講起馬利斯卡，馬蛇，大家第一時間浮現喺腦海嘅畫面會係咩？
係世冠盃決賽 3-0 砌低 PSG 捧盃嗰陣嘅狂歡？定係歐聯賽場上將巴塞斬落馬嘅高光時刻？如果你係逢親 BlueCo 必反嘅巴打，大概會直接將佢定性為管理層內部權力鬥爭下嘅受害者，一個被美國資本迫走嘅悲劇英雄；最近仲有另一種聲音，話佢二五、反骨，未離職就搵定後路。
無論你點睇佢，我都有必要為馬蛇喺車路士嘅最後旅程，寫一個公道嘅結語。
2025 年夏天，史丹福橋為佢歡呼；但去到 2026 年 1 月 1 日，佢喺更衣室換好衫，一言不發，留低咗一個靜靜走人嘅背影，同埋一份得 99 隻字、毫無感情可言嘅官方分手聲明。中間呢短短半年，到底發生咗咩事？
而家好多人懷念馬蛇，很大程度係因為後面接手嘅羅生死得太過不堪入目，引發咗大家嘅念舊之情。但懷念同公道從來都係兩回事。呢篇文想做嘅，就係兩樣都唔偏私。
公道講句，馬蛇係真係做到嘢
喺開始數臭馬蛇之前，我諗無人會否認呢件事：馬蛇係真係為車路士建立咗實質嘅戰術基礎。
兩座獎盃，唔係靠運
24/25 球季嘅歐協聯冠軍，加上 2025 年夏天嗰座世冠盃，前者我唔敢講，但後者含金量係咁上下嘅。特別係喺美國 3-0 擊敗 PSG 果場決賽，絕對係馬蛇執教生涯嘅最高光時刻。點解？因為嗰場波證明咗，馬蛇其實係識得變通。
面對氣勢一時無兩嘅歐洲冠軍，馬蛇放棄咗自己最執著嘅極致傳控，轉而實施極具侵略性嘅人盯人高位壓迫，利用對手身後嘅空檔打反擊。嗰場波，佢完美激活咗彭馬、安素同埋新加盟嘅祖奧柏度。呢場勝利話俾全世界知，當佢願意放低固執去因地制宜嗰陣，佢絕對具備頂級名帥嘅戰術觸覺。
打好咗八成嘅體系基礎
除咗獎盃，馬蛇為這支年輕球隊注入咗極度清晰嘅戰術骨幹。佢將哥迪奧拿嗰套 3-2-2-3 陣型同 Box Midfield深深植入咗車路士嘅基因。古古尼亞嘅Inverted full-back 踢法，喺佢手下練到爐火純青。
佢確立咗彭馬嘅絕對進攻核心地位，同時建立咗一套下限極高嘅防守保護網。大家可能唔記得，喺馬蛇執教嘅成個 18 個月入面，無論場面幾便秘、攻勢幾老鼠拉龜都好，車路士從來未試過以超過 2 球嘅差距落敗，至少證明馬蛇親手打好咗呢個紮實嘅底子。
不過，世事就係咁諷刺。當佢建立咗呢個高下限嘅體系之後，佢自己亦都同時陷入咗無法突破嘅天花板。
球場上嘅死結：戰術進化停滯
如果話馬蛇首季係建基立業，咁去到 25/26 球季，就係佢親手封死咗球隊嘅上限。當對手開始適應車路士嘅套路，馬蛇嘅戰術就暴露出嚴重嘅死結。
打唔開 Low Block 嘅便秘問題
面對 Big 6 呢啲會主動壓出嚟嘅對手，馬蛇嗰套控球的確如魚得水；但當面對中下游球隊縮後死守打 Low Block 嗰陣，車路士就完全老鼠拉龜。
25/26 球季，車仔嘅平均控球率推高到 58%，但呢啲好多都係得個控字。你睇返主場 0-0 悶和水晶宮、作客 2-2 逼和般尼茅夫、甚至 0-3 輸俾森林嗰幾場波，成隊車路士就係喺對手禁區外圍做大量毫無威脅嘅U 型傳球，極度缺乏直接打擊同垂直滲透。面對密集防守瘋狂失分，全因進攻便秘。
3-1-6 嘅防守豪賭
為咗解決破密集無力嘅問題，馬蛇無去諗點樣豐富邊路戰術或者增加無球跑動，反而推行咗一個極端激進嘅 3-1-6 陣型。
