（以下文字改編自我嘅《Chelsea The Origin EP5》）
車路士官方宣布，前班主兼主席Ken Bates離世，終年94歲。
對年輕一代車迷而言，Ken Bates可能係一個幾陌生嘅名字。最多只係喺球會歷史片段入面，見過呢位戴住副大眼鏡、留住一大把白鬍鬚嘅老人家，但未必知道佢做過啲乜。
畢竟，車路士近代最耀眼嘅歷史，幾乎全部發生喺2003年油王入主之後。摩連奴、林柏特、泰利、杜奧巴，由英超冠軍一路贏到歐聯冠軍，短短二十年間，車路士已經由英格蘭衝到世界。
油王建立咗我哋熟悉嘅王朝（BlueCo就負責玩爛），但喺佢到來之前，仲有另一個人，用咗21年時間將一支幾乎消失嘅球會，交到佢手上。
呢個人，就係Ken Bates。
今日唔打算將佢寫成聖人，只係想趁佢離開嘅時候，向未必認識佢嘅車迷介紹返：點解呢位老人家值得我哋記住。
£1買返嚟嘅，從來唔係一件平貨
故事要由1982年講起。
當年Ken Bates以象徵性嘅£1，由米爾斯家族手上買入車路士。聽落好似終極倫敦筍盤，一支今日價值數十億英鎊嘅球會，竟然平過一份Fish and Chips。
但正如二手平台有人用一蚊放部壞雪櫃，條件係你自己上門搬走；£1唔代表車路士唔值錢，只係背後個爛攤子已經大到無人想接。
70年代，車路士重建史丹福橋東看台，卻遇上工潮、建材短缺同工程延誤。到1977年，球會已經欠債£340萬，被逼賣走冠軍功臣，昔日嘅歐洲冠軍亦一路跌落英乙。
到Bates爺接手時，球會每星期虧蝕約£12,000，甚至去到無力支付球員人工嘅邊緣。佢俾出嗰£1，只係買入球會嘅入場券；真正接過手嘅，係一身債務同一支唔知道仲有無聽日嘅球隊。
1982/83球季，車路士更加差啲跌落英丙，最後靠Clive Walker喺保頓雨戰尾段入球，先勉強保住條命。
嗰個年代，無人會幻想車路士有朝一日成為世界冠軍。大家只係想，呢支球隊如果仲有下一季就好……
買到球會，先發現自己無屋企
然而，Bates爺接手後先發現，個爛攤子仲有一個更大嘅伏：佢買到車路士，但居然唔包史丹福橋。
為咗處理東看台留下嘅巨債，米爾斯家族早已將球會同球場地權分拆。到Bates爺接手時，業權已經落入地產商Marler Estates手上。
我哋，正式成為自己主場嘅租客。
地產商睇中嘅，係富咸區中心呢幅靚地。只要將車路士趕走，就可以拆咗史丹福橋，再發展成豪宅、酒店同商業設施。
Bates爺無可能同對方鬥有錢，只能用盡法律程序拖延同阻撓；球迷亦發起「Save The Bridge」運動，自己籌錢救球場。呢場保衛戰打咗接近十年，直到90年代初英國樓市崩盤，接手Marler嘅Cabra Estates自己先行執笠。
1992年，Bates爺終於同接管嘅銀行達成協議，重新取得史丹福橋控制權。
我哋保住咗個屋企。
後來，佢再成立Chelsea Pitch Owners，將球場地權、草地同「Chelsea Football Club」呢個名字交由球迷共同守住，避免車路士再次被人連根拔起。
Ken Bates最重要嘅遺產，未必係某個冠軍，而係今日我哋仍然可以將「車路士」同「史丹福橋」放埋一齊。
由一蚊雞球會，到豪門前夜
Bates爺同地產商打仗嘅同時，球隊亦慢慢由廢墟中重建。
1983年，領隊John Neal用有限資金重組球隊，車路士翌季就以英乙冠軍身份重返頂級聯賽。到90年代，Bates爺再邀請鶴度擔任球員兼領隊，令一支過氣嘅倫敦球隊，重新成為球星願意加盟嘅地方。
古烈治、蘇拿、迪馬堤奧、維埃里、迪西里、拿保夫，一個個歐洲名將走入史丹福橋。車路士亦先後贏得足總盃、聯賽盃、歐洲盃賽冠軍盃同歐洲超級盃，再喺首次出戰歐聯時殺入八強。
由差啲跌落英丙，到同巴塞喺歐聯正面交手；去到2003年，油王接手嘅已經唔係嗰個只值£1嘅爛攤子，而係一支擁有史丹福橋、國際級球員，兼且啱啱取得歐聯資格嘅球隊。
由一蚊雞球會走到豪門前夜，Bates爺將地基留低，再將鎖匙交到油王手上。
佢唔係聖人，但值得車迷講聲多謝
當然，呢個故事唔係完美童話。
重建史丹福橋同打造「Chelsea Village」留下嘅龐大債務，令2003年嘅車路士再次去到財政懸崖邊。Bates爺有功勞、有瘋狂、有惹火言論；曾經救起車路士，最後亦差啲再次將球會拖入深淵。
但評價一個人，唔需要將佢寫成聖人，亦唔代表要抹走佢做過嘅事。
油王為車路士建立咗王朝；Bates爺保住嘅，係王朝得以出現嘅球會，同埋個家。
今日我哋未必要認同佢做過嘅每一件事，但至少值得向呢位充滿爭議嘅白鬍鬚老人家，講返一聲多謝。
Rest in peace, Ken Bates。
多謝你喺車路士最接近消失嘅時候選擇行入嚟；亦多謝你，替我哋守住史丹福橋。
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
https://cfc9up.com/
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。
