手幫阿根廷鎖死咗道門。
兩黃一紅之後，史卡朗尼原本可能用嚟換入劉太郎嘅加時名額，只能攞去換入Senesi補防。阿根廷收起艾華利斯，縮成5-3-1，最後一把準備用嚟反殺西班牙嘅刀，未拔出嚟就被自己人折斷。
另一邊，迪拉富安迪就仲有武器可以逐件拎出嚟。柏迪維持傳送、美連奴衝擊禁區、力高威廉斯拉闊左路，費蘭托利斯負責埋單。最後兩名後備合作，正式簽下阿根廷嘅死亡證。
一邊仲有新兇器可以入場；另一邊連最後條逃生路，都被安素從內反鎖。
總結：死者無白死，英格蘭終於參與決賽
講到尾，史卡朗尼套計劃其實無想像中咁蠢。
世界盃決賽無規定一定要踢得好睇。大馬天尼斯救足11次，阿根廷亦真係距離十二碼只差十幾分鐘。如果成功捱到尾，再由佢撲兩球十二碼帶走冠軍，到時大家只會讚史卡朗尼老謀深算，邊有人理你法定時間有無射門。
問題係，呢套劇本要求阿根廷120分鐘唔可以犯任何錯；西班牙就只需要等其中一次出錯。
至於西班牙係咪真係參考過英阿大戰，我當然無辦法捉住迪拉富安迪盤問。不過英格蘭確實先示範點樣困住阿根廷，再示範點樣親手放返佢出嚟。西班牙只要睇完唔好學錯嗰半份，已經慳返好多冤枉路。
英格蘭等咗60年，終於再次參與世界盃決賽。
只不過今次唔係以球隊身份，而係以教材形式。
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
https://cfc9up.com/
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。
請按此登錄後留言。未成為會員? 立即註冊