佢將兩名內收中場進一步推前到鋒線，防線前面只係留低安素或者卡些度做單一 Anchor。呢個調動換來嘅係另一場災難。安素運動能力相對不足同防守覆蓋面窄嘅弱點被無限放大，每次攻守轉換一旦斷纜，車仔中後場瞬間門戶大開，對手只要一個簡單反擊，就直接面對防線。
死球災難與防線惡化
防守端，佢堅持極端嘅人盯人高位壓迫，經常搞到中堅被逼拉出防線跟人，身後留低巨大空檔。最令人失望嘅係死球防守，單季失咗 11 個角球入波，直接追平球會歷史最差紀錄…
我哋望下個數據就明：球隊嘅預期失球（xGA）喺呢半季急劇惡化到去 46.5 - 49.5 嘅危險水平，單單係開季頭 7 場，就已經錄得 6 次嚴重後場失誤導致被射門。高維爾一傷，成條防線根本頂唔順馬蛇嗰套高危玩法。
一句講晒：戰術進化？冇。馬蛇嘅 25/26 球季，只係 24/25 球季嘅複製品，只係件波衫換咗，但所有結構性問題全部原封不動留低晒。
場外風波，試探底線嘅權力遊戲
戰術上嘅江郎才盡，其實未至於要季中即炒。真正令到馬蛇同車路士高層關係徹底破裂、無彎轉嘅，係佢喺場外搞出嚟嗰一連串踩界嘅權力遊戲。加上高層嘅唔退讓，先係引爆一切嘅炸彈。
文迪斯與兩個電話
早喺 10 月下旬，當球隊成績啱啱開始有起伏嗰陣，馬蛇做咗一個極度挑動資本家神經嘅動作：佢透過新聘請嘅超級經理人文迪斯，私下接觸咗曼城，探討接替哥迪奧拿嘅可能性，之後甚至傳出同祖雲達斯眉來眼去。
佢嘅算盤好簡單：用外部球會嘅興趣做籌碼，去威迫車路士高層，要求一份更大份嘅新合約同埋轉會話語權。但喺講求絕對忠誠同權力集中嘅美國資本眼中，呢種行為等同背叛。未被炒之前，佢已經喺度諗緊下一站，雙方嘅信任就係喺呢一刻開始漏氣。
呢部份唔詳述，可以睇返我舊文：【球壇風向室】拉奧拿後嘅大鱷文迪斯 馬蛇變成最強示範單位？
列斯占士嘅醫療戰爭
高層當球員係長遠資產，但領隊只睇短期戰績，列斯占士就變成雙方矛盾嘅爆發點。醫療團隊明明為占士定下咗極度嚴格嘅出場時間限制，但馬蛇為咗保住自己個帥位同戰績，喺 12 月硬生生安排占士連續踢咗三場 90 分鐘。
結果？占士一如所料地再次受傷倒下。喺高層眼中，呢個已經唔係戰術失誤，而係公然違抗內部指引，將球會最珍貴嘅資產推上賭枱做炮灰。
「最糟糕嘅 48 小時」公關自爆
去到 12 月中，車仔主場 2-0 贏愛華頓，明明係開心事，馬蛇竟然喺賽後記招無啦啦拋出一句技驚四座嘅對白：「這是我加盟球會以來最糟糕的 48 小時，因為很多人都沒有支持我們。」
佢拒絕點名，拒絕澄清，擺明車馬將內部矛盾公開化。喺贏緊波都要出嚟無風起浪、將自己塑造成受害者，我估背後多少係有「高人」指點。
無聲離場嘅倔強背影
最後一根稻草，係 12 月 30 日主場 2-2 逼和般尼茅夫。嗰場波，馬蛇第一次喺史丹福橋聽到漫天嘅噓聲。賽後，佢聲稱自己病咗拒絕出席記者會，推咗助教卡巴尼路出去擋箭。
據內部消息指，佢自己一個人喺更衣室換好衫，一言不發，無同任何球員交代或者道別，靜靜地行出咗史丹福橋。呢個充滿電影感嘅畫面，其實說明咗一切。
贏波嗰日，佢喺咪高峰前面大聲投訴自己冇被支持；輸波失分嗰日，佢連一個解釋都唔想俾大家。呢個人，其實心底裡一早已經決定咗要走。
換轉你係高層，都好難100%相信手下呢個人。
和平分手嘅真相：八字唔夾嘅共業
我知，一講馬蛇，公海好多人將佢塑造成一個純粹嘅受害者，覺得係 BlueCo 班美國佬唔識波亂炒人。我一直都無寫一篇文說明自己睇法，但呢篇大概係最好嘅機會。呢次分手，唔係單方面嘅責任。