車路士官方宣布，前班主兼主席Ken Bates離世，終年94歲。
對年輕一代車迷而言，Ken Bates可能係一個幾陌生嘅名字。最多只係喺球會歷史片段入面，見過呢位戴住副大眼鏡、留住一大把白鬍鬚嘅老人家，但未必知道佢做過啲乜。
畢竟，車路士近代最耀眼嘅歷史，幾乎全部發生喺2003年油王入主之後。摩連奴、林柏特、泰利、杜奧巴，由英超冠軍一路贏到歐聯冠軍，短短二十年間，車路士已經由英格蘭衝到世界。
油王建立咗我哋熟悉嘅王朝（BlueCo就負責玩爛），但喺佢到來之前，仲有另一個人，用咗21年時間將一支幾乎消失嘅球會，交到佢手上。
呢個人，就係Ken Bates。
今日唔打算將佢寫成聖人，只係想趁佢離開嘅時候，向未必認識佢嘅車迷介紹返：點解呢位老人家值得我哋記住。
£1買返嚟嘅，從來唔係一件平貨
故事要由1982年講起。
當年Ken Bates以象徵性嘅£1，由米爾斯家族手上買入車路士。聽落好似終極倫敦筍盤，一支今日價值數十億英鎊嘅球會，竟然平過一份Fish and Chips。
但正如二手平台有人用一蚊放部壞雪櫃，條件係你自己上門搬走；£1唔代表車路士唔值錢，只係背後個爛攤子已經大到無人想接。
70年代，車路士重建史丹福橋東看台，卻遇上工潮、建材短缺同工程延誤。到1977年，球會已經欠債£340萬，被逼賣走冠軍功臣，昔日嘅歐洲冠軍亦一路跌落英乙。
到Bates爺接手時，球會每星期虧蝕約£12,000，甚至去到無力支付球員人工嘅邊緣。佢俾出嗰£1，只係買入球會嘅入場券；真正接過手嘅，係一身債務同一支唔知道仲有無聽日嘅球隊。
1982/83球季，車路士更加差啲跌落英丙，最後靠Clive Walker喺保頓雨戰尾段入球，先勉強保住條命。
嗰個年代，無人會幻想車路士有朝一日成為世界冠軍。大家只係想，呢支球隊如果仲有下一季就好……
買到球會，先發現自己無屋企
然而，Bates爺接手後先發現，個爛攤子仲有一個更大嘅伏：佢買到車路士，但居然唔包史丹福橋。
為咗處理東看台留下嘅巨債，米爾斯家族早已將球會同球場地權分拆。到Bates爺接手時，業權已經落入地產商Marler Estates手上。
我哋，正式成為自己主場嘅租客。
地產商睇中嘅，係富咸區中心呢幅靚地。只要將車路士趕走，就可以拆咗史丹福橋，再發展成豪宅、酒店同商業設施。
Bates爺無可能同對方鬥有錢，只能用盡法律程序拖延同阻撓；球迷亦發起「Save The Bridge」運動，自己籌錢救球場。呢場保衛戰打咗接近十年，直到90年代初英國樓市崩盤，接手Marler嘅Cabra Estates自己先行執笠。
1992年，Bates爺終於同接管嘅銀行達成協議，重新取得史丹福橋控制權。
我哋保住咗個屋企。
後來，佢再成立Chelsea Pitch Owners，將球場地權、草地同「Chelsea Football Club」呢個名字交由球迷共同守住，避免車路士再次被人連根拔起。
Ken Bates最重要嘅遺產，未必係某個冠軍，而係今日我哋仍然可以將「車路士」同「史丹福橋」放埋一齊。
由一蚊雞球會，到豪門前夜
Bates爺同地產商打仗嘅同時，球隊亦慢慢由廢墟中重建。
1983年，領隊John Neal用有限資金重組球隊，車路士翌季就以英乙冠軍身份重返頂級聯賽。到90年代，Bates爺再邀請鶴度擔任球員兼領隊，令一支過氣嘅倫敦球隊，重新成為球星願意加盟嘅地方。
古烈治、蘇拿、迪馬堤奧、維埃里、迪西里、拿保夫，一個個歐洲名將走入史丹福橋。車路士亦先後贏得足總盃、聯賽盃、歐洲盃賽冠軍盃同歐洲超級盃，再喺首次出戰歐聯時殺入八強。
由差啲跌落英丙，到同巴塞喺歐聯正面交手；去到2003年，油王接手嘅已經唔係嗰個只值£1嘅爛攤子，而係一支擁有史丹福橋、國際級球員，兼且啱啱取得歐聯資格嘅球隊。
由一蚊雞球會走到豪門前夜，Bates爺將地基留低，再將鎖匙交到油王手上。
佢唔係聖人，但值得車迷講聲多謝
當然，呢個故事唔係完美童話。
重建史丹福橋同打造「Chelsea Village」留下嘅龐大債務，令2003年嘅車路士再次去到財政懸崖邊。Bates爺有功勞、有瘋狂、有惹火言論；曾經救起車路士，最後亦差啲再次將球會拖入深淵。
但評價一個人，唔需要將佢寫成聖人，亦唔代表要抹走佢做過嘅事。
油王為車路士建立咗王朝；Bates爺保住嘅，係王朝得以出現嘅球會，同埋個家。
今日我哋未必要認同佢做過嘅每一件事，但至少值得向呢位充滿爭議嘅白鬍鬚老人家，講返一聲多謝。
Rest in peace, Ken Bates。
多謝你喺車路士最接近消失嘅時候選擇行入嚟；亦多謝你，替我哋守住史丹福橋。
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
https://cfc9up.com/
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。
請按此登錄後留言。未成為會員? 立即註冊