高層嘅責任：離地嘅轉會操作
BlueCo 體育總監 Winstanley 同 Stewart 絕對要孭飛。佢哋喺轉會市場上嘅操作，完全同馬蛇嘅戰術需求脫節，感覺上同干地當年係油王手上完全一樣。
高層花巨資夾硬塞咗個加拿祖入隊，結果？先唔講佢遲開操、連90分鐘體力都唔夠，加拿祖係需要極大空間衝刺嘅翼鋒，喺馬蛇嗰套講求陣地戰短傳嘅體系入面水土不服，20 場聯賽得 1 個入波，我會話係一場適配災難。
相反，當高維爾受傷，馬蛇開到聲急需買入具備即戰力嘅頂級中堅去頂住條防線出球嗰陣，高層竟然企硬拒絕，叫佢用內部嘅小將艾殊邦 或者 巴迪亞舒利頂檔。情況係阿媽話屋企無米今晚無飯開，你同佢講食住罐頭粥先，唔俾人藤條炆豬肉已經偷笑。
仲有被譽為世代天才嘅二安，係佢手下全季加埋只係踢得嗰 341 分鐘。高層要長遠育成資產，領隊要即食保住戰績，呢種 Project Mismatch，好難話係馬蛇嘅責任。
馬蛇嘅責任：一步步推自己去懸崖
但調返轉睇，馬蛇自己亦都毫不留情咁將自己推落懸崖。
正如上一節所講，文迪斯嘅電話事件種低咗不可挽回嘅不信任；為保戰績無視醫療團隊警告，犧牲占士嘅健康去挑釁高層底線；再加上嗰個「最糟糕 48 小時」嘅記招自爆。高層俾咗一個爛攤子佢，而佢嘅解決方法，係喺個爛攤子上面倒火水。
所以，當 1 月 1 日嗰份解僱聲明出街嗰陣，你就會明白咩叫一早貌合神離。
車路士官方嗰份 99 隻字嘅聲明，冰冷到好似一份純粹嘅法律終止合約文件，連一句客套嘅 "Thank you" 同送別祝福都慳返。而馬蛇自己出嗰份聲明呢？佢多謝咗球迷、多謝咗球員、甚至拋埋金句話「讓這個世界比你發現它時變得更好」，但全篇文隻字未提 BlueCo 高層同老細。
呢場分手，官方定性為 Parted company。無錯，的確係和平分手，至少無話要俾幾多賠償金、但絕對係第日喺街見到都唔好打招呼果隻絕情分手。
結語：不同頻道嘅必然結局
去到最後，我自己仍然認為好難用非黑即白去定論究竟邊個啱、邊個錯。因為馬蛇同 BlueCo 高層，根本由頭到尾都係身處喺兩個完全唔同嘅平行線上面。
馬蛇想要嘅，係傳統英超領隊嘅轉會話語權、一套需要按自己心意去微調嘅戰術體系，同埋可以慢慢打磨嘅時間；但 BlueCo 想要嘅，係一個純粹負責操練同排陣嘅主教練、一堆買返嚟需要上陣時間去升值嘅年輕資產，同埋確保下季有歐聯踢嘅即時成績。
呢兩套理念分開嚟睇，其實兩邊都無錯，各取所需。但當你夾硬將呢兩方綁埋喺同一架車上面，就注定兩敗俱傷車毀人亡。
兩座獎盃係真嘅，嗰個一言不發嘅倔強背影係真嘅，而雙方從頭到尾都無解決過嘅核心矛盾，亦全部都係真嘅。
馬利斯卡唔係被美國資本無情謀殺嘅悲劇英雄，佢只係帶住自己嗰份戰術上嘅偏執同管理上嘅傲慢，同一班同樣充滿問題、脫離足球現實嘅高層，一齊並肩走向呢個無可避免嘅結局而已。
下次懷念馬蛇，或者睇得闊少少橫少少，或者你會發現事件又有少少不一樣。
========================================
Facebook 同 主頁 已經開咗啦！如果鍾意我的文章可以入嚟按個讚！⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
https://cfc9up.com/
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。
係世冠盃決賽 3-0 砌低 PSG 捧盃嗰陣嘅狂歡？定係歐聯賽場上將巴塞斬落馬嘅高光時刻？如果你係逢親 BlueCo 必反嘅巴打，大概會直接將佢定性為管理層內部權力鬥爭下嘅受害者，一個被美國資本迫走嘅悲劇英雄；最近仲有另一種聲音，話佢二五、反骨，未離職就搵定後路。
無論你點睇佢，我都有必要為馬蛇喺車路士嘅最後旅程，寫一個公道嘅結語。
2025 年夏天，史丹福橋為佢歡呼；但去到 2026 年 1 月 1 日，佢喺更衣室換好衫，一言不發，留低咗一個靜靜走人嘅背影，同埋一份得 99 隻字、毫無感情可言嘅官方分手聲明。中間呢短短半年，到底發生咗咩事？
而家好多人懷念馬蛇，很大程度係因為後面接手嘅羅生死得太過不堪入目，引發咗大家嘅念舊之情。但懷念同公道從來都係兩回事。呢篇文想做嘅，就係兩樣都唔偏私。
公道講句，馬蛇係真係做到嘢
喺開始數臭馬蛇之前，我諗無人會否認呢件事：馬蛇係真係為車路士建立咗實質嘅戰術基礎。
兩座獎盃，唔係靠運
24/25 球季嘅歐協聯冠軍，加上 2025 年夏天嗰座世冠盃，前者我唔敢講，但後者含金量係咁上下嘅。特別係喺美國 3-0 擊敗 PSG 果場決賽，絕對係馬蛇執教生涯嘅最高光時刻。點解？因為嗰場波證明咗，馬蛇其實係識得變通。
面對氣勢一時無兩嘅歐洲冠軍，馬蛇放棄咗自己最執著嘅極致傳控，轉而實施極具侵略性嘅人盯人高位壓迫，利用對手身後嘅空檔打反擊。嗰場波，佢完美激活咗彭馬、安素同埋新加盟嘅祖奧柏度。呢場勝利話俾全世界知，當佢願意放低固執去因地制宜嗰陣，佢絕對具備頂級名帥嘅戰術觸覺。
打好咗八成嘅體系基礎
除咗獎盃，馬蛇為這支年輕球隊注入咗極度清晰嘅戰術骨幹。佢將哥迪奧拿嗰套 3-2-2-3 陣型同 Box Midfield深深植入咗車路士嘅基因。古古尼亞嘅Inverted full-back 踢法，喺佢手下練到爐火純青。
佢確立咗彭馬嘅絕對進攻核心地位，同時建立咗一套下限極高嘅防守保護網。大家可能唔記得，喺馬蛇執教嘅成個 18 個月入面，無論場面幾便秘、攻勢幾老鼠拉龜都好，車路士從來未試過以超過 2 球嘅差距落敗，至少證明馬蛇親手打好咗呢個紮實嘅底子。
不過，世事就係咁諷刺。當佢建立咗呢個高下限嘅體系之後，佢自己亦都同時陷入咗無法突破嘅天花板。
球場上嘅死結：戰術進化停滯
如果話馬蛇首季係建基立業，咁去到 25/26 球季，就係佢親手封死咗球隊嘅上限。當對手開始適應車路士嘅套路，馬蛇嘅戰術就暴露出嚴重嘅死結。
打唔開 Low Block 嘅便秘問題
面對 Big 6 呢啲會主動壓出嚟嘅對手，馬蛇嗰套控球的確如魚得水；但當面對中下游球隊縮後死守打 Low Block 嗰陣，車路士就完全老鼠拉龜。
25/26 球季，車仔嘅平均控球率推高到 58%，但呢啲好多都係得個控字。你睇返主場 0-0 悶和水晶宮、作客 2-2 逼和般尼茅夫、甚至 0-3 輸俾森林嗰幾場波，成隊車路士就係喺對手禁區外圍做大量毫無威脅嘅U 型傳球，極度缺乏直接打擊同垂直滲透。面對密集防守瘋狂失分，全因進攻便秘。
3-1-6 嘅防守豪賭
為咗解決破密集無力嘅問題，馬蛇無去諗點樣豐富邊路戰術或者增加無球跑動，反而推行咗一個極端激進嘅 3-1-6 陣型。
佢將兩名內收中場進一步推前到鋒線，防線前面只係留低安素或者卡些度做單一 Anchor。呢個調動換來嘅係另一場災難。安素運動能力相對不足同防守覆蓋面窄嘅弱點被無限放大，每次攻守轉換一旦斷纜，車仔中後場瞬間門戶大開，對手只要一個簡單反擊，就直接面對防線。
死球災難與防線惡化
防守端，佢堅持極端嘅人盯人高位壓迫，經常搞到中堅被逼拉出防線跟人，身後留低巨大空檔。最令人失望嘅係死球防守，單季失咗 11 個角球入波，直接追平球會歷史最差紀錄…
我哋望下個數據就明：球隊嘅預期失球（xGA）喺呢半季急劇惡化到去 46.5 - 49.5 嘅危險水平，單單係開季頭 7 場，就已經錄得 6 次嚴重後場失誤導致被射門。高維爾一傷，成條防線根本頂唔順馬蛇嗰套高危玩法。
一句講晒：戰術進化？冇。馬蛇嘅 25/26 球季，只係 24/25 球季嘅複製品，只係件波衫換咗，但所有結構性問題全部原封不動留低晒。
場外風波，試探底線嘅權力遊戲
戰術上嘅江郎才盡，其實未至於要季中即炒。真正令到馬蛇同車路士高層關係徹底破裂、無彎轉嘅，係佢喺場外搞出嚟嗰一連串踩界嘅權力遊戲。加上高層嘅唔退讓，先係引爆一切嘅炸彈。
文迪斯與兩個電話
早喺 10 月下旬，當球隊成績啱啱開始有起伏嗰陣，馬蛇做咗一個極度挑動資本家神經嘅動作：佢透過新聘請嘅超級經理人文迪斯，私下接觸咗曼城，探討接替哥迪奧拿嘅可能性，之後甚至傳出同祖雲達斯眉來眼去。
佢嘅算盤好簡單：用外部球會嘅興趣做籌碼，去威迫車路士高層，要求一份更大份嘅新合約同埋轉會話語權。但喺講求絕對忠誠同權力集中嘅美國資本眼中，呢種行為等同背叛。未被炒之前，佢已經喺度諗緊下一站，雙方嘅信任就係喺呢一刻開始漏氣。
呢部份唔詳述，可以睇返我舊文：【球壇風向室】拉奧拿後嘅大鱷文迪斯 馬蛇變成最強示範單位？
列斯占士嘅醫療戰爭
高層當球員係長遠資產，但領隊只睇短期戰績，列斯占士就變成雙方矛盾嘅爆發點。醫療團隊明明為占士定下咗極度嚴格嘅出場時間限制，但馬蛇為咗保住自己個帥位同戰績，喺 12 月硬生生安排占士連續踢咗三場 90 分鐘。
結果？占士一如所料地再次受傷倒下。喺高層眼中，呢個已經唔係戰術失誤，而係公然違抗內部指引，將球會最珍貴嘅資產推上賭枱做炮灰。
「最糟糕嘅 48 小時」公關自爆
去到 12 月中，車仔主場 2-0 贏愛華頓，明明係開心事，馬蛇竟然喺賽後記招無啦啦拋出一句技驚四座嘅對白：「這是我加盟球會以來最糟糕的 48 小時，因為很多人都沒有支持我們。」
佢拒絕點名，拒絕澄清，擺明車馬將內部矛盾公開化。喺贏緊波都要出嚟無風起浪、將自己塑造成受害者，我估背後多少係有「高人」指點。
無聲離場嘅倔強背影
最後一根稻草，係 12 月 30 日主場 2-2 逼和般尼茅夫。嗰場波，馬蛇第一次喺史丹福橋聽到漫天嘅噓聲。賽後，佢聲稱自己病咗拒絕出席記者會，推咗助教卡巴尼路出去擋箭。
據內部消息指，佢自己一個人喺更衣室換好衫，一言不發，無同任何球員交代或者道別，靜靜地行出咗史丹福橋。呢個充滿電影感嘅畫面，其實說明咗一切。
贏波嗰日，佢喺咪高峰前面大聲投訴自己冇被支持；輸波失分嗰日，佢連一個解釋都唔想俾大家。呢個人，其實心底裡一早已經決定咗要走。
換轉你係高層，都好難100%相信手下呢個人。
和平分手嘅真相：八字唔夾嘅共業
我知，一講馬蛇，公海好多人將佢塑造成一個純粹嘅受害者，覺得係 BlueCo 班美國佬唔識波亂炒人。我一直都無寫一篇文說明自己睇法，但呢篇大概係最好嘅機會。呢次分手，唔係單方面嘅責任。
高層嘅責任：離地嘅轉會操作
BlueCo 體育總監 Winstanley 同 Stewart 絕對要孭飛。佢哋喺轉會市場上嘅操作，完全同馬蛇嘅戰術需求脫節，感覺上同干地當年係油王手上完全一樣。
高層花巨資夾硬塞咗個加拿祖入隊，結果？先唔講佢遲開操、連90分鐘體力都唔夠，加拿祖係需要極大空間衝刺嘅翼鋒，喺馬蛇嗰套講求陣地戰短傳嘅體系入面水土不服，20 場聯賽得 1 個入波，我會話係一場適配災難。
相反，當高維爾受傷，馬蛇開到聲急需買入具備即戰力嘅頂級中堅去頂住條防線出球嗰陣，高層竟然企硬拒絕，叫佢用內部嘅小將艾殊邦 或者 巴迪亞舒利頂檔。情況係阿媽話屋企無米今晚無飯開，你同佢講食住罐頭粥先，唔俾人藤條炆豬肉已經偷笑。
仲有被譽為世代天才嘅二安，係佢手下全季加埋只係踢得嗰 341 分鐘。高層要長遠育成資產，領隊要即食保住戰績，呢種 Project Mismatch，好難話係馬蛇嘅責任。
馬蛇嘅責任：一步步推自己去懸崖
但調返轉睇，馬蛇自己亦都毫不留情咁將自己推落懸崖。
正如上一節所講，文迪斯嘅電話事件種低咗不可挽回嘅不信任；為保戰績無視醫療團隊警告，犧牲占士嘅健康去挑釁高層底線；再加上嗰個「最糟糕 48 小時」嘅記招自爆。高層俾咗一個爛攤子佢，而佢嘅解決方法，係喺個爛攤子上面倒火水。
所以，當 1 月 1 日嗰份解僱聲明出街嗰陣，你就會明白咩叫一早貌合神離。
車路士官方嗰份 99 隻字嘅聲明，冰冷到好似一份純粹嘅法律終止合約文件，連一句客套嘅 "Thank you" 同送別祝福都慳返。而馬蛇自己出嗰份聲明呢？佢多謝咗球迷、多謝咗球員、甚至拋埋金句話「讓這個世界比你發現它時變得更好」，但全篇文隻字未提 BlueCo 高層同老細。
呢場分手，官方定性為 Parted company。無錯，的確係和平分手，至少無話要俾幾多賠償金、但絕對係第日喺街見到都唔好打招呼果隻絕情分手。
結語：不同頻道嘅必然結局
去到最後，我自己仍然認為好難用非黑即白去定論究竟邊個啱、邊個錯。因為馬蛇同 BlueCo 高層，根本由頭到尾都係身處喺兩個完全唔同嘅平行線上面。
馬蛇想要嘅，係傳統英超領隊嘅轉會話語權、一套需要按自己心意去微調嘅戰術體系，同埋可以慢慢打磨嘅時間；但 BlueCo 想要嘅，係一個純粹負責操練同排陣嘅主教練、一堆買返嚟需要上陣時間去升值嘅年輕資產，同埋確保下季有歐聯踢嘅即時成績。
呢兩套理念分開嚟睇，其實兩邊都無錯，各取所需。但當你夾硬將呢兩方綁埋喺同一架車上面，就注定兩敗俱傷車毀人亡。
兩座獎盃係真嘅，嗰個一言不發嘅倔強背影係真嘅，而雙方從頭到尾都無解決過嘅核心矛盾，亦全部都係真嘅。
馬利斯卡唔係被美國資本無情謀殺嘅悲劇英雄，佢只係帶住自己嗰份戰術上嘅偏執同管理上嘅傲慢，同一班同樣充滿問題、脫離足球現實嘅高層，一齊並肩走向呢個無可避免嘅結局而已。
下次懷念馬蛇，或者睇得闊少少橫少少，或者你會發現事件又有少少不一樣。
========================================
Facebook 同 主頁 已經開咗啦！如果鍾意我的文章可以入嚟按個讚！⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
https://cfc9up.com/
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。
請按此登錄後留言。未成為會員? 立即註冊